Mulimo Uwo Ngwakuzirwa Comene
1. Kasi timalirenge vici pa uteŵeti cifukwa ca kuwuzirwiska?
1 Cifukwa wuli nyengo zose tikuciskika kuti timalirenge nyengo yithu, nkhongono, na cuma cithu pa uteŵeti? Cifukwa nchakuti palije mulimo unyake wakuzirwa comene kuluska uwu. Kughanaghanira umo uteŵeti withu ukovwilira ŵanthu kutipangiskenge kuti tiŵe na khumbo likuru la kucitako mulimo uwu, uwo uzamucitikaso yayi.—Mil. 20:24.
2. Kasi mulimo withu wa kupharazga ukutuŵiska wuli zina la Yehova?
2 Ukutuŵiska Zina la Yehova: Upharazgi withu ukujintha pa fundo yakuti Ufumu wa Yehova uwo ukuwusika na Khristu Yesu uzamuwuskapo maboma ghose gha ŵanthu na kumazga masuzgo ghose agho ŵanthu ŵakukumana nagho. (Mat. 6:9, 10) Tikutumphuska Yehova kuti ndiyo pera wangatiwombora ku matenda na nyifwa. (Yes. 25:8; 33:24) Pakuti tikumanyikwa na zina lake, awo ŵakuwona nkharo yithu yiwemi ndiposo mwamphu withu ŵangamucindika. (1 Pet. 2:12) Tikuŵa ŵakukhorwa comene apo tikupharazga pa caru cose zina la Yehova, uyo ni Fumu ya Cilengiwa Cose.—Sal. 83:18.
3. Kasi awo ŵakupulikira uthenga wa Ufumu ŵakusanga vitumbiko wuli?
3 Ukuponoska Umoyo: Yehova “wakukhumba cara kuti munyake waparanyike, kweni wakukhumba kuti wose ŵafike pa kupera.” (2 Pet. 3:9) Kweni, kasi ŵanthu ŵangamanya wuli ivyo Yehova wakuzomerezga na ivyo wakukana kwambura munthu wakuŵasambizga? (Yona 4:11; Rom. 10:13-15) Umoyo wa ŵanthu ukusintha para ŵapulikira makani ghawemi cifukwa ŵakuleka tumaluso twakupweteka. (Mika 4:1-4) Kweniso, ŵakulindilira umoyo wamuyirayira. Para tikupharazga na kusambizga mwamwamphu tikujiponoska taŵene na awo ŵakutitegherezga. (1 Tim. 4:16) Tili na cigaŵa cakuzirwa comene cakuti ticite pa mulimo wakuzirwa uwu.
4. Cifukwa wuli tikwenera kuyezgayezga kucita mwamwamphu mulimo wa kupharazga Ufumu na kupanga ŵasambiri?
4 Sonosono apa suzgo yikuru yizenge mwakubucizga ndipo yiparanyenge caru cose ciheni ici. Kweni awo ŵali ku cigaŵa ca Yehova ndiwo ŵaponenge. Ntheura, tikwenera kucita mwaluŵiro mulimo wa kupharazga na kupanga ŵasambiri. Mulimo uwu ngwakuzirwa comene ndipo ngwacandulo kuluska milimo yose iyo yikucitika mazuŵa ghano. Tiyeni tiwuŵikenge panthazi mu umoyo withu.—Mat. 6:33.