Cawanangwa Ico Capelekeka ku Ŵateŵeti ŵa Ciuta

1. Nchivici cikamba kucitika mu 1938, ndipo cilato cake cikaŵa cakuti wuli?

¹ Mu 1938, gulu la Yehova likamba kucita cinthu cinyake ciphya. Mipingo yinandiko yikamba kupempheka kuti yipangirenge pamoza ungano, uwo lero tikuti ungano wa dera. Kasi maungano agha cilato cake cikaŵa cakuti wuli? Uteŵeti Withu wa Ufumu wa Janyuwale 1939, uwo pa nyengo iyo ukaŵa na zina linyake, ukati: “Maungano agha ghanozgeka na Gulu la Yehova kuti ghatovwire kucita mulimo wake wa Ufumu. Ulongozgi uwo uyowoyekenge pa maungano agha ngwakuzirwa comene kwa waliyose kuti wacite makora mulimo uwo tapika.” Mu 1938 ŵapharazgi ŵakaŵapo 58,000 pera, ndipo kusazgikira uko kwaŵapo nchilongolero cakuti maungano gha dera ghakovwira nadi ŵateŵeti ŵa Yehova ‘kucita mulimo uwo tapika.’

2. Kasi pa ungano wa dera uwo ukwiza pamuŵa nkhani wuli?

² Mutu wa Ungano wa Dera wa Cilimika Cino: Ungano wa dera uwo wambenge mu Epulero tikuwulindilira na mtima wose, ndipo tikumanya kuti uzamutikhozga comene. Mutu wake ngwakuti “Muli Cigaŵa ca Caru Cara,” ndipo watoleka pa Yohane 15:19. Ni nkhani wuli zinyake izo ŵateŵeti ŵa Ciuta ŵazamwandula nazo? Pa Cisulo tizamutegherezga nkhani ya mutu wakuti “Kasi Uteŵeti Wanyengozose Ukutivikilira Wuli?” Tizamusangwaso kutegherezga nkhani yakulekerana ya vigaŵa vitatu, ya mutu wakuti “Lekani Kubinkhiskika Na . . .” “Cikoko,” “Muzaghali Mukuru” ndiposo “Ŵamalonda Ŵakwendakwenda.” Pa Sabata tizamutegherezga nkhani yakulekerana ya mutu wakuti “Temwani Yehova, Caru Cara.” Tizamutegherezgaso nkhani zinyake nga ni izi: “Ufumu wa Khristu ‘Ngwa Caru Cino Cara,’” “Lutilirani Kuŵa nga ‘Mbalendo na Ŵakupanjwa,’” na “Khwimani Mtima! Mungatonda Caru.”

3. Kasi tingasanga candulo wuli para tasangika pa ungano wa dera?

³ Wati wawera ku ungano wa dera uwo ukacitika sonosono apa, mudumbu munyake uyo wakalopwa kwakanyengo wakalemba kuti ungano uwu ukamukhuŵilizga kuti wasande umo vinthu vikaŵira pa umoyo wake na kuŵikapo mtima pa “uteŵeti wa m’munda na kuleka kupenjerezga tuvifukwa twakuti walekere kuluta mu uteŵeti.” Tikukayika yayi kuti ungano wa dera wa cilimika ciphya ca uteŵeti uzamutikhuŵilizga kutemwa Yehova m’malo mwa kutemwa caru. (1 Yoh. 2:15-17) Woneseskani kuti muzakaŵepo na kuzakategherezga, mwakuti muzakasange candulo na ungano uwu, uwo nchawanangwa ico Ciuta wapeleka ku ŵateŵeti ŵake.