Gaŵirani Mathirakiti Pakupharazga
1. Kasi mathirakiti ghawovwira wuli pakupharazga?
1 Kwamba kale, ŵateŵeti ŵa Yehova ŵakugaŵira mathirakiti pakupharazga makani ghawemi. Mu 1880, mubali C T Russel na ŵanyake, ŵakamba kulemba tumapepara twakucemeka Bible Students’ Tracts. Tumapepara utu ŵakapelekanga kwa awo ŵakaŵazganga Gongwe la Mulinda kuti ŵapenge ŵanthu. Mathirakiti ghakaŵa ghakuzirwa comene, mwakuti mu 1884, apo mubali C. T. Russell wakambiska wupu wakovwira pa mulimo wakupharazga, wakasazgako lizgu lakuti “thirakiti” ku zina la wupu uwu. Wupu uwu ukacemekanga Zion’s Watch Tower Tract Society, ndipo sono ukucemeka Watch Tower Bible and Tract Society of Pennsylvania. Kufika mu 1918, Ŵasambiri ŵa Baibolo ŵakaŵa kuti ŵagaŵira mathirakiti ghakujumpha 300 miliyoni. Mpaka sono mathirakiti ghacali ghakovwira pakupharazga.
2. Cifukwa wuli Mathirakiti ngakovwira pakupharazga?
2 Cifukwa Ico Ngakovwira: Mathirakiti ghakuŵa na vithuzi vyakutowa. Mukuŵa uthenga wakudumura, wakukondweska, na wakusambizga. Ŵanthu ŵanyake cikuŵaŵira cipusu kuŵazga mathirakiti kuluska magazini panji buku. Mathirakiti ngakusuzga yayi kugaŵira. Nanga ŵangaŵa ŵapharazgi ŵaphya na ŵana, ŵangagaŵira kwambura suzgo. Kweniso, ngapusu kuyegha.
3. Yowoyani cakucitika ico cikulongora kuzirwa kwa mathirakiti; cingaŵa ico cikacitikira imwe panji ico mukaŵazga mu mabuku ghithu.
3 Ŵanthu ŵanandi ŵakusambira unenesko cifukwa ca mathirakiti. Ndivyo vikacitikira mama munyake ku Haiti. Wakawona thirakiti mu msewu. Wakatora na kuŵazga. Ndipo wakati, “Nasanga unenesko!” Wakaluta ku Nyumba ya Ufumu, wakamba kusambira Baibolo, ndipo wakabapatizika. Vyose ivi vikacitika cifukwa ca Mazgu gha Ciuta agho ghakaŵa mu thirakiti.
4. Kasi tikwenera kuŵa na cilato wuli para tikugaŵira mathirakiti?
4 Kugaŵira Nyumba na Nyumba: Pakuti mathirakiti ngakovwira pakupharazga, myezi yinandi tizamugaŵiranga mathirakiti kwamba mu Novembala. Cilato cithu nkhumupa waka thirakiti munthu yayi, kweni kuti tambiske cidumbirano. Usange munthu wanweka paulendo wakwamba panji para tawelerako, tingamulongora umo tikusambilira Baibolo na buku la Baibolo Likusambizgaci panji buku linyake lililose. Kasi tingagaŵira wuli mathirakiti nyumba na nyumba? Pakuti tikuŵa na mathirakiti gha mitu ghakupambanapambana, tikwenera kughamanya makora agho tili nagho.
5. Kasi tingagaŵira wuli mathirakiti kunyumba na nyumba?
5 Tingasintha upharazgi kuyana na cigaŵa cithu kweniso mutu wa thirakiti ilo tikugaŵira. Tingamba kudumbirana na munthu para tamupa thirakiti. Munthu wangakopeka na vithuzithuzi vyakutowa ivyo vili pa thirakiti. Panji tingamulongora mathirakiti ghanandi kuti wasankhepo ilo lamukondweska. Usange mu cigaŵa cinu ŵanthu ŵakukhumba yayi kufumira kuwaro, tingaŵalongora thirakiti, panji kuŵapempha kuti tinjizge kusi ku cijaro na kuŵafumba kuti ŵayowoyepo maghanoghano ghawo. Usange mutu wa thirakiti ilo tikugaŵira ni fumbo, tingamupempha kuti wayowoyepo maghanoghano ghake. Panji tingafumba fumbo ilo wanganweka nalo kuti tambe kudumbiskana nayo. Tingaŵazga nayo fundo zicoko waka mu thirakiti, ndipo apo pali fumbo tingamupempha kuti wayowoyepo. Tingaŵazga mu Baibolo malemba agho ghakukhozgera nkhani iyo. Para tadumbiskana fundo zinyake za mu thirakiti, tingapangana dazi na nyengo kuti tizakizeso. Usange mu mpingo winu mukuleka mabuku pa nyumba apo palije ŵanthu, mungaŵika thirakiti pa malo apo ŵanthu ŵanyake ŵangaliwona yayi.
6. Kasi tingagaŵira wuli mathirakiti mu msewu?
6 Kugaŵira mu Msewu: Kasi muli kugaŵirapo mathirakiti mu msewu? Ŵanyake ŵakuŵa kuti ŵakucimbilira ndipo ŵakukhumba yayi kuŵayimika kuti tidumbiskane nawo. Nchakusuzga kumanya usange mbakunweka nadi. M’malo mwakuŵapa magazini uku tikumanya yayi kuti ŵamuŵazga, cingaŵa makora kuŵagaŵira waka mathirakiti. Pakuti vithuzithuzi vikuŵa vyakutowa ndiposo uthenga ukuŵa wakudumura, ŵanthu ŵanganweka kuŵazga thirakiti nanga ŵangaŵa na nyengo yicoko. Kweni para ŵakucimbilira yayi, tingadumbiskana nawo fundo zinyake za mu thirakiti.
7. Yowoyani vyakucitika ivyo vikulongora umo tingagaŵira mathirakiti palipose apo mwaŵi wasangikira.
7 Pharazgani Palipose Apo Mwaŵi Wasangikira: Nchipusu kupharazga na mathirakiti palipose apo mwaŵi wasangikira. Mubali munyake wakuyegha mathirakiti mu thumba para wakufumapo. Usange wakumana na munthu, wakumufumba usange wangatemwa kuti wamupe cakuti waŵazgenge. Para wazomera wakumupa thirakiti. Apo mbumba yinyake yikaluta ku Msumba wa New York kukatembeya, yikamanya kuti ŵamukumana na ŵanthu ŵakufuma ku vyaru vinandi. Ntheura, ŵakayegha kabuku ka Makani Ghawemi ku Ŵanthu ŵa Mitundu Yose na mathirakiti gha viyowoyero vinandi. Ndipo para ŵapulika munthu wakuyowoya mu ciyowoyero cinyake, kwali ni uyo wakuguliska vinthu mumphepete mwa msewu, panji uyo ŵakhala nayo pafupi ku malo ghakucezgera, panji ku resitiranti, ŵakamugaŵiranga thirakiti mu ciyowoyero cake.
8. Kasi mathirakiti ghali nga ni mbuto pa fundo wuli?
8 “Seŵa Mbuto Yako”: Mathirakiti ghali nga ni mbuto. Mulimi wakuseŵa mbuto zinandi cifukwa wakumanya yayi iyo yimelenge. Lemba la Mupharazgi 11:6 likuti: “Seŵa mbuto yako namacerocero ndipo na mise ungapumuzganga woko lako; pakuti ulije kumanya izo zitisakatenge, panji izi, panji izo, panji zose ziŵiri wuwo zitiŵenge ziwemi kwakulingana.” Mwantheura, tilutilire kuseŵa “mahara” na mathirakiti agho ngakovwira comene pakupharazga. (Zinth. 15:7)
[Mazgu Ghakukhozgera pa peji 3]
Pakuti mathirakiti ngakovwira pakupharazga, myezi yinandi tizamugaŵiranga mathirakiti kwamba mu Novembala.