Yowoyani Vyakuti Ŵanyinu Ŵapulikiske

vPENEAPO mukuyowoya, ni vinandi ivyo mukwenera kucita. Yezgayezgani kuyowoya mu ntowa yakuti ŵategherezgi ŵapulikiske ivyo mukuyowoya. Kacitiro aka kangamovwirani kuti ivyo mukuyowoya viŵe vyakupulikikwa makora, kwali mukuyowoya mu mpingo panji kwa ŵantu awo Mbakaboni yayi.

Pali maurongozgi ghanandi gha umo mungayowoyera mwakupulikikwa. Ghanji mwa igho ghakonkoskeka mu Sambiro 26, “Kupatawula Nkani Mwandondomeko Yiweme.” Ndiposo ghanji ghali mu Sambiro 30, “Rongorani Kukondweskeka mwa Munyinu.” Mu sambiro lino, tidumbiranenge urongozgi ucoko waka wakusazgirapo.

Mazgu Ghapusu, Kayowoyero Kapusu. Mazgu ghapusu ndiposo masentensi ghafupi vikupangiska kuti ivyo mukuyowoya vipulikikwe makora comene. Upharazgi wa pa Lupiri wa Yesu nciyerezgero ciweme comene ca umo nkani yingayowoyekera kuti ŵantu ŵayipulikiske, kwali ni muntu wa mtundu wuli panji wakukhala nkuni. Mutepanji fundo izo zikayowoyeka zikaŵa zacilendo kwa iwo. Ndipouli, iwo ŵakwenera kuti ŵakapulikiska ivyo Yesu wakayowoya cifukwa cakuti wakazunura vintu ivyo vikukhwaska ise tose: umo tingaŵira ŵacimwemwe, umo tingakuliskira ubwezi na ŵanji, umo tingacepeskera kwenjerwa, ndiposo umo tingaŵira na umoyo wacandulo. Ndipo iye wakarongosora fundo zake mu mazgu ghapusu comene. (Mat., vipaturo 5-7) Mwanadi, Baibolo liri na viyerezgero vinandi vya masentensi ghakupambana-pambana, utali na kalembero kake. Cilato cinu cikwenera kuŵa cakuti muyowoye fundo zinu mwakupulikikwa makora.

Nanga pangaŵa apo mukudumbiskana nkani yakusuzga kuyipulikiska, kuyowoya mwantowa yipusu kungapangiska ivyo mukuyowoya kuti vipulikikwe luŵiro. Kasi ni mwauli umo mungayowoyera mwaupusu? Lekani kuŵaphalira ŵategherezgi ŵinu fundo zinandi zambura kukhumbikwira. Linganizgani makora nkani yinu kuti fundo zinu zikuru zipulikikwe makora. Sankani makora malemba agho ngakukhumbikwa comene. M’malo mwakuŵazga waka lemba na kuruta pa linyake, ŵazgani malemba mwakuzikira na kurongosora fundo makoraghene. Tceŵani kutondeska fundo kuti yimanyikwe makora cifukwa ca kuyowoya mazgu ghanandi.

Para mukucitiska sambiro la Baibolo la panyumba, rondezgani maurongozgi agha. Lekani kurongosora vyose ivyo mwaŵazga. Movwirani musambiri kuti wapulikiske makoraghene fundo zikuru. Pa nyengo ya sambiro lake na pa maungano gha mpingo wangasambira fundo zinyake zinandi.

Kuti muyowoye nkani mwakupulikikwa makora, mukwenera kunozgekera makoraghene. Mukwenera kuyipulikiska makora nkani yinu, apo ndipo pekha ŵanji nawo ŵangakayipulikiska makora. Usange cintu cinyake mwacimanya makora, cikuŵa cipusu kucirongosora umo cintu ico ciliri. Mungarongosora mu mazgu ghinu na ghinu.

Rongosorani Mazgu Ghacilendo. Kuti ŵategherezgi ŵinu ŵapulikiske makora ivyo mukuyowoya, nyengo zinyake cikukhumbikwira kuti murongosore mazgu agho ngacilendo kwa iwo. Lekani kughanaghanira ŵategherezgi ŵinu kuti ŵakumanya vinandi, kweniso lekani kuŵaghanaghanira kuti ŵalije vinjeru. Cifukwa cakuti mwasambira Baibolo, nyengo zinyake mungayowoya mazgu agho ngacilendo ku ŵanji. Kwambura kurongosora, ŵantu awo ŵakuŵamanya makora yayi Ŵakaboni ŵa Yehova ŵangamanya yayi kuti mazgu ghakuti “ŵakukhalira,” “muzga wa magomezgeko na wa vinjeru,” “mberere zinyake,” na “mzinda ukuru” ghakuyowoya za gulu la ŵantu. (Rom. 11:5, NW; Mat. 24:45; Yoh. 10:16; Civ. 7:9) Mwakuyana waka, para muntu wakulimanya yayi gulu la Ŵakaboni ŵa Yehova, iye wangamanya yayi ng’anamuro la mazgu ghakuti “mupharazgi,” “mupayiniya,” “mulaŵiliri wa dera,” na “Cikumbusko.”

Pali mazgu ghanyake gha mu Baibolo agho ghakukhumbikwira kugharongosora nangauli ŵantu awo Mbakaboni ŵa Yehova yayi ŵakughamanya. Ŵantu ŵanandi ŵakughanaghana kuti mazgu ghakuti “Haramagedoni” ghakung’anamura kukomeka kwa ŵantu ŵanandi na virwero vyakofya. Iwo ŵangaghanaghana kuti “Ufumu wa Ciuta” wuli mu mtima wa muntu, panji ukung’anamura kucanya, panjiso kuti ni boma yayi. Mazgu ghakuti “mzimu” kwa iwo ghakung’anamura kuti ncigaŵa ca muntu ico cikuleka kufwa para iye wafwa. Mwakuyana na ivyo ŵantu mamiliyoni ghanandi ŵasambizgika, “mzimu utuŵa” ni muntu, uli cigaŵa ca cisambizgo ca utatu. Cifukwa cakuti ŵantu ŵanandi comene ŵaleka kurondezga vipimo vya mu Baibolo vya kakhaliro, iwo ŵakwenera kupulikiska makora ivyo Baibolo likung’anamura peneapo likuti: “Cimbirani uzaghali.”—1 Kor. 6:18.

Pekha usange ŵantu ŵakutemwa kuŵazga Baibolo, iwo ŵangamupulikirani mpuvya usange mungayowoya waka kuti, “Paulos wakalemba kuti . . . ” panji “Luka wakayowoya kuti . . . ” Mutepanji iwo ŵali na mabwezi panji ŵazengezgani awo ŵali na mazina agho. Mukwenera kurongosora makora kuti muntu uyo mukuyowoya ni mpostole Wacikristu panji mlembi wa Baibolo.

Ŵantu ŵa mazuŵa ghano ŵakwenera kuwovwirika kuti ŵapulikiske malemba agho ghali na mweso wa vintu panji mitheto yinyake ya mwaka. Mwaciyerezgero, mbantu ŵacoko comene awo ŵangamanya mazgu ghakuti cingaraŵa ico wakazenga Nowa mu utali cikaŵa mikono makumi-kumi ghatatu, usani wake cikaŵa mikono makumi ghankonde, ndipo msinku wake ukaŵa mikono makumi ghatatu. (Gen. 6:15) Usange mungazunura miyeso iyi mu vyakupimira vya mazuŵa ghano, mbwenu ŵategherezgi ŵinu ŵangawona umo cingaraŵa cira cikaŵira cikuru.

Rongosorani Mwakwenelera. Kuti ŵategherezgi ŵinu ŵapulikiske fundo, ni vinandi ivyo mukwenera kucita kuruska kuyowoya waka ng’anamuro la lizgu. Ku Yerusalemu mu nyengo ya Ezra, ŵakaŵazganga Dango ndipo pamanyuma pake ŵakarongosoranga ivyo ŵakaŵazganga. Kuti ŵawovwire ŵantu kuti ŵapulikiske ng’anamuro lake, Ŵalevi ŵakapatawulanga na kurongora umo cimanyisko ca mu Dango cikeneranga kugwiriskirika ncito, ndipo ŵakacita nteura mwakuyana na umo ukaŵira ukhaliro wa ŵantu pa nyengo yira. (Neh. 8:8, 12) Mwa kuyana waka, imwe namwe rongosorani makoraghene na kurongora candulo ca malemba agho mwaŵazga.

Pamanyuma pa nyifwa na kuwuka kwake, Yesu wakaphalira ŵasambiri ŵake kuti ico cikacitika pa nyengo yira cikarongora kufiskika kwa Malemba. Iye wakaŵadidimizgira fundo yakuti ŵaŵe ŵakaboni ŵa vintu ivyo vikacitika. (Luka 24:44-48) Para mungaŵawovwira ŵantu kuti ŵamanye kuti ivyo ŵasambira vikwenera kukhwaska umoyo wawo, mbwenu iwo ŵangamanya makoraghene ng’anamuro la ivyo ŵasambira.

Mtima Ukunjizgikamo. Mwanadi, nangauli mungayowoya mwakupulikikwa makora, paliso vintu vinyake ivyo vingacitiska kuti yunji wapulikiske panji yayi. Usange mtima wa muntu ngwakudindiŵara, ici cikuŵa cakujandizga kuti wamanye ng’anamuro la ivyo vyayowoyeka. (Mat. 13:13-15) Kwa ŵantu awo nyengo zose ŵakuwona vintu mwakuthupi, kwa iwo vintu vyauzimu vikuŵa vyaucindere. (1 Kor. 2:14) Usange muntu warongora mtima wanteura uwo, cingaŵa ciweme kulekezga cidumbirano—mungazakayezgaso kuntazi.

Ndipouli, nyengo zinyake muntu wangatondeka kutegherezga cifukwa cakuti wali na masuzgo. Usange muntu wanteura uyo mungazakamupharazgiraso kuntazi, nyengo zinyake wangazakategherezga. Peneapo Yesu wakaphalira ŵapostole ŵake kuti wamuthyapulika na kukomeka, iwo ŵakapulikiska yayi ivyo iye wakayowoyanga. Cifukwa wuli? Ncifukwa cakuti iwo ndimo ŵakaghanaghaniranga na kukhumbira yayi! (Luka 18:31-34) Ndipouli, pamanyuma pake, ŵapostole ŵake 11 ŵakapulikiska, ndipo ŵakarongora kuti ŵapulikiska nadi mwa kucita mwakukolerana na umo Yesu wakaŵasambizgira.

Uweme wa Nkaro Yiweme. Ŵantu kuti ŵakovwirika kumanya vintu na mazgu ghithu pera yayi, kweniso na nkaro yithu. Pakuyowoya za ulendo wawo wakwamba wa ku Nyumba ya Ufumu, ŵantu ŵanandi ŵakuyowoya kuti, ŵakukumbukira citemwa ico ŵakaciwona, kuti ivyo vikayowoyeka pera yayi. Mwakuyana waka, citemwa ico tikurongora cawovwira ŵeneko nyumba ŵanandi kusambira unenesko. Cifukwa ca kuwona citemwa cikuru ico ŵantu ŵa Yehova wakurongora kwa yumoza na munyake mu nyengo za masuzgo, ŵantu ŵanandi ŵayowoya kuti Ŵakaboni ŵa Yehova ŵali mu cisopo caunenesko nadi. Anteura, peneapo mukovwira ŵantu kumanya unenesko wa mu Baibolo, ŵaphalirani mwakupulikikwa makora ndiposo nkaro yinu yikwenera kuŵa yiweme yakukopa ŵantu.