Mazgu gha Yehova Ngamoyo
Fundo Zikuru za m’Buku la Malaki
PAKAJUMPHA vilimika 70 kufuma apo mulimo wa kuzenga tempele mu Yerusalemu ukamalira. Nangauli vikaŵa ntheura, Ŵayuda ŵakawelera nyuma mwauzimu mukuluta kwa nyengo. Nanga ni ŵaphristi ŵakamba kucita vinthu mwambura kugomezgeka. Kasi ni njani uyo wakate waŵaphalirenge ubudi wawo na kuŵawovwira kuti ŵasendelere kwa Ciuta? Yehova wakapeleka mulimo uwu kwa mprofeti Malaki.
Buku laumaliro ku Malemba gha Cihebere, ilo likalembeka na Malaki, liri na ucimi wankhongono wakupelekeka na Ciuta. Para tipulikirenge mazgu gha ucimi gha Malaki, tovwirikenge kuti tiŵe ŵakunozgekera “zuŵa likuru na lakofya la Yehova,” apo mgonezi wuno uzamumalira.—Malaki 4:5.
ŴAPHRISTI ‘ŴAKAWISKA ŴANANDI’
Yehova wakayowoya maghanoghano ghake ku Ŵaisrayeli apo wakati: “Ndamutemwani.” Kweni ŵaphristi ŵakayuyura zina la Ciuta. Mwawuli? ‘Mwa kupeleka cingwa cakufipirwa pa jochero lake’ na kupeleka cakuŵeta “cakupunduka panji cakulwara” kuŵa sembe.—Malaki 1:2, 6-8.
Ŵaphristi ‘ŵakawiska ŵanandi mu dango.’ Ŵanthu ŵakaŵa “ŵambura magomezgeka yumo ku munyake.” Ŵanji ŵakatora ŵanakazi awo ŵakaŵa Ŵayuda yayi. Ŵanji ŵakaleka kugomezgeka ku “muwoli wa uphya [wawo].”—Malaki 2:8, 10, 11, 14-16.
Mafumbo gha m’Malemba Ghazgoreka:
2:2—Kasi Yehova “wakatemba wuli vitumbiko” vya ŵaphristi awo ŵakatondeka kudemelera ku dango lake? Ciuta wakacita ici mu nthowa yakuti vitumbiko ivyo ŵaphristi ŵakalombanga vikaŵanga nthembo.
2:3—Kasi “kuphaka ulongwe” pa visko vya ŵaphristi” kukang’anamurangaci? Mwakuyana na dango, ulongwe wa ciŵeto ico cikapelekekanga sembe ukeneranga kukawocheka kuwaro kwa msasa. (Leviticus 16:27) Kuphaka ulongwe pa visko vya ŵaphristi kukang’anamuranga kuti Yehova wakana kupokera sembe ndiposo kuti awo ŵakapelekanga sembe ŵakaŵa ŵambura kwenelera kwa iyo.
2:13—Kasi jochero la Yehova likazura na masozi gha njani? Agha ghakaŵa masozi gha ŵawoli awo ŵakizanga ku malo ghatuŵa mu tempele kuti ŵaŵeyelere kwa Yehova. Kasi nchivici ico cikaŵacitiska citima nthena? Ŵafumu ŵawo Ŵaciyuda ŵakaŵapatanga pa vifukwa vyambura kupulikikwa, kuti ŵatore ŵamwali ŵambura kusopa Ciuta.
Ivyo Tikusambirapo:
1:10. Yehova wakakondweskekanga yayi na sembe izo zikapelekekanga na ŵaphristi ŵaryezi, awo ŵakalipiskanga ŵanthu nanga ni para ŵacita milimo yicokoyicoko nga ni kujala vijaro panji kupemba moto pa jochero. Nchakuzirwa comene kuti ticitenge milimo yithu ya kusopa Ciuta, yeneiyo yikusazgapo ivyo tikucita mu uteŵeti Wacikhristu, mwakukhuŵilizgika na kutemwa nadi Ciuta ndiposo mzengezgani. Tileke kucita nthena kuti tisange candulo cakuthupi.—Mateyu 22:37-39; 2 Ŵakorinte 11:7.
1:14; 2:17. Yehova wakutinkha upusikizgi.
2:7-9. Awo ŵapika mulimo wa kusambizga mu mpingo, ŵakwenera kuwoneseska kuti ivyo ŵakusambizga ni vyakukolerana na Mazgu gha Ciuta, agho ni Malemba Ghakupatulika, na mabuku agho ghakulongosora Baibolo gha “mulinda mulara wa magomezgeko.”—Luka 12:42; Yakobe 3:11.
2:10, 11. Yehova wakukhumba kuti ŵanthu awo ŵakumusopa ŵawonenge ulongozgi wa kutora panji kutengwa “mu Fumu pera” kuŵa wakuzirwa.—1 Ŵakorinte 7:39.
2:15, 16. Ŵasopi ŵaunenesko ŵa Yehova ŵakuzirwiska comene phangano la nthengwa ilo ŵapangana na muwoli wa uphya wawo.
‘FUMU YITI YIZE MU TEMPELE LAKE’
‘Fumu [Yehova Ciuta] yiti yize mwamabuci mu tempele lake’ pamoza na “thenga la phangano [Yesu Khristu].” Ciuta ‘wasendelere pafupi kwa [ŵanthu ŵake] mu kweruzga’ na kuŵa kaboni waluŵiro kususka ŵaheni wose. Fundo yinyake njakuti awo ŵakopa Yehova ŵakulembeka mu “buku la cikumbusko.”—Malaki 3:1, 3, 5, 16.
Zuŵa “lakocha nga ndi ng’anjo” likwiza ndipo lizamumara ŵaheni wose. Pambere zuŵa ili lindize, mprofeti watumikenge kuti ‘wazgore mitima ya ŵawiskewo ku ŵana ŵawo na mitima ya ŵana ku ŵawiskewo.”—Malaki 4:1, 5, 6.
Mafumbo gha m’Malemba Ghazgoreka:
3:1-3—Kasi mphawuli apo “Fumu” na “thenga la phangano” ŵakiza ku tempele, ndipo ni njani uyo wakatumika panthazi zawo? Kwizira mwa mwimiliri wake, Yehova wakiza ku tempele na kulitozga pa Nisani 10, 33 C.E. Iyi, yikaŵa nyengo iyo Yesu wakanjira mu tempele na kufumiska awo ŵakasaskanga malonda na awo ŵakagulanga. (Marko 11:15) Ivi vikacitika pati pajumpha vilimika vitatu na hafu kufuma apo Yesu wakaphakazgikira kuŵa Fumu Yakusolekerathu. Ntheura, kukawoneka kuti vilimika vitatu na hafu pamanyuma pa kuŵa Themba kucanya, Yesu wakalongozgana na Yehova ku tempele lauzimu na kusanga kuti ŵanthu ŵa Ciuta ŵakakhumbikwiranga kutozgeka. Mu nyengo ya Ŵakhristu ŵakwambilira, Yohane Mbapatizi wakatumika kuti wanozgekereske Ŵayuda za kwiza kwa Yesu Khristu. Lero napo, thenga likatumika mwakutendekera kuti linozge nthowa ya Yehova pakwiza ku tempele lake lauzimu. Kuuyambiro kwa vilimika vya m’ma 1880, gulu la ŵasambiri ŵa Baibolo likamba kusambizga ŵanthu ŵawemi mtima unenesko wa mu Baibolo.
3:10—Kasi kwiza kwa Yehova na “cigaŵa ca vyakhumi vyose,” panji cakhumi kukung’anamura kuti munthu wajipeleke yose wamusuma kwa Yehova? Dango ilo Ciuta wakapangana na Mozesi likamara na nyifwa ya Yesu, ntheura kupeleka cakhumi ca ndalama zithu nkhwakukhumbikwa yayi kuti munthu waŵe wakwenelera kusopa Ciuta. Ndipouli, cakhumi cikimiranga cinthu cinyake. (Ŵaefeso 2:15) Cikimiranga kuti munthu wajipeleke yose wamusuma kwa Yehova yayi. Cigaŵa cakhumi cikapelekekanga cilimika cilicose, kweni ise tikujipeleka ŵamusuma kwa Yehova kamoza pera. Tikucita nthena panyengo iyo tikujipatulira kwa Yehova na kubapatizika. Kufuma panyengo iyo tabapatizikira, vyose ivyo tili navyo vikuŵa vya Yehova. Ndipouli, wakutizomerezga kusankha cigaŵa ca ivyo tili navyo, ico nchakhumi cakuyelezgera, kuti tigwiliskire nchito mu uteŵeti wake. Ni cilicose ico ukhaliro withu wazomerezga ndiposo mtima withu waticiska kuti tigwiliskire nchito. Sembe izo tikupeleka kwa Yehova zikusazgapo nyengo, nkhongono, na vinthu vinyake ivyo vikugwiliskirika nchito pa mulimo wa kupharazga Ufumu, na kusambizga ŵanthu kuŵa ŵasambiri. Kweniso vinyake ivyo vikusazgikapo ni kusangika pa maungano Ghacikhristu, kukawona ŵalwari, na ŵacekuru awo mbasopi ŵanyithu, ndiposo kupeleka ndarama zakovwira pa kusopa kwaunenesko.
4:3—Ni mwawuli umo ŵasopi ŵa Yehova ‘ŵamkukandira pasi ŵaheni’? Ŵanthu ŵa Ciuta pa caru capasi, kuti ‘ŵazamukandira nadi pasi ŵaheni,’ ndiposo kuŵeruzga yayi. M’malo mwake, ivi vikulongora kuti ŵateŵeti ŵa Yehova ŵa pa caru capasi ŵazamucita nthena mwakuyelezgera, peneapo ŵazamuŵa ŵakukondwa apo caru ca Satana cizamumalira.—Salmo 145:20; Civumbuzi 20:1-3.
4:4—Cifukwa wuli tikwenera ‘kukumbuka dango la Mozesi’? Ŵakhristu ŵali pasi pa dango la Mozesi yayi, ndipouli, likaŵa “muzgezge wa vinthu vya mwenejuzi.” (Ŵahebere 10:1) Kuŵikako pwelelero ku Dango ilo Ciuta wakapangana na Mozesi, kungatovwira kuwona umo ivyo vili kulembeka mu dango ili vikufiskikira. (Luka 24:44, 45) Nakuti Dango ili liri na “vikozgo vya vinthu vya kucanya.” Kusambira za Dango ili nkhwakuzirwa comene usange tikukhumba kupulikiska visambizgo vya Cikhristu ndiposo umo tikwenera kucitira vinthu.—Ŵahebere 9:23.
4: 5, 6—Kasi “Eliya nchimi” wakwimira njani? Kukayowoyekerathu kuti “Eliya” wazamucita mulimo wa kuwezgerapo, uwo nkhunozgekereska mitima ya ŵanthu. Mu nyengo ya Ŵakhristu ŵakwambilira, Yesu Khristu wakazunura Yohane Mbapatizi kuti ni “Eliya.” (Mateyu 11:12-14; Marko 9:11-13) Eliya wa mu mazuŵa ghano, wakutumika “zuŵa likuru na lakofya la Yehova licali lindize.” Lero, Eliya ni “muzga wa magomezgeko na wa vinjeru.” (Mateyu 24:45) Gulu la Ŵakhristu ŵakuphakazgika likovwira ŵanthu kuti ŵawezgelepo ubwezi wawo na Yehova.
Ivyo Tikusambirapo:
3:10. Usange tikutondeka kucitira Yehova vyose ivyo tingafiska, tikupangiska kuti waleke kutitumbika.
3:14, 15. Cifukwa ca ciyelezgero ciheni ca ŵaphristi, Ŵayuda ŵakamba kuwona uteŵeti wawo kwa Ciuta kuŵa wakuzirwa pacoko. Awo ŵali na mulimo mu mpingo Wacikhristu ŵakwenera kuŵa ciyelezgero ciwemi.—1 Petros 5:1-3.
3:16. Yehova wakulemba mazina gha awo ŵakumopa ndiposo kugomezgeka kwa iyo. Wakuŵakumbuka ndipo wazamuŵasunga ŵamoyo apo wazamuparanya caru ca Satana ici. Ntheura, tiyeni tileke kuwelera nyuma pa kugomezgeka kwithu kwa Ciuta.—Job 27:5.
4:1. Mu zuŵa ilo waliyose wamkujipatawulira kwa Yehova, vinthu ivyo vizamucitikira “munthavi” ndivyo vizamucitikira na “musisi” wuwo, kung’anamura kuti ŵana ŵazamupokera cilango cakuyana waka na ca ŵapapi ŵawo. Ni mulimo ukuru comene uwo ŵapapi ŵali nawo ku ŵana ŵawo. Ŵapapi Ŵacikhristu ŵakwenera kufwilirapo kuti ŵaŵe ŵakwenelera pamaso pa Yehova.—1 Ŵakorinte 7:14.
“Muwope Ciuta” Waunenesko
Kasi mbanjani awo ŵazamuponoskeka pa “zuŵa likuru na lakofya la Yehova”? (Malaki 4:5) Yehova wakuti, “kwa imwe mukopa zina lane dazi la urunji lamkufuma, liri na kupozga mu mapapindo ghake. Mwamkufuma na kudukaduka ngati zingwata kufuma mu lukutu.”—Malaki 4:2.
“Dazi la urunji,” ilo ni Yesu Khristu, likuŵara pa ŵanthu awo ŵakopa zina la Ciuta, ndipo Yehova wakukondweskeka nawo. (Yohane 8:12) Kwa iwo, kuliso ‘kupozga mu mapapindo ghake,’ pasono mwauzimu ndipo mwakuthupi mu caru ciphya ca Ciuta. (Civumbuzi 22:1, 2) Mwakukondwa, ŵakucita vinthu nga ni “zingwata kufuma mu lukutu.” Pakuti vitumbiko vyose ivi vikutilindilira, tiyeni tipulikire ulongozgi wa Themba Solomoni wakuti: “Muwope Ciuta, na kusunga malango ghake, cifukwa ici ndico mulimo wose wa munthu.”—Mupharazgi 12:13.
[Cithuzithuzi pa peji 28]
Mprofeti Malaki wakaŵa muteŵeti wamwamphu ndiposo wakujipereka wa Ciuta
[Cithuzithuzi pa peji 31]
Ivyo tikusambizga viyanenge na ivyo vili mu Baibolo
[Cithuzithuzi pa peji 31]
Ŵateŵeti ŵa Yehova ŵakucindika phangano la nthengwa