SAMBIRO 2

Nthowa Yakudumbiskana

2 Ŵakorinte 2:17

FUNDO YIKURU: Yowoyani mwakawiro, munthowa iyo yingalongora umo mukujipulikira na nkhani iyo mukuyowoya kweniso umo mukuwonera ŵategherezgi ŵinu.

Lombani na kunozgekera makora. Lombani Yehova kuti wamovwirani kuti muleke kufipa mtima chomene, kweni kuti muŵike maghanoghano ghinu pa uthenga uwo mwamuyowoya. Manyiranithu fundo zikuru izo mukukhumba kuyowoya. Lekani kuyowoya fundo izi nga umo zalembekera mu buku; kweni yowoyani mu mazgu ghinu na ghinu.

Para mwamuŵazga Baibolo panji buku linyake, mukwenera kuyimanya makora nkhani yose kuti mukaŵazge mwambura kugotagota. Para mukuŵazga mazgu agho ghakayowoyeka na munthu munyake, ŵazgani kuyana na umo mwenecho wakajipulikiranga, kweni mungataluliranga yayi.
Yowoyani kufuma mu mtima. Ghanaghanirani chifukwa icho ŵategherezgi ŵakwenera kupulika uthenga uwu. Lazgirani ku ŵategherezgi ŵinu. Para mwachita nthena, umo mwayimira, umo mukuchitira na thupi linu, kweniso chisko chinu, vilongorenge kuti mukuyowoya unenesko ndipo muli ŵaubwezi.

Kuyowoya mwakawiro kukupambana chomene na kuyowoya mwambura kupwelerako. Yowoyani mazgu ghakupulikikwa makora na ghakwenelera kuti ŵanthu ŵachindike uthenga winu.
Laŵiskani ŵategherezgi ŵinu. Ŵalaŵiskani para ntchakuzomerezgeka mu chigaŵa chinu. Para mukuyowoya nkhani, laŵiskani munthu yumoza pa nyengo yimoza, m’malo mwa kwendeska waka maso pa wose nyengo yimoza.