Mulimo Wakusuzga Chomene Uwo Ukachitika Chifukwa cha Mzimu Utuŵa

Kwamba kale, ŵateŵeti ŵa Chiuta ŵakufiska kuchita vinthu vikuru na nkhongono zawo yayi, kweni na wovwiri wa Yehova. Mu 1954, gulu la Yehova likafumiska filimu ya mutu wakuti Ivyo Vikuchitika ku Likuru Lithu. Filimu iyi chomene yikapangika na ŵabali awo ŵakateŵeteranga pa Beteli, nangauli ŵakaŵa kuti ŵandapangepo mafilimu. Mzimu utuŵa wa Yehova ndiwo ukawovwira kufiska mulimo wakusuzga uwu. Ivi vikutipa chigomezgo chakuti para tikuthemba Yehova, nase tingafiska mulimo uliwose uwo tingapika.—Zek 4:6.

WONELERANI VIDIYO YA MUTU WAKUTI, KUPANGA FILIMU YAKUKHWASKANA NA “IVYO VIKUCHITIKA KU LIKURU LITHU,” NDIPO PAMANYUMA ZGORANI MAFUMBO AGHA:

• Chifukwa wuli ŵabali ŵakadumura kuti papangike filimu yakukhwaskana na likuru lithu la pa charu chose?

• Kasi filimu iyi yikalongora wuli kuti Beteli yili nga ni thupi la munthu?—1Ko 12:14-20

• Kasi ŵabali ŵakakumana na masuzgo wuli apo ŵakapanganga filimu iyi, ndipo ŵakaghatonda wuli masuzgo agha?

• Kasi nkhani iyi yikutisambizga vichi za mzimu utuŵa wa Yehova?