Maliferensi gha “Uteŵeti na Umoyo Wachikhristu—Kabuku ka Maungano”

Maliferensi gha Uteŵeti na Umoyo Wachikhristu—Kabuku ka Maungano

MALICHI 4-10

Ivyo Tasambira

it-2-E 714

Mboni

Mazgu Ghachihebere agho ghali kung’anamurika kuti mboni (Do 32:10; Zi 7:2) para kwasazgika mazgu ghakuti jiso, ghakung’anamura “kamunthu ka mu jiso.” Mwakuyana waka, pa lemba la Chitengero cha Yeremiya 2:18 pakuyowoya za “mwana msungwana wa jiso,” ndipo mazgu ghose ghaŵiri agha ghakuyowoya za mboni. Pa lemba la Salimo 17:8 mazgu ghaŵiri agha ghali kusazgika pamoza, mazgu ghakuti “kamunthu,” na ghakuti “mwana msungwana wa jiso.” Baibolo likugwiliskira ntchito mazgu agha chifukwa para walaŵiska mu jiso la munyako ukuwona kamunthu panji kachithuzi ka iwe wamwene mu jiso la munyako.

Jiso likumanya luŵiro chomene para mwawira kanthu; nanga mungawira kasisi panji vyuvyu. Jiso lili na kanthu nga nkhagilasi ako kakubenekelera mboni ndipo kakwenera kuvikilirika chomene na kupwelelereka, chifukwa usange kapwetekeka panji kukoreka na matenda, munthu wangaleka kuwona. Para Baibolo likuyowoya za chinthu icho chikwenera kuvikilirika panji kupwelelereka chomene likugwiliskira ntchito mazgu ghakuti “mboni ya jiso lako.” Dango la Chiuta nalo ndimo tikwenera kuliwonera. (Zi 7:2) Pakuyowoyapo umo Chiuta wakapweleleranga Ŵaisrayeli nga ni dada, lemba la Dotoronome 32:10 likuti wakasungilira mtundu uwu “nga ni mboni ya jiso lake.” Davide wakalomba Chiuta kuti wamupwelelere kweniso kumuvikilira ‘nga ni mboni ya jiso lake.’ (Sa 17:8) Iyo wakakhumbanga kuti Yehova wachitepo kanthu mwaluŵiro kuti wamuvikilire apo ŵalwani ŵake ŵakamuwukira. (Yaniskani na Zek 2:8; apo ŵakagwiliskira ntchito mazgu Ghachihebere agho mu Chitumbuka ghakung’anamura kuti “jiso.”)—Wonani EYE.

MALICHI 11-17

MAZGU GHA CHIUTA MBUSAMBAZI | SALIMO 18

“Yehova Ni . . . Muthaski Wane”

it-2-E 1161 ¶7

Mazgu

Chiuta wakutegherezga mazgu gha ŵateŵeti ŵake. Ŵanthu awo ŵakuteŵetera Chiuta mu mzimu na mu unenesko, ŵangalomba kwa Yehova na chigomezgo chose kuti wakupulika mazgu ghawo mwambura kupwelelerako chiyowoyero icho ŵakuyowoya. Nanga mazgu ghithu ghangaleka kupulikikwa apo tikulomba, Chiuta wakumanya mitima ya ŵanthu ndipo wakutipulika kweniso kuŵikako mahara ku ivyo tikuyowoya. (Sa 66:19; 86:6; 116:1; 1Sa 1:13; Ne 2:4) Chiuta wakupulika para ŵanthu ŵakuyuzgika ŵakumulilira kuti waŵawovwire. Kweniso wakupulika mazgu gha ŵakususka, vilato na viŵembu ivyo ŵakunozgera ŵateŵeti ŵake.—Ge 21:17; Sa 55:18, 19; 69:33; 94:9-11; Yer 23:25.

Ivyo Tasambira

it-1-E 432 ¶2

Kerubi

Ŵakerubi ŵakukhala pafupi na Yehova: “Ine nizamuwonekera kwa iwe na kuyowoya nawe kufumira pachanya pa chibenekelero. Kufuma pakati pa ŵakerubi ŵaŵiri awo ŵali pa likasa la Ukaboni.” (Ek 25:22; Maŵ 7:89) Ntheura Yehova wakuyowoyeka kuti “wakukhala pachanya [panji kuti pakati] pa ŵakerubi.” (1Sa 4:4; 2Sa 6:2; 2Ma 19:15; 1Mi 13:6; Sa 80:1; 99:1; Yes 37:16) Ŵakerubi ŵakimiranga “chikozgo cha gileta” ilo Yehova wakakwera (1Mi 28:18), ndipo mapapindo gha ŵakerubi ghakagwiranga ntchito yakuvikilira kweniso kovwira kuti gileta lendenge luŵiro. Ntheura mu sumu iyo Davide wakimba, wakalongosora za umo Yehova wakiziranga mwaluŵiro chomene kuti wamovwire, nga munthu uyo wakwera pa kerubi ndipo ‘wakuduka pakwiza’ kweniso wali “pa mapapindo gha mzimu.”—2Sa 22:11; Sa 18:10.

Ivyo Tasambira

it-1-E 1073

Chihebere, II

Pakulemba mapowemu Ghachihebere, mazgu agho ghayowoyeka yakukhozgera waka fundo yakwamba yayi, panji kususkana nayo, kweni ghakusazgirapo fundo yinyake pa iyo yayowoyeka. Lemba la Salimo 19:7-9 ndilo ntchiyelezgero chiwemi pa nkhani iyi:

Dango la Yehova ndakufikapo,

likuwezgeramo nkhongono.

Vikumbusko vya Yehova ni vyakugomezgeka,

muzeleza vikumuzgora wavinjeru.

Malanguro gha Yehova ngaurunji,

ghakukondweska mtima,

Malango gha Yehova ngakutowa,

ghakungweluska maso.

Kopa Yehova nkhwakutowa,

kukukhalilira muyirayira.

Vyeruzgo vya Yehova vyose ni vyaunenesko,

Vyose ni vyaurunji.

Wonani kuti chigaŵa chachiŵiri cha mazgu agho ghayowoyeka chikumalizga vesi, ntheura chikulongosora ivyo vikuchitika para munthu wachita chigaŵa chakwamba. Para munthu waŵazga chigaŵa chachiŵiri nga ntchakuti “likuwezgeramo nkhongono” na “muzeleza vikumuzgora wavinjeru,” ndipo wakumanya kuti “dango la Yehova ndakufikapo” kweniso kuti “vikumbusko vya Yehova ni vyakugomezgeka.” Ntheura nga umo tawonera, chigaŵa chakwamba na chachiŵiri vikugaŵika chifukwa chakuti vikususkana yayi kweni vikovwira kuti fundo yose yipulikikwe makora.

EPULERO 15-21

MAZGU GHA CHIUTA MBUSAMBAZI | SALIMO 29-31

Chilango Chikulongora Kuti Chiuta Wakutitemwa

it-1-E 802 ¶3

Chisko

‘Kubisa chisko’ kungang’anamura vinthu vyakupambanapambana kuyana na umo vinthu viliri. Para Yehova wabisa chisko chake chikung’anamura kuti waleka kukutemwa kweniso kukovwira. Yehova wangachita nthena para munthu waleka kumupulikira panji ŵanthu ŵanandi ŵaleka kumupulikira nga umo vikaŵira na mtundu wa Israyeli. (Yob 34:29; Sa 30:5-8; Yes 54:8; 59:2) Kweni nyengo zinyake chingang’anamura kuti Yehova waleka kuzgora munthu panji ŵanthu chifukwa cha kulindilira nyengo yake yakuŵikika. (Sa 13:1-3) Apo Davide wakapemphanga kuti, “Bisani chisko chinu ku zakwananga zane,” wakapemphanga kuti Chiuta wamugowokere na kusezgera kutali maubudi ghake.—Sa 51:9; yaniskani na Sa 10:11.