Maliferensi gha Uteŵeti na Umoyo Wachikhristu—Kabuku ka Maungano
© 2024 Watch Tower Bible and Tract Society of Pennsylvania
MALICHI 3-9
MAZGU GHA CHIUTA MBUSAMBAZI ZINTHARIKA 3
Longorani Kuti Mukuthemba Yehova
ijwbv nkhani 14 ¶4-5
Zintharika 3:5, 6—“Ureke Kweghamira ku Umanyi Wako na Wako Pera”
“Uthembenge Yehova na mtima wako wose.” Tikulongora kuti tikuthemba Chiuta para tikuchita vinthu kuyana na khumbo lake. Tikwenera kumuthemba chomene Chiuta, na mtima withu wose. Mu Baibolo, mazgu ghakuti mtima kanandi ghakwimira wunthu wamukati, ivyo vingasazgapo umo munthu wakujipulikira, vilato, kaghanaghaniro, na umo wakuwonera vinthu. Ntheura kuthemba Chiuta na mtima withu wose kukusazgapo vinandi padera pa umo tikujipulikira waka. Tikusankha kuchita nthena chifukwa chakuti tili kukhorwa kuti Mlengi withu wakumanya makora icho ntchiwemi kwa ise.—Ŵaroma 12:1.
“Ungagomezganga pa kapulikiskiro kako yayi.” Tikwenera kuthemba Chiuta chifukwa kuthemba maghanoghano ghithu ghambura kufikapo kungatovwira yayi. Usange tikujithemba panji kulongozgeka waka na makhumbiro ghithu, tingasankha vinthu ivyo pakwamba vingawoneka nga kuti ni viwemi waka kweni paumaliro tingazakanjira navyo mu suzgo. (Zintharika 14:12; Yeremiya 17:9) Vinjeru vya Chiuta ni vyapachanya chomene pakuyaniska na vithu. (Yesaya 55:8, 9) Para tikulongozgeka na maghanoghano ghake, vinthu vitiyenderenge makora pa umoyo withu.—Salimo 1:1-3; Zintharika 2:6-9; 16:20.
ijwbv nkhani 14 ¶6-7
Zintharika 3:5, 6—“Ureke Kweghamira ku Umanyi Wako na Wako Pera”
“Mu mendero ghako ghose maso ghako ghaŵe kwa iyo.” Tikwenera kumanya dankha maghanoghano gha Chiuta pa nkhani zikuru izo tikukhumba kusankha pa umoyo withu. Tingachita nthena mwa kulomba wovwiri na kulondezga ivyo wakuyowoya mu Mazgu ghake, Baibolo.—Salimo 25:4; 2 Timote 3:16, 17.
“Wakunyoloskerenge nthowa zako.” Chiuta wakunyoloska nthowa zithu mwa kutovwira kuti tikhalenge mwakukolerana na fundo zake zaurunji. (Zintharika 11:5) Ivi vikutovwira kugega masuzgo na kwamba kukhala umoyo wakukondwa.—Salimo 19:7, 8; Yesaya 48:17, 18.
Ivyo Tasambira
Fundo Zikuru za m’Buku la Zintharika
Tikwenera kuwona chitemwa chakugomezgeka na kugomezgeka kuŵa mikhaliro yakuzirwa, ndipo tikwenera kuyilongora ku ŵanthu nga umo vikuŵira na majuda agho munthu wavwara mu singo agho ghakubisika yayi. Tikwenera kuyilemba mikhaliro iyi pa mtima withu, na kuyilondezga chomene pa umoyo withu.
MALICHI 17-23
Ivyo Tasambira
w00-E 7/15 29 ¶7
Mungalutilira Kuŵa Ŵatuŵa mu Charu cha Kuzura na Uzaghali
Solomoni wakayowoya masuzgo agho ghakwiza chifukwa cha uzaghali. Uleŵi na kuleka kuchindikika, panji kuleka kujichindika vikwendera lumoza. Kasi ntchakukhozga soni yayi kuti munthu ukhorweskenge waka makhumbiro ghakugonana gha ŵanji kweniso ghako? Asi kugonana na munthu uyo undatorane nayo nkhuleka kujichindika?
MALICHI 24-30
MAZGU GHA CHIUTA MBUSAMBAZI ZINTHARIKA 6
Kasi Tingasambirako Vichi ku Nyerere?
it-1-E 115 ¶1-2
Nyerere
‘Vinjeru Vyakawiro.’ Nyerere para zikuchita vinthu zikuchita kukhala pasi na kughanaghanirapo yayi, kweni mwakawiro ndimo Mlengi wawo wali kuzilengera. Baibolo likuti nyerere ‘zikunozga vyakurya vyake mu chihanya ndipo zikuwunjika vyakurya vyake mu nyengo ya vuna.’ (Zi 6:8) Mtundu umoza wa nyerere zakumanyikwa chomene ukusangika ku Palestina. Izi zikuchemeka kuti nyerere zakukolora panji kuti zakulima (Messor semirufus). Zikusunga tirigu na chakurya chinyake mu nyengo ya chihanya, ivyo zikugwiliskira ntchito mu nyengo ya chifuku, nyengo iyo ntchakusuzga kuti ziyeghe chakurya. Kanandi nyerere izi zikusangika chomene pa malo gha kupwanthirapo apo pakuŵa twakurya tunandi. Para mtika wa vula wanyeweska chakurya icho zikasunga, nyerere zakuvuna izi zikunyamura chakurya ichi kuluta nacho pa zuŵa kuti chikawomire. Kweniso nyerere izi zikumanyikwa kuti zikuwuskamo kamtima ka mbewu izo zasunga kuti mbewu zileke kumera. Nyerere zakuvuna izi zikumanyikwa makora chifukwa zikupanga tunthowa, kweniso pa mulyango wa khululu lake pakuŵa makantha.
Ivyo Tikusambirapo. Vinthu vichoko waka vyakukhwaskana na nyerere ivyo ŵanthu ŵafufuza vikulongora kuti fundo iyi njaunenesko, iyo yikuti: “Luta ku nyerere, iwe wamukata; wona umo yikuchitira ndipo uŵe wavinjeru.” (Zi 6:6) Nyerere zikunozgekera vyamunthazi pera yayi kweni zikulimbikira chomene ntchito ndipo zikuŵikapo mtima. Kanandi nyerere zikuguza vinthu vizito kuluska izo. Nyerere zikuchita vyose ivyo zingafiska kuti zifiske ntchito iyo zikuchita, nanga zingatelemuka, kuwa, panji kuphazamuka. Nyerere zikukolerana chomene, malo agho zikukhala ghakuŵa ghakutowa ndipo zikughanaghanirana chomene para zikugwira ntchito, nyengo zinyake zikovwira nyerere zinyake izo zapwetekeka panji izo zavuka kuti ziwelere ku malo uko zikukhala.
Ivyo Tasambira
w00-E 9/15 27 ¶3
Vikilirani Zina Linu
Vinthu 7 ivyo buku la Zintharika likuyowoya ni zakwananga zikuruzikuru ndipo zikusazgapo mtundu uliwose wa zakwananga. “Maso ghakujikuzga” na “mtima uwo ukwata viŵembu” ni zakwananga izo zikuchitika mu maghanoghano. “Lulimi lwautesi” na “kaboni mutesi uyo wakuthuta utesi” ni mazgu ghakwananga. “Mawoko agho ghakuthiska ndopa zambura mulandu” na “malundi agho ghakuchimbilira ku uheni” ni vyakuchita viheni. Kweni Yehova wakutinkha chomene munthu uyo wakukondwa kugaŵaniska ŵanthu awo ŵakhalanga makora mwamtende. Kusazgikira kwa nambara kufuma pa vinthu 6 kufika pa vinthu 7 ntchilongolero chakuti zakwananga izo wakutinkha ni zinandi, chifukwa ŵanthu ŵakulutilira kuchita zakwananga.
MALICHI 31–EPULERO 6
Ivyo Tasambira
w00-E 11/15 29 ¶1
“Sungilira Malango Ghane Kuti Ulutilire Kuŵa Wamoyo”
Solomoni wakalutizga kuti “Uvikakilire [malango ghane] ku minwe yako, uvilembe pa mtima wako.” (Zintharika 7:3) Minwe tikuyiwona kaŵirikaŵiri ndipo yikutovwira para tikuchita ivyo tikukhumba, mwakuyana waka fundo za mu Baibolo izo tikusambira apo tikukura, kwali tili ŵalara kale zikwenera kutilongozga pa chilichose icho tikuchita pa umoyo withu. Tikwenera kuzilemba pa mtima withu, ndipo ziŵe chigaŵa cha umoyo withu.
EPULERO 7-13
Ivyo Tasambira
g-E 5/14 16
‘Vinjeru Vikuchemerezga’—Kasi Mukuvipulika?
Buku linyake likati “Baibolo ndilo likusangika na ŵanthu ŵanandi chomene.” (The World Book Encyclopedia) Lang’anamurika nyengo zinandi ndipo lili mu viyowoyero vinandi chomene kuluska buku linyake lililose. Baibolo lose panji chigaŵa waka cha Baibolo, likusangika pafupifupi mu viyowoyero 2,600, ivi vikulongora kuti pa ŵanthu 100 ŵaliwose, 90 ŵali na Baibolo. Apa tingati vinjeru vikuchemerezga.
Vinjeru “vikuchemerezgaso” munthowa yinyake. Lemba la Mateyu 24:14 likuti: “Makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose, penepapo ndipo umaliro [wa charu ichi] wizenge.”
EPULERO 21-27
MAZGU GHA CHIUTA MBUSAMBAZI ZINTHARIKA 10
Kasi Ntchivichi Chingasambazga Munthu?
it-1-E 340
Vitumbiko
Yehova Wakutumbika Ŵanthu. “Thumbiko la Yehova ndilo likusambazga munthu, ndipo wakusazgako vyakuŵinya yayi.” (Zi 10:22) Yehova wakutumbika ŵateŵeti ŵake mwa kuŵavikilira, kuŵasambazga mwauzimu, kuŵalongozga, kuŵawovwira kuti vinthu viŵayendere makora, kweniso kuŵapwelelera. Ndipo ŵakusanga chandulo na vinthu ivi.