Maliferensi gha Uteŵeti na Umoyo Wachikhristu—Kabuku ka Maungano
MEYI 5-11
MAZGU GHA CHIUTA MBUSAMBAZI ZINTHARIKA 12
Tikutumbikika Para Tikulimbikira Ntchito
Mukhaliro Wakuzirwa Kuluska Dayamondi
Nyengo zinyake ŵateŵeti ŵanyake ŵa Yehova chingaŵaŵira chinonono chomene kusanga vinthu vyakukhumbikwa pa umoyo wawo. M’malo mwakuchita ukhuluku, iwo ŵakulimbikira kugwira ntchito kuti ŵasange ivyo ŵakukhumba. Ntheura ŵakulongolerathu kuti ŵakuzirwiska mikhaliro ya Chiuta nga nkhugomezgeka kuluska chinthu chinyake chilichose.—Zinth. 12:24; Efe. 4:28.
Kasi Mungachita Wuli Kuti Mukondwenge na Ntchito?
Fumbo laumaliro ili ndakuzirwa chomene kughanaghanirapo, chifukwa ntchito yikuŵa yakukondweska para yikovwira ŵanji. Yesu wakati: “Muli kukondwa kukuru mu kupeleka kuluska mu kupokera.” (Milimo 20:35) Para tikulimbikira ntchito, yikovwira makasitomara na mabwana ghithu pera yayi. Ŵanyake awo yikuŵawovwira mba munyumba yithu kweniso ŵanyithu.
Ŵamunyumba yithu. Para dada wakulimbikira ntchito wakovwira ŵamunyumba yake pa vigaŵa viŵiri. Chakwamba, wakuwoneseska kuti ŵamunyumba yake ŵali na chakurya, vyakuvwara na pakugona. Para wachita nthena ndikuti ‘wakupwelelera awo mbake’ umo Chiuta wakukhumbira. (1 Timote 5:8) Chachiŵiri, wakusambizga ŵanyake uwemi wa kulimbikira ntchito. Shane uyo wazunulika mu nkhani iyo yajumpha, wakati: “Adada ŵane ŵakulimbikira ntchito ndiposo mbakugomezgeka chomene pa ntchito yawo yaukalipentala. Nasambirako ntchito za mawoko, nga nkhuzenga ndipo nkhovwira ŵanji.”
Ŵanyithu. Paulosi wakachiska Ŵakhristu kuti ‘ŵagwirenge ntchito mwakuti ŵaŵe na kanthu kakuti ŵamupeko uyo wakusoŵerwa.’ (Ŵaefeso 4:28) Para tikulimbikira ntchito tikovwira banja lithu kweniso ŵakusoŵerwa. (Zintharika 3:27) Ntheura tikuŵa ŵakukondwa chifukwa tikovwira ŵanyithu.
Ivyo Tasambira
ijwyp nkhani 95 ¶10-11
Kasi Ndine Wakuzizipizga?
● Masuzgo ghinu mughawonenge mwakwenelera. Mupambaniskenge pakati pa masuzgo ghakurughakuru na masuzgo ghachoko. Baibolo likuti: “Chindere chikulongora luŵiro ukali wake, kweni wakuchenjera wakusulako waka msinjiro.” (Zintharika 12:16) Ntheura mungahangayikanga waka na suzgo lililose yayi.
“Ŵanyane ku sukulu, ŵakadandaulanga na vinthu vyambura kuzirwa nga kuti ni vyakuzirwa chomene. Ndipo ŵanyawo ŵa pa intaneti ŵakaŵaphaliranga kuti ŵakuchita makora kudandaura kweni ivi vikapangiskanga kuti suzgo lawo likure chomene, kweniso kuti ŵaleke kusanga nthowa ya umo ŵangamazgira suzgo lawo.”—Joanne.
MEYI 12-18
MAZGU GHA CHIUTA MBUSAMBAZI ZINTHARIKA 13
Kupusikika Yayi na “Nyali ya Muheni”
it-2-E 196 ¶2-3
Nyali
Mazgu Ghakuyelezgera. Icho munthu wangagwiliskira ntchito kulongozga mendero ghake chingayelezgereka na nyali. Mu buku la Zintharika Baibolo likupambaniska pakati pa munthu murunji na muheni, likuti: “Ungweru wa murunji ukuŵala chomene, kweni nyali ya muheni yizimwikenge.” (Zi 13:9) Ungweru wa murunji ukuŵaliraŵalira, nangauli nyali ya munthu muheni yingawoneka nga yikuŵala chomene, umaliro wake ukuŵa uheni. Chiuta wazamuwoneseska kuti ungweru wake wamalira ku mdima uko malundi ghake ghazamukhuŵara. Ndimo vizamuŵira na munthu uyo wakutemba awiske na anyina.—Zi 20:20.
Mazgu ghakuti ‘nyali yizimwikenge’ ghakung’anamura kuti munthu walije chilindizga chilichose cha munthazi. Ntharika yinyake yikuti: “Muheni waliyose walije kawemi munthazi. Nyali ya muheni yizimwikenge.”—Zi 24:20.
Teŵeterani Chiuta wa Wanangwa
Usange Satana wakapusika ŵanthu ŵaŵiri ŵakufikapo ndiposo ŵangelo, kuti ŵakane muwuso wa Chiuta, ipo nase wangatipusika. Mauryarya ghake ghandasinthe. Wakuyezga kuti watipuluske kuti tighanaghanenge kuti malango gha Chiuta ngazito, ndipo ghakutitondeska kusangwa. (1 Yohane 5:3) Tingaŵa na maghanoghano agha usange tikulutilira kuchezga na ŵanthu awo ŵali nagho. Mudumbu munyake wa vilimika 24 uyo wakachita uzaghali, wakati: “Mendezgano ghaheni ndigho ghakaninanga, chifukwa nkhawopanga kuŵa na maghanoghano ghakupambana na gha ŵanyane.” Panyake namwe ivi vili kumuchitikiranipo.
w04-E 7/15 31 ¶6
“Munthu Wakuchenjera Wakuchita Vinthu Mwamahara”
Munthu wakuchenjera na murunji uyo wakuchita vinthu mwamahara wakutumbikika. Solomoni wakutisimikizgira kuti: “Murunji wakurya na kukhuta, kweni nthumbo ya muheni yili pwankhu.” (Zintharika 13:25) Yehova wakumanya icho ntchiwemi kwa ise. Wakumanya ivyo vingawovwira mbumba zithu, ubwezi withu na ŵanthu, ivyo vingatovwira para tapika uteŵeti kweniso ulongozgi. Vinthu vitenderenge makora chomene para tikulondezga ulongozgi uwo uli mu Mazgu ghake Baibolo.
Ivyo Tasambira
it-2-E 276 ¶2
Chitemwa
Chitemwa chingatipuluska. Munthu wangaŵa na chitemwa chanadi para wakulongozgeka na mzimu wa Chiuta, kweniso vinjeru vyakufuma mu Baibolo. Mwachiyelezgero, mupapi wangalongora kuti wakumutemwa chomene mwana wake. Kweni nyengo zinyake chitemwa chingachepa, panji wangamba kumutemwa chomene mwana wake na kumuchitira chilichose icho wakukhumba na kughanaghana kuti ndicho chitemwa. Ndipo wangamba kutondeka kufiska udindo wake wakumulanga. (Zi 22:15) Chitemwa chanthena ntchanadi yayi, chingapangiska mwana kwamba kujighanaghanira waka yekha. Baibolo likuyowoya kuti munthu uyo wakuchita nthena, wakumutemwa yayi mwana wake, kweni wakumutinkha. Chifukwa wakuchita vinthu ivyo vingazakaponoska yayi mwana wake.—Zi 13:24; 23:13, 14.
MEYI 19-25
MAZGU GHA CHIUTA MBUSAMBAZI ZINTHARIKA 14
Sankhani Mwamahara Para Kwachitika Masoka Ghachilengiwa
Muzirwiskenge Umoyo Chifukwa Ntchawanangwa Chakufuma kwa Chiuta
Nyengo zinyake pakuŵavya icho tingachitapo kuti titondeske vinthu vinyake kuchitika ivyo vingaŵika umoyo withu pangozi. Tingatondeska yayi masoka ghachilengiwa, miliri, viwawa, panji vivulupi. Kweni para vinthu ivi vyachitika, tingayezga kujivikilira na kupona, usange tingapulikira ulongozgi wakufuma ku boma wakukhwaskana na kuwukamo mu chigaŵa icho vinthu ivi vyachitika, na ulongozgi unyake uwo ŵangatipa. (Rom. 13:1, 5-7) Ngozi na vyakuchitika vinyake vyamabuchi, ni vyakuti tingavinozgekera usange tingapulikira ulongozgi uliwose wakufuma ku ŵalara ŵa boma. Mwachiyelezgero, ntchakovwira chomene kusungirathu chakurya icho chinganangika luŵiro yayi, maji, munkhwala panji vinthu vinyake ivyo vingazakatovwira usange kwachitika ngozi.
Kasi tikwenera kuchita wuli usange uko tikukhala kwawa nthenda yakwambukira panji muliri? Tikwenera kupulikira ivyo ŵa vyaumoyo ŵakutiphalira, vinthu nga ni kugeza mu mawoko, kutalikirana na ŵanyithu, kuvwara masiki, na kukhala kwatekha usange tili na nthenda iyi panji para tikughanaghana kuti tili nayo. Para tikuchita vinthu nga ni ivi, tikulongora kuti tikuzirwiska chomene umoyo, uwo ntchawanangwa chakufuma kwa Chiuta.
Para vinthu vyamabuchi vyachitika, kanandi tikupulika mauthenga ghautesi ghakupambanapambana kufuma ku ŵabwezi ŵithu, ŵazengezgani ŵithu, panji mu ma whatsapp na facebook na vinyake vyantheura. M’malo mwa kugomezga waka “mazgu ghalighose” agho tapulika, ntchamahara chomene kupulikira ivyo boma kweniso ŵachipatala ŵakutiphalira. (Ŵazgani Zintharika 14:15.) Wupu Wakulongozga na maofesi gha munthavi ŵakufwilirapo chomene kuti ŵasange uthenga waunenesko pambere ŵandasankhe vinthu vyakukhwaskana na umo maungano kweniso umo mulimo wakupharazga vyenderenge. (Heb. 13:17) Para tikupulikira ulongozgi uwo tikupokera, tikujivikilira kweniso kuvikilira ŵanyithu. Tingawovwiraso kuti Ŵakaboni ŵa Yehova ŵaŵe na lumbiri luwemi mu chigaŵa chithu.—1 Pet. 2:12.
Muŵe na Chikanga Nga Ni Zadoki
Usange mwapempheka kovwira ŵabali panyengo izo ntchakofya kuchita nthena, kasi mungalongora wuli chikanga nga Zadoki? (1) Londezgani ulongozgi. Panyengo zakofya ntchakuzirwa chomene kuŵa ŵakukolerana. Pulikirani ulongozgi wakufuma ku ofesi yinu ya munthavi. (Heb. 13:17) Nyengo zose ŵalara ŵakwenera kuweleramo ulongozgi uwo ungaŵawovwira kunozgekera masoka kweniso ivyo ŵangachita para kwachitika soka. (1 Kor. 14:33, 40) (2) Muŵe ŵachikanga, kweni ŵakuchenjera. (Zinth. 22:3) Pambere mundachitepo kanthu mughanaghanirengepo dankha. Kweniso muŵenge maso apo mukovwirapo. (3) Gomezgani Yehova. Kumbukani kuti Yehova wakumutemwani mose, ndipo wakukhumba imwe na ŵabali wose muŵe ŵakuvikilirika. Ntheura wangamovwirani kuti namwe muŵe ŵakuvikilirika apo mukovwira ŵabali.
Ivyo Tasambira
it-2-E 1094
Kaghanaghaniro Kawemi
Munthu uyo wakughanaghana makora ŵanthu ŵakumutinkha. Fundo iyi ndiyo yikwenera yikulongosoreka pa Zintharika 14:17, lemba ili likuti: “Munthu wa kaghanaghaniro kawemi wakutinkhika.” Kanandi ŵanthu awo ŵakughanaghana makora yayi ŵakutinkha awo ŵakughanaghana makora. Kweniso ŵanthu awo nyengo zose ŵakughanaghana vyakuchita khumbo la Chiuta ŵakutinkhika. Yesu Khristu wakayowoya kuti: “Pakuti muli chigaŵa cha charu chara, kweni ine namusorani kufuma mu charu, lekani charu chikumutinkhani.” (Yoh 15:19) Mazgu ghakwambilira agho ŵakang’anamura kuti “kaghanaghaniro kawemi” agho ghali pa Zintharika 14:17 ghangayowoyaso za kughanaghana viheni. Ntheura fundo iyi yingang’anamuraso kuti munthu uyo wakughanaghana viheni wakutinkhika. Mabaibolo ghanyake ghali kung’anamura kuti: “Kweni munthu muryarya wakutinkhika.”—Mazgu gha Chiuta mu Kang’anamuliro Kaphya.
MEYI 26–JUNI 1
MAZGU GHA CHIUTA MBUSAMBAZI ZINTHARIKA 15
Wovwirani Ŵanyinu Kuti Ŵaŵe Ŵakukondwa
Tendenge mu Ukongolekwa Withu
Yobu wakaŵa na kaluso ka kupokelera ŵalendo. (Yob 31:31, 32) Nangauli tingaŵa ŵasambazi yayi, kweni tingaŵa na “kaluso kakupokelera ŵalendo.” (Rom. 12:13) Icho taŵeneko tikurya, ŵalendo nawo ŵangaryako nangauli tingachiwona kuŵa chakuyuyuka mu maso, ndipo tikwenera kukumbuka kuti: “Kurya mphangwe pera apo pali kutemwa nkhuwemi kwakuluska nkhambako yakututuŵa apo kutemwa palije.” (Zinth. 15:17) Kulyera lumoza na munyinu uyo nayo ngwakugomezgeka ndiposo mukutemwana, nanga chakurya chingaŵa chakuyuyuka mu maso chikunowa, kweniso mukwandula chomene mwauzimu.
Mukhwimiskanenge “Chomene”
Tileke kughanaghana kuti tingakhwimiska yayi ŵanyithu chifukwa tikumanya yayi kuyowoya. Pakukhumbikwa vinandi yayi kuti tikhozge ŵanyithu. Chinthu chimoza icho chikukhumbikwa nkhumwemwetera pakutawuzga munthu. Para iyo wakumwemwetera yayi, tingamanya kuti wali na suzgo linyake, ndipo wangakhozgeka chomene para tingamutegherezga.—Yak. 1:19.
Mubali muwukirano zina lake Henri wakasuzgika chomene maghanoghano chifukwa ŵabali ŵake ŵapafupi, kusazgapo adada ŵake, awo ŵakaŵa mulara wakuchindikika, ŵakaleka unenesko. Henri wakakhozgeka chomene apo mulaŵiliri wa dera wakamuchema kuti ŵakarye ku resitiranti na kumupa mwaŵi kuti walongosore umo wakajipulikiranga. Ŵati ŵadumbiskana, Henri wakamanya kuti para wangalutilira kugomezgeka, ŵanthu aŵa ŵangawelera mu unenesko. Wakapembuzgika chomene kuŵerenga Salimo 46; Zefaniya 3:17; na Mariko 10:29, 30.
Ivyo vikachitikira Mariya na Henri vikulongora kuti tingakhozga ŵabali na ŵadumbu ŵithu awo ŵakukhumbikwira kusanguluskika. Fumu Solomoni yikalemba kuti: “Lizgu ilo layowoyeka pa nyengo yakwenelera ndiwemi nadi. Kalaŵiskiro kawemi kakukondweska mtima. Nkhani yiwemi yikukhozga viwangwa.” (Zinth. 15:23, 30 mazgu ghamusi) Kweniso munthu uyo wakusuzgika maghanoghano wangakhozgeka para wangaŵerenga magazini gha Gongwe la Mulinda panji mabuku ghanyake pa webusayiti yithu. Paulosi wakayowoyaso kuti kwimbira lumoza sumu za Ufumu kungatikhozga. Iyo wakalemba kuti: “Lutilirani kusambizga na kuchiskana na masalimo, malumbo kwa Chiuta, ndiposo na kwimba sumu zauzimu na mtima wakuwonga, kwimbira Yehova mu mitima yinu.”—Kol. 3:16; Mil. 16:25.
Ivyo Tasambira
Kasi Mkhristu Wangapokera Munkhwala Para Walwara?
Kasi nkhwenera kufumba dankha dokotala munyake pambere nindapokere munkhwala? Vinthu vikwenda makora para pali “ŵakupeleka fundo ŵanandi,” chomene para muli na suzgo likuru la muthupi.—Zintharika 15:22.
JUNI 2-8
MAZGU GHA CHIUTA MBUSAMBAZI ZINTHARIKA 16
Mafumbo Ghatatu agho Ghangatovwira Kusankha Makora
Ivyo Mungachita Kuti Musankhe Vinthu Mwavinjeru pa Uwukirano
Munthu wakuŵa wakukondwa chomene usange wakuteŵetera Yehova. (Zinth. 16:20) Mulembi wa Yeremiya, zina lake Baruki, wakaluwa fundo iyi. Pa nyengo yinyake, wakakondwanga yayi pakuteŵetera Yehova. Yehova wakamuphalira kuti: ‘Kasi ukujipenjera vikuru? Leka kuvipenja, pakuti, wona, nditi ndikhizge chiheni pachanya pa ŵanthu wose, kweni umoyo wako ndikupe nga ndi skoghi mu malo ghose agho ukuyako.’ (Yer. 45:3, 5) Imwe mukuwona wuli? Kasi pakati pa kujipenjera vikuru na kupona pharanyiko la Yerusalemu pakuŵa muteŵeti wakugomezgeka wa Chiuta, ni ntchi icho chikate chiwovwire Baruki kuti waŵe wakukondwa?—Yak. 1:12.
Mubali munyake uyo wakukondwa chifukwa cha kuteŵetera ŵanji ni Ramiro. Iyo wakati: “Mbumba yakwithu njikavu chomene ndipo kukaya kwithu nkhu Mapiri gha Andes. Ntheura, apo mukuru wane wakajipeleka kuti wanilipilirenge fizi ku yunivesite, ukaŵa mwaŵi ukuru. Kweni nkhaŵa kuti nabapatizika waka sonosono na kuŵa yumoza wa Ŵakaboni ŵa Yehova. Kweniso nkhaŵa kuti nachemeka na mupayiniya munyake kuti nkhapharazgenge nayo mu tawuni yinyake. Nkhaluta. Ndipo kura nkhasambira ntchito ya kumeta sisi, na kujura malo ghakumetera kuti nisangengeko ndalama zakugulira vinthu vyakukhumbikwa. Tikajipelekanga kusambizga ŵanthu Malemba, ndipo ŵanandi ŵakachitangapo kanthu. Nyengo yikati yajumphapo, nkhamba kuwungana na mpingo uphya wa chiyowoyero cha ku malo agha. Panyengo yasono nachita uteŵeti wanyengozose kwa vyaka 10. Palije ntchito yinyake iyo mphanyi yikanovwira kuti niŵe na chimwemwe icho nkhusanga pakovwira ŵanthu kusambira makani ghawemi mu chiyowoyero chawo.”
Kasi Mwazgoka?
TOSE tikukhwaskika na umo tili kulelekera ndiposo uko tikukhala. Vyakuvwara ivyo tikuvwara, vyakurya ivyo tikurya, na umo tikuchitira vinthu, vikulongora uko tili kukulira.
Ndipouli, pali vinthu vinyake vyakuzirwa chomene kuluska kusankha vyakurya na masitayelo gha malaya. Mwachiyelezgero, para tikukura, tikusambizgika kuti vinthu vinyake ni viwemi ndiposo kuti vinyake ni viheni. Pa vinthu ivi, vinandi ni vyakuti munthu waliyose wakusankha yekha ndipo ŵanthu ŵakusankha mwakupambana. Ivyo tikusankha vingalongora umo njuŵi yithu yiliri. Baibolo likuyowoya kuti kanandi “ŵanthu ŵa mitundu awo ŵalije dango mwakawiro ŵakuchita vinthu vya dango.” (Rom. 2:14) Kweni kasi ichi chikung’anamura kuti para palije dango lakudunjika lakufuma kwa Chiuta, ndikuti tingalondezga waka fundo izo tili kukura nazo ndiposo izo ŵanthu ŵanandi mu chikaya chithu ŵakutemwa kulondezga?
Pali vifukwa viŵiri vyakuzirwa ivyo Ŵakhristu ŵakwenera yayi kulondezga waka fundo izo ŵali kukura nazo ndiposo izo ŵanthu ŵanandi mu chikaya chawo ŵakutemwa kulondezga. Chakwamba, Baibolo likutikumbuska kuti: “Yiliko nthowa iyo yikuwoneka ku munthu nga njakunyoroka, kweni umaliro wake ndi nyifwa.” (Zinth. 16:25) Chifukwa chakuti taŵanthu tili ŵambura kufikapo, tikutondeka kusankha vinthu mwakwenelera kuti tilongozge makora mendero ghithu. (Zinth. 28:26; Yer. 10:23) Chachiŵiri, Baibolo likulongora kuti Satana, “chiuta wa mgonezi uno,” ndiyo wakulongozga vinthu ivyo vikuchitika mu charu ndiposo fundo izo charu chikwendera. (2 Kor. 4:4; 1 Yoh. 5:19) Ntheura, usange tikukhumba kuti Yehova watitemwe na kutitumbika, tikwenera kupulikira chenjezgo ilo lili pa Ŵaroma 12:2.—Ŵazgani.
Ivyo Tasambira
it-1-E 629
Chilango
Ivyo Vikuchitika Para Wazomera Panji Kukana Chilango. Ŵanthu ŵaheni, ŵazeleza, panji ŵambura mahara ŵakukana kweniso ŵakutinkha kulangika na Yehova. (Sa 50:16, 17; Zi 1:7) Ŵanthu aŵa ŵakukumana na masuzgo ghakuru ndipo pamanyuma ŵakupika ulongozgi wankhongono ndipo nyengo zinyake ŵakulangika chomene. Lekani buku la Zintharika likuti: “Vindere vikulangika na uchindere wawo.” (Zi 16:22) Ntheura ŵangakavuka, kukhozgeka soni, ndipo nyengo zinyake ŵangafwa luŵiro. Ivyo vikachitikira Ŵaisrayeli vikutovwira kupulikiska makora fundo iyi. Iwo ŵakapulikiranga yayi apo Yehova wakaŵapanga ulongozgi kweniso kuŵachenya kwizira mu zintchimi zake. Yehova wakalekanga kuŵatumbika na kuŵavikilira chifukwa chakuti ŵakakananga kulangika na iyo. Paumaliro ŵakasangana na masuzgo ghakuru agho Yehova wakayowoyerathu kuti ŵasanganenge nagho chifukwa cha kuleka kupulikira. Ŵakathereskeka na ŵalwani ŵawo na kutolekera ku wuzga.—Yer 2:30; 5:3; 7:28; 17:23; 32:33; Ho 7:12-16; 10:10; Zef 3:2.
JUNI 9-15
MAZGU GHA CHIUTA MBUSAMBAZI ZINTHARIKA 17
Kondwani na Mtende mu Mbumba Yinu
g-E 9/14 11 ¶2
Ivyo Mungachita Kuti Muleke Kusunga Vyakusingo
Jisandani. Baibolo likulongora kuti pali ŵanthu ŵanyake awo ‘ŵakutemwa kukalipa’ kweniso ‘ŵakutemwa kukwiya.’ (Zintharika 29:22) Kasi ndimo namwe muliri? Jifumbani kuti: ‘Kasi nkhuchedwa yayi kuthukira? Kasi nkhuchedwa yayi kukhuŵara? Kasi nkhukwiya nanga mpha tunthu tuchokotuchoko?’ Baibolo likuyowoya kuti “uyo wakuwerezgawerezga waka nkhani wakupatuska ŵabwezi.” (Zintharika 17:9; Mupharazgi 7:9) Ivi vingachitikaso mu nthengwa. Para mukutemwa kusunga vyakusingo, jifumbani kuti, ‘Kasi ningachita wuli kuti nizikirenge para munyane wa munthengwa wanikhuŵazga?’—fundo iyo yingamovwirani: 1 Petrosi 4:8.
Kumazga Masuzgo
Ŵani na nyengo yakuti mudumbiskane. “Kanthu kose kali na nyengo yake na yake, . . . nyengo ya kukhala chete, na nyengo ya kuyowoya.” (Mupharazgi 3:1, 7) Nga ni umo tawonera kugazgana kwa ŵakutorana awo ŵazunulika kukwambilira kwa nkhani iyi, masuzgo ghanyake ghangapangiska munthu kuti wakwiye chomene. Usange vyamucitikirani, jikorani na kuleka dankha chidumbirano kwa nyengo yichoko, ‘khalani chete’ kuti muleke kukwiya chomene. Mungavikilira nthengwa yinu kuti yileke kunangika usange mungalondezga ulongozgi wa mu Baibolo uwu: “Jando la mphindano liri ngati para munthu wajulira maji, ntheura leka makani, yindayambe mphindano.”—Zintharika 17:14.
Ndipouli, paliso “nyengo ya kuyowoya.” Masuzgo ghali nga ni thondo, ndipo ghakukura chomene para mwaghalekelera. Ntheura lekani kusurako suzgo pakughanaghana kuti yimarenge yekha. Usange mwaleka dankha kudumbiskana za suzgo yinu, longorani ntchindi ku munyinu mwa kusankha nyengo kuti muzakadumbiskane suzgo yinu. Ichi chingawovwira mose kulondezga ulongozgi wa mu Baibolo, wakuti: “Dazi lileke kunjira mu ukali winu.” (Ŵaefeso 4:26) Kweni mukwenera kuchita vinthu mwakuyana na layizgo linu.
Ivyo Tasambira
it-1-E 790 ¶2
Maso
Umo munthu wakulaŵiskira vingalongora umo wakujipulikira. Umo wangachitira na maso ghake, wangalongora kuti ngwachitima panji yayi (Do 19:13); ‘wangatinyira maso,’ panji ‘kuphayira.’ Nyengo zinyake maso ghangalongoraso kuti munthu wakukunyoza panji wakukhumba kukuchitira chinthu chiheni. (Sa 35:19; Zi 6:13; 16:30) Munthu uyo wakutondeka kumanya awo ŵakukhumbikwira wovwiri, panji uyo wakukhumba yayi kovwira ŵanji, wakuyana waka na munthu uyo wakujara maso ghake. (Mt 13:15; Zi 28:27) Muzeleza wakuti waka maso ŵeraŵera kulaŵiska “ku vigoti vya charu chapasi,” ndipo maghanoghano ghake ghakukhazikika pa chimoza yayi. (Zi 17:24) Nakuti munthu wangawoneka kuti wali na thupi liwemi, ngwankhongono, panji ngwakukondwa na umo maso ghake ghakuwonekera. (1Sa 14:27-29; Do 34:7; Yob 17:7; Sa 6:7; 88:9) Themba Yehoshafati likayowoya kwa Yehova kuti: “Maso ghithu ghali kwa imwe.”—2Mi 20:12.
JUNI 16-22
MAZGU GHA CHIUTA MBUSAMBAZI ZINTHARIKA 18
Mukhozgenge Awo Ŵakusuzgika na Matenda
Vinjeru Vyenecho Vikuchemerezga
Mughanaghanirengepo dankha pambere mundayowoye. Para tingaŵa maso yayi, tingananga vinthu na ivyo tikuyowoya. Baibolo likuti: “Kayowoyero kawakawaka kali nga nkhulasa kwa lupanga, kweni lulimi lwa wavinjeru lukuchizga.” (Zinth. 12:18) Tikusungilira mtende para tikugega kusesa ŵanyithu. (Zinth. 20:19) Para tikukhumba kuti ivyo tikuyowoya nyengo zose vipembuzgenge ŵanyithu m’malo mwa kuŵalasa, tikwenera kuŵazga Mazgu gha Chiuta nyengo zose na kughanaghanirapo. (Luka 6:45) Para tikughanaghanirapo pa ivyo Baibolo likuyowoya, mazgu ghithu ghaŵenge nga ‘ntchisimi cha vinjeru,’ ndipo ghakhozgenge ŵanji.—Zinth. 18:4.
mrt nkhani 19 bokosi
Umo Mungachitira Para Mwamba Kulwara Mwamabuchi
Mutegherezgenge. Nthowa yimoza iyo tingamovwilira munyithu uyo wakulwara, nkhumutegherezga para wakuyowoya nase. Lekani kughanaghana kuti mukwenera kuzgora kalikose ako wayowoya. Kanandi chakuzirwa chomene nkhutegherezga. Mupulikiskani ndipo lekani kumweruzga. Lekani kujitora kuti mukumanya umo wakujipulikira, chomene para wakuwoneka nga kuti wakulwara yayi.—Zintharika 11:2.
Muyowoyenge nawo mwalusungu. Nyengo zinyake mungaŵavya chakuyowoya, kweni mazgu ghachoko waka ghakukhozga ngakovwira chomene kuluska kukhala waka chete. Para mulije chakuyowoya, yezgani kuyowoya mazgu ghapusu waka kweni ghakufuma pasi pa mtima, nga ghakuti, “Nkhumanya yayi icho ningayowoya, kweni nkhumutemwani chomene.” Kuyowoya yayi mazgu nga ghakuti, “Matenda ghakuyira munthazi tu” panji ghakuti “Apa mphachoko, nyengo zinyake . . . .”
Mungalongora kuti mukumutemwa para mukufufuza vinandi vyakukhwaskana na nthenda iyo wakulwara. Wakondwenge chomene kumanya kuti mukupulikiska umo wakujipulikira, kweniso vingawovwira kuti muyowoyenge mazgu ghawemi. (Zintharika 18:13) Kweni ntchiwemi yayi kupeleka ulongozgi para mweneko wandamupemphani.
Mumovwirenge. M’malo mwa kujitora nga mukumanya kale umo mungamovwilira, mufumbani usange vilipo ivyo mungawovwirapo. Kweni kuluwa yayi kuti ŵanyake ŵakuchita soni kuyowoya kuti pali vinyake vyakuti muŵawovwire chifukwa ŵakukhumba yayi kuŵa mphingo kwa imwe. Para ndimo viliri, yezgani kusachizga vinyake ivyo mungawovwirapo nga kukamugulira vinthu, kumovwirako ntchito za pa nyumba, na vinyake.—Ŵagalatiya 6:2.
Kutaya mtima yayi. Para mubwezi winu wakulwara, nyengo zinyake wangasintha vinyake ivyo wakhumbanga kuchita panji wangakhumba yayi kuyowoya namwe. Muzikirenge ndipo mumupulikiskenge. Lutilirani kumovwira nyengo zose.—Zintharika 18:24.
Kasi Mungawovwira Wuli Ŵanthu Awo Ŵakusuzgika Maghanoghano?
“Mupembuzge.”—1 ŴATESALONIKA 5:14.
Mubwezi winu wangaŵa kuti wakwenjerwa panji wakusuzgika na maghanoghano ghakuti ngwambura kwenelera. Para mungamusimikizgira kuti mukumutemwa, mungamupembuzga na kumukhozga nanga mungaŵa kuti mukumanya yayi icho mungayowoya.
“Mubwezi wanadi wakutemwa nyengo zose.”—ZINTHARIKA 17:17.
Pelekani wovwiri wakwenelera. M’malo mwakughanaghanira waka wovwiri uwo mungapeleka, fumbani ivyo mungawovwirapo. Usange mubwezi winu vikumusuzga kulongosora wovwiri uwo wakukhumba, yezgani kupenjerezga wovwiri wakwenelera uwo mungapeleka, nga kuluta kukatembeya. Panji mungamovwira kukamugulira vinthu, kutozga pa malo panji ntchito zinyake.—Ŵagalatiya 6:2.
“Longorani kuzikira.”—1 ŴATESALONIKA 5:14.
Ni nyengo zose yayi apo mubwezi winu wangamuphalirani ivyo wakukhumba. Musimikizgirani mubwezi winu kuti muli ŵakunozgeka kumutegherezga para wakukhumba kuyowoya namwe. Chifukwa cha ulwari, nyengo zinyake mubwezi winu wangayowoya na kuchita vinthu ivyo mungakhuŵara navyo. Wangasintha vinthu ivyo mwakhumbanga kuchitira lumoza panji wangaŵa kuti wandawuke makora zuŵa ilo. Mukwenera kuzikira nayo na kumupulikiska apo mukumupempha kuti mumovwire.—Zintharika 18:24.
Ivyo Tasambira
it-2-E 271-272
Mphenduzga, I
Kale ŵanthu ŵakachitanga mphenduzga kuti ŵasankhe chakuchita pa nkhani yinyake. Pakuchita mphenduzga, ŵakagwiliskiranga ntchito tumalibwe tuchokotuchoko panji tunthu tunyake uto ŵakatuŵikanga pa salu panji pa chinthu chinyake, pamasinda ŵakatusunkhunyanga. Kalibwe ako kawa pasi kakawovwiranga kumanya uyo wasankhika. Ŵakalombanga dankha pakuchita mphenduzga nga umo vikaŵiranga pakuchita chilapo. Para ŵalomba, ŵakalindiliranga Yehova kuti wanjilirepo kuti waŵawovwire kupanga chakusankha. Mazgu gheneko agho ŵakang’anamura kuti mphenduzga (Heb., goh·ralʹ) ghangang’anamura “chiharo” panji “chigaŵa.”—Jos 15:1; Sa 16:5; 125:3; Yes 57:6; Yer 13:25.
Ntchito Yake. Lemba la Zintharika 16:33 likuti: “Mphenduzga yikuponyeka pa chipakato, kweni chilichose icho yalongora ntchakufuma kwa Yehova.” Mu nyengo ya Ŵaisrayeli, mphenduzga zikawovwiranga kumazga mphindano. Baibolo likuti: “Mphenduzga zikumazga mphindano, ndipo zikudumura mulandu pakati pa awo ŵakupindikana.” (Zi 18:18) Mphenduzga ghakaŵanga waka maseŵero panji njuga yayi. Pakaŵavya, malipiro panji kuluska. Ŵakachitanga mphenduzga kuti ŵasange ndalama za pa tempile panji zakovwilira ŵasembe yayi. Kweniso ŵakachitanga mphenduzga kuti ŵasange ndalama zakovwilira ŵakavu yayi. Kweni ŵasilikari ŵa Roma ŵakachita mphenduzga pa malaya gha Yesu na chilato chiheni nga umo vikayowoyekerathu pa lemba la Salimo 22:18, ŵakuchita mphenduzga pa malaya gha Yesu—Mt 27:35.
JUNI 23-29
MAZGU GHA CHIUTA MBUSAMBAZI ZINTHARIKA 19
Muŵe Mubwezi Wanadi ku Ŵabali na Ŵadumbu Ŵinu
Umo Tingachitira Kuti Tilutilire Kutemwana Chomene
Muŵikenge chomene mahara pa viwemi ivyo ŵabali na ŵadumbu ŵinu ŵakuchita, pa viheni yayi. Ghanaghanirani chiyelezgero ichi. Tiyelezgere kuti muli pa phwando na ŵabali na ŵadumbu. Mwakondwa chomene na phwando ili ndipo paumaliro mose mukujambuliska chithuzi. Mukujambuliskaso vithuzi vinyake viŵiri kuchitira kuti panji chakwamba chira chindawoneke makora. Apa sono ndikuti muli na vithuzi vitatu. Kweni pa chithuzi chimoza, mukuwona kuti mubali munyake wandasekelere. Kasi mukuchita nacho wuli chithuzi ichi? Mukuchisisita waka chifukwa chakuti muli kale na vithuzi viŵiri ivyo waliyose wakusekelera kusazgapo na mubali uyo.
Tiyeni tiyaniske vithuzi ivyo tasunga na vinthu ivyo tikukumbukira. Nyengo zinandi tikukumbukanga nyengo izo tikachezga na ŵabali na ŵadumbu. Kweni tiyelezgere kuti pa nyengo yinyake mubali panji mudumbu wakayowoya panji kuchita chinthu icho chikatikhuŵazga. Kasi tingachita wuli usange takumbuka ivyo wakachita? Tingachita makora kuwuskamo waka maghanoghano ghaheni agha, nga umo tikusisitira chithuzi icho chindawoneke makora. (Zinth. 19:11; Efe. 4:32) Tingafiska kuluwako waka kaubudi ako mubali panji mudumbu withu wakatichitira chifukwa pali nyengo zinandi ziwemi izo tikachezga nayo makora izo tingakumbukira. Ivi ndivyo ni vinthu vyakuzirwa ivyo tikwenera kukumbukira na kuvisunga.
Lutilirani Kukuzga Chitemwa Chinu
Nase tipenjerezgenge nthowa izo tingawovwilira ŵabali na ŵadumbu ŵithu. (Heb. 13:16) Wonani ivyo wakachita Anna uyo wazunulika mu nkhani iyo yajumpha. Chimphepo chikuru chikati chachitika, iyo na mfumu wake ŵakaluta ku nyumba ya mbumba yinyake ya Ŵakaboni ndipo ŵakasanga kuti mtenje wa nyumba yawo waŵewuka. Ivi vikapangiska kuti mbumba iyi yiŵavye malaya ghakutowa. Anna wakuti: “Tikatora vyakuvwara vyawo na kuŵachapira kweniso tikaŵasitira na kuvipinda makora na kuŵapa. Kwa ise tikawonanga nga ivyo tachita ni vikuru yayi, kweni ivyo tikachita vikakhozga chomene ubwezi withu na mbumba iyi uwo uchalipo m’paka sono.” Chitemwa icho Anna na mfumu wake ŵakaŵa nacho pa ŵabali na ŵadumbu ndicho chikaŵachiska kuti ŵawovwirepo.—1 Yoh. 3:17, 18.
Para tikulongora lusungu na chitemwa ku ŵanji, iwo ŵangamanya kuti tikuchita nthena kuti tiyezge Yehova. Ndipo ŵangawonga chomene ivyo taŵachitira kuluska umo ise taghanaghaniranga. Khanh, uyo tamuzunura kukwambilira, kanandi wakukumbukira awo ŵakamovwirapo. Iyo wakuti: “Nkhuwonga chomene ŵadumbu awo ŵakanitoranga kuti tinjire lumoza mu uteŵeti. Ŵakazakanitoranga ku nyumba, ndipo nyengo zinyake tikalyeranga lumoza chakurya, ndipo pamanyuma ŵakazakanilekangaso ku nyumba. Sono ndipo namanya kuti chikaŵa chipusu yayi kuchita nthena. Ndipo ŵakachitanga nthena chifukwa cha chitemwa.” Unenesko ngwakuti ni wose yayi awo ŵangawonga ivyo tingaŵachitira. Pakuyowoya za awo ŵakamovwira, Khanh wakuti: “Nkhukhumba chomene kuŵawezgerapo pa viwemi vyose ivyo ŵakanichitira, kweni nkhumanyako yayi uko wose ŵakukhala pasono. Ndipouli, Yehova wakumanyako, ndipo nkhulomba kuti mphanyi ndiyo waniwezgerako m’malo mwa ine.” Khanh wakuneneska. Yehova wakuwona vyose ivyo tikuchitira ŵanyithu nanga vingaŵa vichoko wuli. Wakuviwona kuŵa sembe yakuzirwa kweniso wakuviwona kuŵa ngongoli iyo wawezgerengepo.—Ŵazgani Zintharika 19:17.
Lutilirani Kulongorana Chitemwa Chakugomezgeka
Mazuŵa ghano, munthu uyo wagwira ntchito vyaka vinandi ku kampani yimoza tingayowoya kuti ngwakugomezgeka. Kweni vingachitika kuti kwa vyaka vyose ivyo wakugwira ntchito na kampani iyi, wandakumanepo na ŵeneko ŵa kampani iyi. Ndipo vingachitikaso kuti ni nyengo zose yayi apo wakukolerana na malango gha pa kampani iyi. Wangaŵa kuti wakuyitemwa yayi kampani iyi, kweni iyo wakugwira pa kampani iyi chifukwa chakuti wakukhumba waka kuŵa pa ntchito iyo yingamovwira kusanga ndalama. Ndipo iyo wangadumura kuti walutilirenge kugwira ntchito pa kampani iyi m’paka apo wazamupumulira pa ntchito, wangayileka pekha usange wangasanga ntchito yapachanya kunyake.
Mphambano pakati pa lizgu lakuti kugomezgeka nga umo tawonera mu ndime 6, na mazgu ghakuti chitemwa chakugomezgeka, ni chilato icho munthu wakuchitira chinthu. Ipo chifukwa wuli ŵateŵeti ŵa Chiuta ŵakalongoranga chitemwa chakugomezgeka mu nyengo yakale? Awo ŵakalongoranga chitemwa chakugomezgeka ŵakachichizgikanga waka yayi, kweni ŵakachitanga ivi kufumira pasi pa mtima. Wonani chiyelezgero cha Davide. Iyo mtima wake ukamuchiska kulongora chitemwa chakugomezgeka kwa Yonatani, nangauli awiske ŵa Yonatani ŵakakhumbanga kumukoma. Vyaka vinandi vikati vyajumphapo kufuma apo Yonatani wakafwira, Davide wakalutilira kulongora chitemwa chakugomezgeka kwa Mefibosheti mwana wa Yonatani.—1 Sam. 20:9, 14, 15, mazgu ghamusi; 2 Sam. 4:4; 8:15; 9:1, 6, 7, mazgu ghamusi.
Ivyo Tasambira
it-1-E 515
Ulongozgi, Wakupeleka Ulongozgi
Yehova wali na vinjeru vinandi chomene. Iyo wakukhumbikwira ulongozgi yayi. (Yes 40:13; Ro 11:34) Mwana wake ngwakwenelera nadi kuŵa “Wakupeleka Fundo Wakuzizwiska,” kweniso kupeleka ulongozgi chifukwa wakupokera na kulondezga ulongozgi wakufuma kwa Adada ŵake ndipo wali na mzimu wa Chiuta. (Yes 9:6; 11:2; Yoh 5:19, 30) Ntheura kuti ulongozgi uŵe wakovwira ukwenera kufuma kwa Yehova. Ulongozgi uliwose uwo ukukolerana yayi na Wapachanya Nkhanira ngwambura kovwira. Ni ulongozgi yayi.—Zi 19:21; 21:30.
JUNI 30–JULAYI 6
MAZGU GHA CHIUTA MBUSAMBAZI ZINTHARIKA 20
Kasi Mungachita Wuli Kuti Chibwezi Chende Makora?
Ivyo Mungachita Kuti Chibwezi Chinu Chende Makora
Nangauli chibwezi ni nyengo yakukondweska chomene, kweni ni nkhani yakupepuka yayi chifukwa awo ŵali pa chibwezi paumaliro ŵangatorana. Pa zuŵa la ukwati wawo, awo ŵakunjira mu nthengwa ŵakuchita chilapo pamaso pa Yehova kuti ŵatemwanenge na kuchindikana umoyo wawo wose. Pambere tindapange chilapo chilichose, tikwenera kughanaghanirapo dankha mwakupwelelera. (Ŵazgani Zintharika 20:25.) Ndimo viliriso na chilapo cha nthengwa. Chibwezi chikovwira kuti ŵanthu ŵamanyane makora kweniso kuti ŵasankhe vinthu mwamahara. Nyengo zinyake ŵangasankha kutorana, ndipo nyengo zinyakeso ŵangasankha kumazga waka chibwezi. Para chibwezi chamara, chikung’anamura kuti awo ŵakaŵa pa chibwezi mbakutondeka yayi. M’malo mwake, ndikuti ŵafiska chilato icho ŵakambira chibwezi, chifukwa vyaŵawovwira kusankha makora vinthu.
Chifukwa wuli ntchakuzirwa kuwona chibwezi mwakwenelera? Usange awo ŵandanjire mu nthengwa ŵakuwona chibwezi mwakwenelera, viŵawovwirenge kuleka kwamba chibwezi na munthu uyo ŵakumanyirathu kuti ŵangazakatorana nayo yayi. Ndipouli, ni awo ŵandanjire mu nthengwa pera yayi awo ŵakwenera kuwona chibwezi mwakwenelera. Tose tikwenera kuwona chibwezi mwakwenelera. Mwachiyelezgero, ŵanyake ŵakughanaghana kuti usange ŵanthu ŵali pa chibwezi, ŵakwenera kutorana. Kasi kaghanaghaniro aka kakukhwaska wuli Ŵakhristu awo ŵandanjire mu nthengwa? Melissa, mudumbu wambura kutengwa wa ku United States, wakuti: “Ŵakaboni ŵanyake ŵakukhazga kuti usange mubali na mudumbu ŵali pa chibwezi ndikuti mulimose umo vingaŵira, ŵakwenera kutorana. Ivi vikupangiska kuti ŵanyake awo ŵali pa chibwezi ŵaleke kumazga chibwezi chawo nanga vingaŵa kuti vikwenda yayi. Ndipo ŵanyake ŵakusankha kulekerathu waka kuŵa pa chibwezi. Ivi vingapangiska kuti ŵanyake ŵambe kusuzgika maghanoghano.”
Umo Mungachitira Kuti Musange Munyinu Wakwenelera wa mu Nthengwa
Kasi mungachita wuli kuti mumusande makora munthu uyo mukumudokera kwambura mwenecho kumanya? Pa maungano gha mpingo panji pa nyengo ya ntchezgo, mungamanyako vinyake vyakukhwaskana na umo umoyo wake wauzimu uliri, wunthu wake, na nkharo yake. Kasi ŵabwezi ŵake mbanjani, ndipo iyo wakutemwa kuyowoya vichi? (Luka 6:45) Kasi vilato vyake vikuyana na vinu? Mungafumba ŵalara mu mpingo wake panji Ŵakhristu ŵanyake ŵakukhwima awo ŵakumumanya makora. (Zinth. 20:18) Mungaŵafumba vya lumbiri lwake na nkharo yake. (Rute 2:11) Apo mukumusanda munthu uyu, lekani kumupangiska kuti waleke kufwatuka. Chindikani maghanoghano ghake, ndipo gegani kuŵa na mtima wakukhumba kumanya chilichose icho wakuchita.
Ivyo Mungachita Kuti Chibwezi Chinu Chende Makora
Kasi mungachita wuli kuti mumanye makora umo munyinu waliri nadi? Nthowa yimoza yiwemi chomene, nkhuyowoyeskana mwakufwatuka kweniso mwaunenesko, kufumba mafumbo na kutegherezgana chomene. (Zinth. 20:5; Yak. 1:19) Panji mungasankha kuchitira lumoza vinthu vinyake kuti muyowoyeskanenge, nga nkhulyera lumoza chakurya, kukatembeya lumoza ku malo uko kuli ŵanthu ŵanandi, na kukapharazgira lumoza. Mungamanyanaso makora usange mukuŵa na nyengo yakuchezgera lumoza na ŵabwezi kweniso ŵachibali ŵinu. Kweniso nozgani vyakuchitika ivyo vingawovwira kuti mumanye umo munyinu wakuchitira vinthu pa vigaŵa vyakupambanapambana kweniso na ŵanthu ŵakupambanapambana. Wonani ivyo Aschwin wa ku Netherlands wakayezga kuchita. Pakuyowoya za chibwezi chake na Alicia, wakuti: “Tikachitanga vinthu vinyake ivyo vikatovwira kuti timanyane makora. Kanandi vikaŵanga vinthu vipusu waka, nga nkhuphikira lumoza chakurya panji kugwilira lumoza ntchito zinyake zapanyumba. Kwizira mu vyakuchitika ivi, tikamanyana ivyo waliyose wakuchita makora kweniso wakutondeka kuchita makora.”
Mungamanyanaso makora usange mukusambilira lumoza fundo za mu Baibolo. Para mwazakatorana, muzamukhumbikwira kunozga nyengo yakuchitira kusopa kwa mbumba, mwakuti Chiuta ndiyo wamulongozganinge mu nthengwa yinu. (Muph. 4:12) Ipo mwalekerachi pasono kunozga ndondomeko yakuti musambilirenge lumoza pa nyengo iyo muli pa chibwezi? Mbunenesko kuti ŵanthu awo ŵali pa chibwezi ni mbumba yayi, ndipo mubali wandaŵe mutu wa mudumbu uyu. Ndipouli, kusambira pamoza nyengo zose, kungawovwira kuti mumanye umo umoyo wauzimu wa waliyose uliri. Max na Laysa, ŵa ku United States, ŵakasangaso phindu linyake chifukwa cha kuchita nthena. Max wakuti: “Tikati taŵa waka pa chibwezi, mwaluŵiro tikamba kusambira lumoza mabuku ghithu pa nkhani zakukhwaskana na chibwezi, nthengwa, na umoyo wamumbumba. Kusambira mabuku agha kukatijulira mwaŵi wakuti tidumbiskane nkhani zakuzirwa izo mphanyi tikadumbiskana yayi patekha.”
Ivyo Tasambira
it-2-E 196 ¶7
Nyali
Lemba la Zintharika 20:27 likuti: “Mvuchi wa munthu ni nyali ya Yehova, ukusandasanda mukati mwake mose.” Ivyo munthu wakuthuta panji kuti wakuyowoya, kwali viwemi panji viheni, vikuvumbura wunthu wake wamukati.—Yaniskani na Mil 9:1.