Kanthu Kachoko Waka Ako Kakovwira Kuti Ŵanthu Ŵasange Chakurya Chauzimu

Pasono Ŵakaboni ŵa Yehova ŵakupokera chakurya chauzimu chinandi kwizira pa Intaneti kuluska kumasinda kose. Ndipouli, mu vyaru vinandi, ŵabali na ŵadumbu ŵithu ŵalije mwaŵi wa Intaneti. Ŵanyake ŵakukhala ku vigaŵa ivyo Intaneti njakusuzga, yikuchimbirachimbira, panji ku vigaŵa ivyo kulijirethu Intaneti.

Nangauli vili nthena, kweni pasono ŵabali na ŵadumbu ŵithu ŵanandi ŵangachita dawunilodi mabuku, mavidiyo, na vinyake, nanga kungaŵavya Intaneti! Kasi ivi vikuchitika wuli?

Pali kanthu kanyake kachoko waka kakuchemeka JW Box, ako kakupelekeka ku mipingo iyo yikusangana na suzgo la Intaneti. Kanthu aka tikuchita kugura ku makampani ghanyake, ndipo ŵabali ŵa mu Dipatimenti ya Kompyuta ku Beteli ŵakuŵikamo pulogiramu yinyake kuti kagwirenge makora ntchito. Kufuma apo ŵakuŵikamo mabuku, mavidiyo na vinyake ivyo vikusangika pa jw.org. Ka JW Box kalikose tikugura ndalama zakukwana madola pafupifupi 75 gha ku America.

Ku Nyumba ya Ufumu, ŵabali na ŵadumbu ŵakujoyina mafoni ghawo ku Intaneti ya JW Box kuti ŵachite dawunilodi mabuku, mavidiyo, na vinyake. Nanga ni awo ŵali na foni zakale panji zakutchipa, nawo ŵangajoyina ku Intaneti ya kanthu aka. Kweni kasi mipingo iyo yili ku vigaŵa ivyo Intaneti njakusuzga, yikuchita wuli kuti mu JW Box musangikenge vinthu viphya? Nyengo na nyengo, ofesi ya munthavi yikutumizganga mafulashi (USB) agho ghakuŵa na vinthu viphya vya pa jw.org, kuti mipingo yikaviŵike mu ma JW Box. Fulashi yimoza yikugulika pa mtengo wa madola ghanayi gha ku America.

Kasi ma JW Box ghawovwira wuli ŵabali ŵithu? Dada munyake zina lake Nathan Adruandra, uyo wakukhala ku Democratic Republic of Congo, wakuti: “Nkhamba ni kale kuyezga kuti nipange dawunilodi vidiyo ya ‘A Yehova, . . . Ine Nkhuthemba Imwe’ na ya Kumbukani Muwoli wa Loti. Kweni ghakatondekanga, ndipo paumaliro mphwayi zikanikora waka. Kweni sono nkhusuzgikaso yayi kuchita dawunilodi mavidiyo agha, ndipo ivi vikutovwira taŵapapi kuti tisambizge makora ŵana ŵithu.”

Mubali munyake uyo wakovwira mipingo umo yingagwiliskira ntchito JW Box ku Nigeria, wakuti: “Ŵabali ŵakuwona kuti JW Box ntchawanangwa chapadera cha kufuma kwa Yehova. Nakuti mbakukondwa chomene kuti pasono ŵangachita dawunilodi mabuku, mavidiyo, na vinyake ivyo vikusangika pa chigaŵa cha Ivyo Tikusambizgira Ŵanthu Baibolo.”

Ma JW Box ghakujumpha 1,700 ghali kutumizgika ku ŵabali na ŵadumbu ŵithu ku Africa, Oceania, na South America, ndipo pasono ntchito yili mukati kuti titumizgireso mipingo yinyake yinandi. Kasi ndalama zakovwira kuti vyose ivi vichitike, zikufuma nkhu? Zikufuma pa vyawanangwa ivyo vikupelekeka kuti viwovwire pa ntchito yithu ya pa charu chose, ndipo kanandi vikupelekeka kwizira pa donate.jw.org. Tikumuwongani chomene chifukwa cha mtima winu wakupa.