Sendelerani kwa Ciuta
Mweruzgi Uyo Nyengo Zose Wakucita Urunji
KASI mukutoreka mtima yayi na mikhaliro nga urunji, uwemi, na kuleka kutemwera? Mwakawiro, taŵanthu tikukhumba kuti ŵanyithu ŵaticitirenge viwemi. Nchacitima kuti mu caru mukucitika vinthu vinandi vyambura urunji. Ndipouli, Yehova Ciuta ni Mweruzgi uyo tikwenera kumugomezga. Nyengo zose wakucita urunji. Fundo iyi yalongoreka makora mu cidumbirano ico cikaŵapo pakati pa Yehova na Abrahamu ico cili kulembeka pa Genesis 18:22-32.a
Apo Yehova wakaphalira Abrahamu kuti wamuwona vinthu ivyo vikacitikanga mu Sodomu na Gomora, Abrahamu wakafipira mtima ŵanthu ŵakunyoroka awo ŵakakhalanga mu misumba iyi, kusazgapo Loti. Abrahamu wakafumba Yehova kuti: “Kasi mutimuparanye ŵakunyoroka pamoza na ŵaheni? Panji ŵalimo ŵakunyoroka makumi ghankhondi mu msumba; kasi timuparanye malo kwambura kughaleka cifukwa ca ŵakunyoroka makumi ghankhondi ŵeneaŵa ŵalimo?” (Mavesi 23, 24) Yehova wakati waparanyenge yayi misumba iyi usange mungaŵa ŵanthu ŵakunyoroka 50. Abrahamu wakaŵeyeleraso Yehova kankhondi, uku wakukhizgako ciŵelengero kufika pa ŵakunyoroka khumi. Kweni Ciuta wakati waparanyenge yayi misumba iyi usange mungaŵa ŵanthu ŵakunyoroka ŵakukwana pa ciŵelengero ico wakazunura.
Kasi Abrahamu wakapindananga na Ciuta? Yayi. Viŵenge nthena mphanyi Abrahamu wakaŵa wakujikuzga. Umo Abrahamu wakayowoyeranga vikulongora kuti wakaŵa wanchindi ndiposo wakujiyuyura. Iyo wakajiwona kuti wakuyana waka na “fuvu na vyoto.” (Vesi 27) Kweniso ivyo Abrahamu wakayowoya vikulongora kuti wakaŵa na cigomezgo cakuti Yehova wacitenge ico nchiwemi. Abrahamu wakayowoya kaŵiri kuti ‘cimuŵire kutali’ Ciuta kuti waparanye ŵakunyoroka pamoza na ŵakwananga. Abrahamu wakaŵa na cigomezgo cakuti “Mweruzgi wa caru cose tiwacite urunji.”—Vesi 25.
Kasi vyose ivyo Abrahamu wakayowoya vikaŵa vyaunenesko? Vinyake wakaneneska kweni vinyake yayi. Wakapuvya apo wakayowoya kuti mu Sodomu na Gomora mungaŵa ŵanthu ŵakunyoroka khumi. Kweni wakaneneska apo wakati Ciuta wangaparanya yayi “ŵakunyoroka pamoza na ŵaheni.” Apo Ciuta wakaparanya misumba yiheni iyi, wakaponoska Loti uyo wakaŵa wakunyoroka pamoza na ŵana ŵake ŵaŵiri ŵasungwana.—2 Petrosi 2:7-9.
Kasi nkhani iyi yikutisambizgaci vya Yehova? Apo Yehova wakaphalira Abrahamu kuti wakukhumba kuparanya misumba iyi, wakakhumbanga kuti Abrahamu nayo wayowoyepo maghanoghano ghake. Pamanyuma Ciuta wakategherezga mwakuzika apo mubwezi wake Abrahamu wakayowoyanga ivyo vikaŵa ku singo kwake. (Yesaya 41:8) Nkhani iyi yikutisambizga kuti Yehova ni Ciuta wakujiyuyura ndipo wakucindika ŵanthu awo ŵakumuteŵetera. Ntheura, tili na vifukwa vyakugomezgera Yehova, Mweruzgi uyo nyengo zose wakucita urunji.
[Mazgu ghamusi]
a Pa cidumbirano ici, Yehova wakayowoyanga kwizira mwa mungelo. Ciyelezgero cinyake wonani Genesis 16:7-11, 13.
[Cithuzithuzi pa peji 20]
Abrahamu wakafumba Yehova pakukhwaskana na Sodomu na Gomora