Kasi Mukukumbuka?
Kasi muli kuŵazgapo magazini gha Gongwe la Mulinda gha sonosono apa? Yezgani kuzgora mafumbo agha:
• Nchivici cingamovwirani kuti mulere makora ŵana?
Kuti ŵana ŵinu ŵakure makora mukwenera kuŵalongora ciyelezgero ciwemi. (Yoh. 13:15) Para mwana wacali mucoko, lekani kulindizga kuti wangacita vinthu vyakujumpha msinkhu wake. Kweni para wakukura ndipo wangamba kucita vinthu makora nga nkhujipwelelera, kusunga nyengo, ndiposo kucita makora ku sukulu. Kuti mwana wacite makora cinthu ico mukukhumba, musambizgani umo wangacitira.—5/1-CN, peji 19-20.
• Cifukwa wuli Ciuta wakamulanga yayi Aroni apo wakapanga katholi kagolide?
Aroni wakaswa dango lakukanizga kusopa vikozgo. (Ex. 20:3-5) Kweni Mozesi ‘wakamulombera’ ndipo kuŵeya kwa Mozesi kukaŵa na “nkhongono comene.” (Yak. 5:16) Aroni wakaŵa na lumbiri lwa kugomezgeka. Nangauli ŵanthu ŵakamucicizga kuti waŵapangire cikozgo, ivyo wakacita pamasinda vikalongora kuti wakakolerana navyo yayi vya kusopa katholi kagolide, cifukwa Aroni wakakolerana na ŵana Ŵalevi awo ŵakaŵa ku cigaŵa ca Yehova. (Ex. 32:25-29)—5/15, peji 21.
• Kasi Ofiri, uyo wakuzunurika mu Baibolo kuti ŵakatorangako golide wakaŵa nkhu?
Solomoni wakapangiska zingaraŵa ku Ezion-geber kuti zikatore golide ku Ofiri. (1 Mathe. 9:26-28) Dowoko ili likaŵa pafupi na malo agho pasono ghakucemeka kuti Elat na Aqaba, mu mphepete mwa Nyanja Yiswesi. Ntheura, Ofiri wakwenera kuti wakaŵa mu caru ca Arabia pafupi na Nyanja Yiswesi panji ku Africa panji ku India mu mphepete mwa nyanja.—6/1-CN, peji 15.
• Kasi ‘mafuta ghakucizga gha mu Giliyadi’ ghakimirangaci? (Yer. 8:22)
Mafuta ghakucizga gha mu Giliyadi ghakaŵa ghakununkhira, ŵakaghapanganga kufuma ku makuni ghakupambanapambana, ca kumafumiro gha dazi gha mlonga wa Yorodani, mu caru ca Giliyadi. Pakuti ghakaŵa na nkhongono yakucizga, ŵakaphakanga pa vilonda. Ŵaisrayeli ŵakaŵa mu mukhaliro wakucitiska citima comene ndipo ŵakakhumbikwiranga kupenja wovwiri, kweni ndimo ŵakacitira yayi. (Yer. 8:9)—6/1-CN, peji 21-22.
• Kasi nchivici cingawovwira Mkhristu kuti wazizipizge para munyake wa mu nthengwa wacita uleŵi?
Usange uyo wabudilika wakulondezga fundo za mu Baibolo, waleke kujipa mulandu cifukwa cakuti munyake wamwendera mphiska mwa kucita uleŵi. Ciuta wakumanya kuti mukukhumbikwira cipembuzgo. Wangamupembuzgani kwizira mu Ŵakhristu ŵanyinu.—6/15, peji 30-31.
• Kasi mungawovwira wuli mulwari?
Mumutegherezgenge comene. (Muph. 3:1, 7) Mumulengerenge lusungu na kumughanaghanira. (Rom. 12:15) Mukhozgani na kumovwira. (Kol. 4:6; 1 Yoh. 3:18) Woneseskani kuti mukuyowoyeskana nayo.(Zinth. 17:17)—7/1-CN, peji 10-13.
• Kasi tikumanya wuli kuti Ciuta walije jando?
Zgoro likusangika mu lurombo lwa Mozesi. (Sal. 90:2) Lekani Yehova wakuyowoyeka kuti ni “Themba lamuyirayira.” (1 Tim. 1:17)—7/1-CN, peji 28.
• Kasi mungacita wuli kuti muzgoŵezge ŵana ŵinu kuŵazga?
Para mukutemwa ŵana ŵinu na kuŵalongora ciyelezgero ciwemi, ciŵenge cipusu kuŵazgoŵezga kuŵazga. Ŵazgoŵezgani mabuku. Ŵazgani mwakukwezga. Ŵakhuŵilizgani kuti ŵayowoyengepo pa ivyo mukuŵazga. Lombani ŵana ŵinu kuti ŵamuŵazgirani, ndipo ŵakhuŵilizgani kufumba mafumbo.—7/15, peji 26.
• Cifukwa wuli Yesu wakaluta luŵiro yayi kwa Lazaro apo wakalwaranga kuti wakamucizge?
Apo Yesu wakafikanga, pakaŵa kuti pajumpha mazuŵa ghanayi kufuma apo Lazaro wakafwira. Kufika mwakucedwa kukawovwira kuti wacitire ukaboni Awiske. Lekani ŵanandi ŵakapulikana nayo. (Yoh. 11:45)—8/1-CN, peji 14-15.
• Kasi ‘malo gha pacanya’ ghakaŵa vici?
Kanandi malo agha ghakaŵanga pacanya pa mapiri, panji malo ghanyake ghalighose agho ŵakasoperangako ŵaciuta ŵatesi. Nyengo zinyake pa malo agha ŵakazengangapo majochero, ŵakavuŵa, na vinthu vinyake mwakuti ŵacitirengepo vinthu ivyo Ciuta wakakanizganga. (Maŵa. 33:52)—8/1-CN, peji 23.