Kasi Mukukumbuka?
Kasi muli kuŵazgapo magazini gha Gongwe la Mulinda ghasonosono apa? Yezgani kuzgora mafumbo agha:
Kasi nkhongono za Samusoni zikafumanga ku sisi lake?
Nkhongono za Samusoni zikaŵa ku sisi lake yayi. Sisi lake likimiranga ubwezi wapadera na Ciuta pakuŵa Munaziri. Ubwezi uwu ukanangika apo Delila wakameta sisi la Samusoni.—4/15, peji 9.
Pakuyaniska na mtima withu wanadi, kasi ni vinthu wuli vitatu ivyo vikukhwaska mtima withu wakuyelezgera?
(1) Vyakurya. Mtima withu wanadi ukukhumbikwira vyakurya vyakukwana ndiposo viwemi kuti uŵe makora. Ntheura pera, tikukhumbikwira kurya cakurya cauzimu cakukwana. (2) Maseŵero ghakukhozga thupi. Para tikupharazga mwamwamphu tikovwira kuti mtima withu wakuyelezgera uŵe makora. (3) Ŵanthu awo tikukhala nawo. Tingapwetekeka pacoko para tikutemwa kucezga na Ŵakhristu ŵanyithu, ŵeneawo ŵakutitemwa nadi.—4/15, peji 16.
Pamanyuma pakuti yumoza mu nthengwa wacita ubudi, kasi ŵakutorana ŵangacita wuli kuti ŵambeso kugomezgana?
Ŵakwenera (1) kuyowoya unenesko; (2) kucitira vinthu pamoza; (3) kuleka nkharo zakale; (4) kumanya umo ŵangamazgira ukali na kupenja nthowa izo ŵangakhozgera ubwezi wawo.—5/1, peji 12-15.
Cifukwa wuli uyo wakuyowoya nkhani ya nyifwa wakwenera yayi kuyowoya kuti lemba la Salmo 116:15 likuyowoya za munthu uyo wafwa?
Lemba ili likuti: “Mu maso gha Yehova nyifwa ya ŵatuŵa ŵake njakuzirwa.” Ici cikung’anamura kuti Ciuta wazomerezgenge yayi kuti ŵanthu ŵake wose ŵakugomezgeka ŵafwe. Wazomerezgenge yayi kuti ŵateŵeti ŵake ŵakugomezgeka wose ŵakomeke pa caru capasi.—5/15, peji 22.
Kasi makopotara ŵakaŵa anjani?
Pambere cilimika ca 1931 cindafike, ŵapayiniya ŵakacemekanga kuti “makopotara.”—5/15, peji 31.
Kasi ni fundo wuli zinyake izo zikulongora kuti Baibolo likuyana yayi na mabuku ghanyake ghakulembeka na ŵanthu?
Baibolo lili na maucimi ghanandi agho ghali kufiskika. Likuneneska pa nkhani ya mdauko, ni vidokoni waka yayi. Likuneneska pa nkhani ya sayansi, ndipo ndakukolerana. Ndakovwira nanga ni sono.—6/1, peji 4-8.
Kasi mazgu agho ghali pa lemba la Daniel 2:44 ghakuti “mauthemba ghose agha,” ghakuyowoya vya mauthemba ngani?
Mazgu agha ghakuyowoya vya mauthemba panji maboma, agho vigaŵa vyakupambanapambana vya cikozgo ico Daniyeli wakalongosora vikwimira.—6/15, peji 17.
Kasi mphawuli apo Uthemba wa pa Caru Cose wa Britain na America ukaŵira uthemba wa pa caru cose wacinkhondi na ciŵiri wa mu ucimi wa mu Baibolo?
Uthemba uwu ukamba apo Britain na United States ŵakamba kucitira lumoza vinthu pa Nkhondo Yakwamba ya Caru Cose.—6/15, peji 19.
Kasi Ciuta wakugowokera wuli na kuleka kukumbukaso zakwananga za ŵanthu awo ŵapera?
Yehova wakuyowoya za ŵanthu awo waŵagowokera, kuti: “Ndikumbukengeso uheni wawo cara.” (Yer. 31:34) Wakugowokera zakwananga cifukwa ca sembe yakuwombora. Para Ciuta wagowoka, wakuluwa zakwananga izo tikacita mu fundo yakuti wazamuzikumbukaso yayi mwakuti watipeso cilango cinyake.—7/1, peji 18.
Cifukwa wuli tikugomezga minthondwe iyo yili kulembeka mu Baibolo?
Kanandi yikacitikiranga pa maso pa wumba, kuti yikacitikiranga kuubende yayi. Yikacitikanga mu nthowa yipusu, kwambura viteŵetero vyapadera. Yikacitikanga kuti Ciuta wapike ucindami, ŵanthu yayi. Minthondwe yinandi yikacitika, ndipo ŵakususka ŵa mu nyengo yira ŵakakayikira yayi kuti yikacitika. Ivi ni vifukwa vyakugomezgera minthondwe iyo yili kulembeka mu Baibolo.—8/1, peji 7-8.