Makani Ghawemi ku Ŵanthu Ŵamitundu Yose

Yesu wakati wawuskika, cipulikano ca ŵasambiri cikakhora comene ndipo ŵakamba kupharazga mwamwamphu. Mwaciyelezgero, Paulosi yekha wakenda ku Asiya na Meditereniyani. Wakambiskanga mipingo na kukhozga Ŵakhristu kuti ŵaleke kutolera nkharo ziheni, kweniso kuti ŵazizipizgenge para ŵakususkika. Nangauli pakaŵa masuzgo, kweni ŵanandi ŵakazgoka Ŵakhristu.

Paulosi wakajalirika mu jele. Ndipouli, wakalutilira kulembera makalata mipingo kuti wayikhozge na kuyipa ulongozgi. Wakaŵacenjezga za ucigaluka uwo ukaŵa pafupi kwamba. Mwakulongozgeka na mzimu utuŵa, Paulosi wakawonerathu kuti “mphumphi zikali” zizamunjira pakati pawo na kuyowoya “vinthu vyakunyongoloka” kuti “ŵaguzire ŵasambiri kwa iwoŵene.”—Milimo 20:29, 30.

Ucigaluka uwu ukamba cakuumaliro wa nyengo ya Ŵakhristu ŵakwambilira. Panyengo yeneyiyi, Yesu wakamuwoneska mboniwoni mpositole Yohane ya umo vinthu vizamuŵira kunthazi. Pamasinda, Yohane wakalemba kuti ŵakususka panji ŵasambizgi ŵatesi ŵangamutondeska yayi Ciuta kufiska khumbo lake ilo wakalengera caru na ŵanthu. “Mtundu uliwose na fuko na lulimi na ŵanthu” wose ŵazamupulika makani ghawemi gha Ufumu wa Ciuta. (Uvumbuzi 14:6) Caru cizamuzgoka Paradiso ndipo waliyose uyo wangatemwa kucita khumbo la Ciuta wangazakaŵamo.

Kasi imwe mukuwona kuti uwu ni “uthenga uwemi” yayi? Usange ndimo mukuwonera, ipo manyani vinandi kufuma mu Baibolo na kuwona umo uthenga wake ungamovwilirani sono kweniso munthazi.

Mungaŵazga Baibolo pa www.jw.org. Pa Webusayiti iyi mungasangaposo maburosha agha: Kasi mu Baibolo Muli Uthenga Wuli? na Ciuta Wakutiphalira Uthenga Uwemi! Kweniso buku lakuti Kasi Baibolo Likusambizgaci Comenecomene? Paliso mabuku ghanyake agho ghakulongosora cifukwa ico tingagomezgera Baibolo na umo tingalondezgera ulongozgi wa mu Baibolo pa mbumba panji patekha. Para mukukhumba kumanya vinandi, mungafumba Kaboni wa Yehova waliyose.

—Yafuma pa Milimo, Ŵaefeso, Ŵafilipi, Ŵakolose, Filemone, 1 Yohane, na Uvumbuzi.