Kasi Umoyo Winu Wamunthazi Ukuthemba pa Vichi?
Ŵanthu ŵanandi ŵakugomezga kuti pali nkhongono yambura kuwoneka iyo yingaŵawovwira kuti vinthu vizakaŵayendere makora kunthazi. Ivi vikuŵapangiska kuti ŵambe kuchita vinthu vyakupambanapambana ivyo ŵakugomezga kuti vingaŵawovwira kuti vinthu vizakaŵayendere makora paumoyo wawo. Vinyake ivyo ŵakugomezga tavizunura pasi apa.
IVYO ŴANANDI ŴAKUGOMEZGA
ŴAKUMANYA VYA NYENYEZI: Ŵanthu ŵanyake ŵakugomezga kuti umo nyenyezi zikundandira pa nyengo iyo munthu wakubabika zikulongora umo vinthu vizamuŵira paumoyo wake kunthazi. Ŵakuluta ku ŵakumanya vya nyenyezi na kuŵafumba ivyo viŵachitikirenge munthazi ndipo ŵakwamba kuchita vinthu mwakuti ŵagege soka panji kuti viŵayendere makora.
KULUTA KU ŴAKUWUKWA: Ŵanyake ŵakugomezgeka kuti vingaŵayendera makora para ŵangafumba munthu wakuwukwa ivyo ŵangachita kuti vinthu viŵayendere makora. Lo Winga uyo wakukhala ku Hong Kong, wakati, “Munthu munyake wakaniphalira kuti para naŵika chinthumwa mu shopu mwane vinovwirenge kuti nisange ndalama zinandi.”
KUSOPA ŴASEKURU AWO ŴALI KUFWA: Ŵanthu ŵanyake ŵachali kugomezga kuti ŵakwenera kusopa ŵakufwa kuti ŵaŵavikilire kweniso kuŵatumbika. Van uyo wakukhala ku Vietnam, wakuti, “Nkhagomezganga kuti para nkhuchindika ŵasekuru awo ŵali kufwa, ine pamoza na ŵana ŵane tingaŵa na umoyo uwemi sono kweniso munthazi.”
KUBABIKASO KUNYAKE: Ŵanthu ŵanandi ŵakughanaghana kuti umoyo wa munthu ukumara yayi chifukwa para wafwa wakubabikaso ku malo ghanyake. Ndipo ŵakuti vinthu viwemi panji viheni ivyo ŵakukumana navyo pasono ntchifukwa cha ivyo ŵakachita paumoyo wakumasinda.
Kweni ŵanthu ŵanandi ŵakuwona vigomezgo ivi kuŵa vyamizimu. Nangauli ŵanthu ŵanandi ŵakuti ŵakugomezga yayi vyamizimu, kweni ŵachali kuchitako maluso gha vyamizimu nga nkhusanda mizere ya mu mawoko, kuchita mayere, kuwukwa, kugwiliskira ntchito makadi gha vyamasalamusi, na vinyake vyanthena. Iwo ŵakughanaghana kuti panji maluso agha ghangaŵawovwira kumanya ivyo vizamuŵachitikira munthazi.
KASI NTCHIVICHI CHACHITIKA?
Kasi ŵanthu awo ŵakugomezga ivyo vyazunulika apa ŵakukhala umoyo uwemi sono kweniso vinthu vizamuŵayendera makora munthazi?
Wonani ivyo vikachitikira Hào, uyo wakukhala ku Vietnam. Wakagomezganga ŵakumanya vya nyenyezi, ŵakuwukwa, na ŵasekuru awo ŵali kufwa kuti ŵamulongozge. Kasi vikamovwira? Hào wakati, “Bizinesi yane yikawa, nkhaŵa na ngongole, tikakolerananga yayi mu banja kweniso nkhasuzgika chomene maghanoghano.”
Qiuming, wa ku Taiwan, nayo wakagomezganga ŵakumanya vya nyenyezi, ŵakuwukwa, kusopa ŵasekuru awo ŵali kufwa, kweniso kuti munthu wakubabikaso kunyake. Kweni wakati wasanda mwakukwana, wakati: “Nkhamanya kuti mitheto iyi yikususkana, kweniso njakutimbanizga. Nkhasanga kuti ivyo ŵakumanya vya nyenyezi ŵakuyowoya kanandi vikuŵa vyautesi. Kweniso pa fundo yakuti munthu wakukababikaso ku malo ghanyake, usange wababikaso wakukumbuka chilichose yayi vya umoyo wake wakale, kasi sono wangasintha wuli na kwamba kuchita viwemi?”
“Nkhamanya kuti mitheto iyi yikususkana, kweniso njakutimbanizga.”—QIUMING, TAIWAN
Nga umo Hào, Qiuming na ŵanyake ŵanandi ŵamanyira, umoyo uwemi wamunthazi ukuthemba pakuchita vyamizimu yayi nga nkhugomezga nyenyezi, ŵasekuru ŵakufwa, panji fundo yakuti munthu wakubabikaso para wafwa. Kweni kasi fundo iyi yikung’anamura kuti palije icho tingachitapo kuti vinthu vizakatendere makora munthazi?
Ŵanthu ŵanandi wakughanaghana kuti para ŵasambira chomene kweniso ŵasambazga, mbwenu ŵazamuŵa na umoyo uwemi munthazi. Kasi ntchivichi chachitika ku ŵanthu ŵanyake awo ŵafiska vinthu ivi?
a Mu nkhani iyi kweniso zakulondezgapo mazina ghanyake ghasinthika.
b Mazgu agha ghafuma mu Malemba Ghakupatulika pa Ŵagalatiya 6:7. Fundo yake yikuyana na iyo ŵanthu ŵanandi ŵakuyowoya kuti: “Para mwapanda vimwamaji muzamuvuna vimwamaji; para mwapanda ntchunga muzamuvunaso ntchunga.”[12]