Mafumbo Ghakufuma ku Ŵaŵazgi
Kasi ntchito yakupharazga makani ghawemi yizamumara pawuli?
Yesu wakati: “Makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose, penepapo ndipo umaliro wizenge.” (Mat. 24:14) Lizgu la Chigiriki ilo lili kung’anamulika kuti “umaliro” pa vesi ili, kweniso vesi 6 na 13, ni teʹlos. Ndipo likung’anamura umaliro nkhanira wa charu cha Satana pa Aramagedoni. (Chivu. 16:14, 16) Ichi chikung’anamura kuti tilutilirenge kupharazga makani ghawemi m’paka apo Aramagedoni yizamukhala pachoko kwamba. Fundo iyi yikusintha umo tikapulikiskiranga kale pa nkhani iyi.
Kumasinda uku, tikatenge tizamuleka kupharazga makani ghawemi para suzgo yikuru yazakamba ndipo suzgo iyi yizamwamba na kuparanyika kwa Babuloni Mukuru. (Chivu. 17:3, 5, 15, 16) Tikaghanaghananga kuti para suzgo yikuru yamba, ndiwo uzamuŵa umaliro wa “chaka cha Yehova chakulongolera lusungu.” (Yes. 61:2) Tikaghanaghanangaso kuti awo ŵazamupona pa suzgo yikuru ni awo ŵakalongora kale kuti ŵakateŵeteranga Yehova mwakugomezgeka pambere suzgo iyi yindafike. Tikaŵayaniskanga na Ŵayuda awo ŵakapona apo Yerusalemu wakaparanyikanga mu 607 B.C.E. Ŵanthu aŵa ŵakaŵikika kale chimanyikwiro chakuti ŵaponoskeke chifukwa ŵakasopanga Yehova na kutinkha uheni. (Ezek. 5:11; 9:4) Ndipouli, ivi vikukolerana yayi na ivyo Yesu wakayowoya pa Mateyu 24:14, apo pakulongora kuti ŵanthu ŵangazakaŵa na mwaŵi wakupulika makani ghawemi na kuchitapo kanthu, m’paka apo kuzamukhala pachoko chomene kuti umaliro wize, apo mpha Aramagedoni.
Kapulikiskiro kaphya ka lemba la Mateyu 24:14, kakusinthaso umo tikapulikiskiranga vya uthenga wa nga ni vula yikuru yamalibwe, uwo ukuyowoyeka pa Chivumbuzi 16:21. Tati tasandaso makora, tasanga kuti malemba ghaŵiri agha ghakukhozgera fundo yakuyana waka. Chifukwa wuli tikuyowoya nthena? Tikuyowoya nthena chifukwa cha ivyo Baibolo likulongosora pa nkhani ya umo ŵanthu ŵakuchitira pamanyuma pakupulika uthenga wa Ufumu. Mpositole Paulosi wakalemba kuti ku “awo ŵakuponoskeka,” uthenga uwu ni makani ghawemi kwa iwo, ni “sungu la umoyo.” Kweni ku ŵalwani ŵa Chiuta, ni makani ghaheni, ni “sungu la nyifwa.” (2 Kor. 2:15, 16) Iwo ŵakuwutinkha uthenga wa Ufumu chifukwa ukuvumbura pakweru kuti charu icho iwo ŵakuchitemwa ntchiheni, chikuwusika na Satana, ndipo sonosono apa chiparanyikenge.—Yoh. 7:7; 1 Yoh. 2:17; 5:19.
Chinyake ntchakuti vula yamalibwe iyo yikuyowoyeka pa Chivumbuzi 16:21, yizamuŵa ‘yikuru chomene.’ Ichi chingang’anamura kuti pa suzgo yikuru, uthenga uwo tizamupharazganga ungazakaŵa wakudunjika chomene, ndipo ivi vizamupangiska kuti zina la Yehova lizakamanyikwe chomene kuluska kumasinda kose. (Ezek. 39:7) Pamanyuma pakuti Babuloni Mukuru waparanyika, kasi ŵanthu ŵanyake pa nyengo iyi ŵangazakanweka na uthenga uwu, nga umo vikuŵira para wamunthu wapulika kasungu kawemi? Vingazakachitika. Panji ŵangazakakumbuka panjiso kupulika kuti kwa vyaka vinandi Ŵakaboni ŵa Yehova ŵakapharazganga kuti chisopa chautesi chizamuparanyika.
Ivi vikuyanako waka na ivyo vikachitika ku Eguputo mu nyengo yakale pamanyuma pa Miliri 10 iyo yikachitika mu charu ichi. Pamanyuma pakuti Yehova “[weruzga] ŵachiuta wose ŵa Eguputo,” apo ŵanthu ŵake ŵakafumangamo mu charu ichi, ŵakalutira lumoza na “ŵanthu ŵanandi ŵamitundu yinyake.” (Eks. 12:12, 37, 38) Ŵanthu ŵamitundu aŵa ŵakwenera kuti ŵakasankha kuŵa ku chigaŵa cha Yehova pamanyuma pakuwona kuti vyose ivyo Mozesi wakayowoya vyakukhwaskana na Miliri 10, vikafiskika nadi.
Ntheura wose awo ŵazamusintha na kuŵa ku chigaŵa cha Yehova pamanyuma pa kuparanyika kwa Babuloni Mukuru, ŵazamuŵa na mwaŵi wakovwira ŵabali ŵa Khristu awo ŵazamuŵa kuti ŵachali pano pasi. (Mat. 25:34-36, 40) Kweni mwaŵi wakuti ŵeruzgike kuŵa mberere uzamumara para kwakhala pachoko kuti Aramagedoni yambe, apo ŵakuphakazgika ŵaumaliro awo ŵazamuŵa pano pasi ŵazamupokera njombe yawo ya kuchanya.
Kapulikiskiro kaphya aka kakulongora pakweru chitemwa chikuru icho Yehova wali nacho kweniso lusungu lwake. Nadi, iyo “wakukhumba yayi kuti munyake waparanyike, kweni wakukhumba kuti wose ŵang’anamuke mtima.”—2 Pet. 3:9.