Kukwera Mtengo kwa Vinthu pa Charu Chose na Kuchepa Nkhongono kwa Ndalama—Kasi Baibolo Likutipo Wuli?

Mu lipoti lake la June 2022, pulezidenti wa World Bank Group wakati “Chuma cha charu chose chiliso pangozi yakofya. Ulendo uwu chanjira pasi chomene ndipo nangauli chikuŵa nga kuti chikuweleramo kweni chikuweleramo mwapachokopachoko chomene.”

Wupu wa International Monetary Fund ukati: “Mtengo wa mafuta na chakurya wakwera chomene, ndipo ŵanthu awo ŵali mu vyaru ivyo ni vikavu nakale ndiwo ŵakutambura chomene na suzgo ili.”

Baibolo likutovwira kupulikiska chifukwa icho tikusangirana na masuzgo gha vya chuma, ndipo likutipa ulongozgi wa umo tingazizipizgira, kweniso likutipa chigomezgo chiwemi chakuti suzgo ili lizamumalirathu panthazi apa.

Kukwera kwa vinthu mu nyengo ya “mazuŵa ghaumaliro”

• Baibolo likuti nyengo izo tilimo ni “mazuŵa ghaumaliro.”—2 Timote 3:1.

• Yesu wakati mu mazuŵa ghaumaliro “kuzamuwoneka vyakofya,” panji kuti vinthu vyakuchitiska wofi. (Luka 21:11) Kukwera kwa vinthu na kuchepa nkhongono kwa ndalama kungatichitiska wofi. Ŵanthu ŵakufipa mtima na vyamunthazi ndipo ŵakumanya makora yayi usange ŵazamufiska kusangira mbumba zawo vinthu vyakukhumbikwa.

• Buku la Chivumbuzi likayowoyerathu vya kukwera mtengo kwa chakurya mu mazuŵa ghithu agha. “Nkhapulika mazgu . . . ghakati: ‘Kilo limoza la tirigu mtengo wake ni dinari limoza, ndipo makilo ghatatu gha balere mtengo wake ni dinari limoza.’”—Chivumbuzi 6:6.

Kuti mumanye vinandi vya “mazuŵa ghaumaliro” na uchimi wa mu buku la Chivumbuzi, wonelerani vidiyo yakuti, Charu Chasintha Chomene Kufuma mu 1914 na kuŵazga nkhani yakuti “Kasi Ŵanalume Ŵanayi Awo Ŵakwera pa Mahachi Mbanjani?”

Kasi suzgo la vya chuma lizamumara wuli?

• “Ŵazamuzenga nyumba na kukhalamo, ndipo ŵazamupanda minda ya mpheska na kurya vipambi vyake. Ŵazamuzenga chara, munyake na kukhalamo, nanga nkhupanda, ŵanyake na kurya.”—Yesaya 65:21, 22.

• “Muzamuŵa vyakurya vinandi mu charu. Vizamuŵa na pachanya pa mapiri.”—Salimo 72:16.

• “Yehova wakuti: ‘Pakuti ŵakusuzgika ŵakuyuzgika, ŵakavu ŵakutampha, niwukenge na kuchitapo kanthu.’”—Salimo 12:5.a

Sonosono apa Chiuta wamazgenge masuzgo ghose gha vya chuma, mu charu chimoza pera yayi, kweni pa charu chose chapasi. Kuti muwone umo wazamuchitira, ŵazgani nkhani yakuti “Kasi Ntchamachitiko Kuti Tose Tiŵe Ŵakuyana pa Nkhani ya Vyachuma?”

Nanga pangaŵa pasono nthena, Baibolo lingamovwirani kulimbana na suzgo la kukwera kwa vinthu. Mu nthowa wuli? Lili na ulongozgi wakovwira pa nkhani ya umo mungagwiliskira ntchito ndalama mwamahara. (Zintharika 23:4, 5; Mupharazgi 7:12) Kuti mumanye vinandi, ŵazgani nkhani yakuti “Mupwelelerenge Ndalama na Vinthu Ivyo Muli Navyo” na yakuti “Ivyo Mungachita Kuti Mukhalenge Umoyo Wambura Kukhumba Vinandi.”