2 Berɛsosɛm
16 Asa ahennie afe a ɛtɔ so aduasa nsia mu no, Israel hene Baasa+ baa Yuda so, na ɔfirii aseɛ sɛ ɔrekyekyere Rama+ sɛdeɛ ɛbɛyɛ a obiara remfiri adi nkɔ Yuda hene Asa nkyɛn na obiara remfiri ne nkyɛn mma.+ 2 Ɛnna Asa yii dwetɛ ne sika firii Yehowa fie+ ne ahemfie+ akoradeɛ mu de kɔmaa Siria+ hene Ben-Hadad+ a ɔte Damasko+ no, na ɔka kyerɛɛ no sɛ: 3 “Apam da me ne wo ntam, ne me papa ne wo papa ntam. Merebrɛ wo dwetɛ ne sika. Kɔ, na kɔtwa apam a wo ne Israel hene Baasa+ ayɛ no mu na ɔmfiri me so nkɔ.”+
4 Ɛnna Ben-Hadad tiee Ɔhene Asa, na ɔsomaa n’asahene kɔɔ Israel nkuro so, na wɔkɔyɛɛ Eyon+ ne Dan+ ne Abel-Maim+ pasaa, ɛne Naftali+ nkuro mu akoraeɛ+ nyinaa. 5 Na Baasa teeɛ no, ntɛm ara na ɔgyaee Rama kyekyerɛ, na ɔtwaa adwuma a ɔreyɛ no so.+ 6 Ɛnna Ɔhene Asa de Yuda+ nyinaa kɔeɛ, na wɔkɔsesaa aboɔ ne nnua a na Baasa de rekyekyere+ Rama+ no, na ɔde kɔkyekyeree Geba+ ne Mispa.+
7 Saa berɛ no, ɔdehwɛfoɔ Hanani+ baa Yuda hene Asa nkyɛn bɛka kyerɛɛ no sɛ: “Sɛ́ wode wo ho ato Siria hene soɔ+ na woamfa wo ho anto Yehowa, wo Nyankopɔn soɔ+ nti, Siria hene asraafoɔdɔm no afiri wo nsa. 8 Etiopiafoɔ+ ne Libiafoɔ+ no, na wɔnyɛ asraafoɔdɔm kɛseɛ paa a wɔwɔ nteaseɛnam ne apɔnkɔsotefoɔ pii anaa?+ Na berɛ a wode wo ho too Yehowa soɔ no, wamfa wɔn anhyɛ wo nsa?+ 9 Yehowa deɛ, n’ani+ kyini asase so baabiara+ sɛ ɔde n’ahoɔden bɛdi ama wɔn a wɔn akoma+ di mu wɔ ne ho. Asɛm yi mu deɛ, woadi nkwaseasɛm,+ na ɛfiri nnɛ rekorɔ, akodie bɛba wo so.”+
10 Nanso Asa bo fuu ɔdehwɛfoɔ no, na ɔde no bɔɔ dua mu wɔ nneduafie,+ ɛfiri sɛ asɛm yi maa n’ani bereeɛ.+ Saa berɛ no, Asa hyɛɛ ɔmanfoɔ no binom nso so.+ 11 Asa ho nsɛm nyinaa, ne mfitiaseɛ kɔsi n’awieeɛ, hwɛ, wɔatwerɛ no Yuda ne Israel Ahemfo Nwoma+ no mu.
12 Na Asa ahennie afe a ɛtɔ so aduasa nkron mu no, ɔyaree ne nan, na ne yareɛ no mu yɛɛ den yie;+ ne yareɛ mu mpo, wanhwehwɛ Yehowa akyiri kwan+ na mmom ɔkɔdii ayaresafoɔ akyi.+ 13 Na Asa ne n’agyanom kɔdaeɛ;+ ɔwuu n’ahennie afe a ɛtɔ so aduanan baako mu. 14 Enti wɔsiee no wɔ ne da+ a ɔtuu no Dawid Kuro+ mu no mu; wɔdedaa no wɔ mpa a balsam ngo+ ne sradehwam+ ahodoɔ a wɔahyɛ da afra,+ ayɛ so ma so. Na wɔhyee ɔhyeɛ kɛseɛ paa+ maa no wɔ n’ayie ase.