Hiob

6 Ɛnna Hiob buaa sɛ:

 2 “Sɛ anka wɔrekari m’ahometeɛ+ nyinaa,

Na wɔde m’amanehunu nso agu nsania mu ɛ!

 3 Anka emu bɛyɛ duru asene mpoano anwea mpo.

Ɛno nti na me nsɛm ayɛ hatuhatu yi.+

 4 Adeɛ nyinaa so Tumfoɔ agyan aba me so,+

Na me honhom renom emu borɔ;+

Ahudeɛ a ɛfiri Onyankopɔn hɔ atwa me ho ahyia.+

 5 Sɛ serɛ so afunumu+ nya serɛ a, ɔsũ anaa?

Na nantwie nya aduane a, ɔsũ?

 6 Obi bɛdi aduane tayoo a ɔnto mu nkyene anaa?

Na dɛ bi wɔ dua mu nsuo matãã mu?

 7 Me kra mpɛ sɛ ɛbɛkã emu biara.

Ɛte sɛ m’aduane mu abofonodeɛ.

 8 O sɛ anka mɛnya m’abisadeɛ

Na Onyankopɔn ama m’anidasoɔ aba mu ɛ!

 9 Sɛ anka Onyankopɔn bɛpɛkyɛ me,

Na wayi ne nsa atwa me afiri hɔ ɛ!+

10 Ɛno mpo anka mɛnya awerɛkyekyerɛ ara,

Na madi ahurisie+ me yea kɛseɛ mu,

Sɛ wanhu mmɔbɔ mpo a; ɛfiri sɛ memfaa Ɔkronkronni+ no nsɛm nhuntaeɛ.+

11 M’ahoɔden wɔ he a mede bɛkɔ so atwɛn?+

Na ɛbɛwie me sɛn sɛ me kra bɛtena ase akyɛ?

12 M’ahoɔden te sɛ aboɔ ahoɔden anaa?

Na me honam yɛ kɔbere?

13 Ɛnyɛ boa na mentumi mmoa me ho?

Na ɛnyɛ ahoɔden a mede yɛ adwuma na wɔatu afiri me mu?

14 Deɛ ɔde adɔeɛ kame ne yɔnko no,+

Ɔde adeɛ nyinaa so Tumfoɔ no suro nso to nkyɛn.+

15 Me ara me nuanom atwa nkontompo+ sɛ awɔ berɛ mu asuo a ɛsene,

Wɔte sɛ awɔ berɛ mu asuo a ɛtwam korɔ.

16 Nsukyeneeɛ ma ani biri,

Sukyerɛmma hunta mu.

17 Sɛ berɛ sõ a, nsuo no sã,+ na ɛyɛ dinn;

Sɛ ahuhuro ba a, ɛwe.+

18 N’akwan dane fa baabi;

Ɛkɔ baabi a hwee nnie, na ɛyera.

19 Tema+ akwantufoɔ hwehwɛ emu nsuo,

Na Saba+ akwantufoɔ kuo nso twɛn no.

20 Wɔn ani wu ɛfiri sɛ wɔn ani da so;

Wɔba bɛduru hɔ nanso wɔn nsa si fam.+

21 Afei mo saa mmarima yi, monyɛ hwee;+

Moahunu ahudeɛ, mo akoma atu.+

22 Maka akyerɛ mo sɛ momma me biribi anaa?

Na maka akyerɛ mo sɛ momfa mo tumi nyɛ biribi mma me?

23 Maka akyerɛ mo sɛ monnye me mfiri ɔtamfo nsam?+

Na maka akyerɛ mo sɛ monnye me mfiri atirimuɔdenfoɔ nsam anaa?+

24 Monkyerɛkyerɛ me, na me deɛ, mɛyɛ komm;+

Mfomsoɔ a madie no, momma menhunu.+

25 Teeyɛ nsɛm deɛ—O ɛnyɛ ya koraa!+

Nanso, mo animka no, ɛyɛ deɛn ho animka?+

26 Enti me nsɛm ho animka na mofa ho adwene,

Berɛ a ɔwerɛhoni nsɛm+ te sɛ mframa?+

27 Sɛ monya nnyanka+ so ntonto mpo a, mobɛbɔ,

Na monya mo yɔnko a, mobɛtɔn no!+

28 Na afei, mo ara monhwɛ me,

Na monhwɛ sɛ mɛdi atorɔ+ mo anim anaa.

29 Mesrɛ mo, monsan nnwene ho bio; mommma deɛ ɛntene biara mmma mu;

Monsan nnwene ho bio ɛ, na me tenenee da so wɔ hɔ.+

30 Ɛyɛ mo sɛ deɛ ɛntene bi wɔ me kɛtrɛma so,

Na mosusu sɛ menhunu deɛ ama merehunu amane anaa?