Mmebusɛm
13 Ɔba a ɔtie ne papa ntenesoɔ no yɛ onyansafoɔ,+ na fɛdifoɔ ne deɛ ɔntie animka.+
2 Onipa anom aba na ɔde bɛdi nnepa,+ na deɛ nkontompofoɔ kra pɛ ne amumuyɔ.+
3 Deɛ ɔkora n’ano no hwɛ ne kra so.+ Deɛ ɔnka n’ano ntom no—ɔbɛsɛe.+
4 Ɔkwadwofoɔ kɔn dɔ, nanso ne kra nnya hwee.+ Na nsiyɛfoɔ kra deɛ, ɛbɛdɔ sradeɛ.+
5 Ɔteneneeni tan atosɛm,+ na abɔnefoɔ deɛ, wɔyɛ aniwudeɛ na wɔgu wɔn ara wɔn anim ase.+
6 Adetenenee kora onipa a ne kwan yɛ pɛ so,+ na amumuyɔ tutu ɔbɔnefoɔ ase.+
7 Obi wɔ hɔ a ɔyɛ ne ho ɔdefoɔ nanso ɔnni hwee,+ na obi yɛ ne ho ohiani nanso ɔwɔ ahonyadeɛ pii.
8 Onipa kra agyedeɛ ne n’ahonyadeɛ,+ na ohiani deɛ, ɔnte animka.+
9 Ateneneefoɔ hann na ɛbɛma wɔadi ahurisie;+ na nnebɔneyɛfoɔ kanea deɛ—ɛbɛdum.+
10 Onipa ahantan de aperepereɛ na ɛba,+ na wɔn a wɔbom tu agyina na nyansa ne wɔn teɛ.+
11 Ahonyadeɛ a ɛfiri ahuhudeɛ mu sua,+ na deɛ ɔde ne nsa boaboa ano no ma no yɛ pii.+
12 Anidasoɔ a ɛmma mu ntɛm ma akoma yare,+ na anigyinadeɛ a ɛba mu yɛ nkwa dua.+
13 Deɛ ɔbu asɛm animtia+ no, wɔbɛfa deɛ ɔde asi awowa; na deɛ ɔsuro mmara no, ɔbɛnya akatua.+
14 Onyansafoɔ mmara yɛ nkwa asutire,+ ɛdane onipa firi owuo mfidie ho.+
15 Nhunumu ma onipa nya adom,+ na nkontompofoɔ kwan yɛ mmonkyimmɔnka.+
16 Onitefoɔ yɛ n’adeɛ nimdeɛ mu,+ na ɔkwasea trɛ nkwaseasɛm mu.+
17 Ɔbɔfo bɔne hwe amaneɛ mu,+ na ɔsomafoɔ nokwafoɔ sa yareɛ.+
18 Deɛ ɔbu n’ani gu ntenesoɔ soɔ no, ohia ne animguaseɛ na ɛbɛka no,+ na deɛ ɔsɔ kasakyerɛ mu no, ɔnya animuonyam.+
19 Akɔnnɔdeɛ a obi nsa ka ma ne kra ani gye,+ na bɔne mu fire yɛ nkwaseafoɔ akyiwadeɛ.+
20 Deɛ ɔne anyansafoɔ nante no bɛyɛ onyansafoɔ,+ na deɛ ɔne nkwaseafoɔ bɔ no, ɛbɛwie no bɔne.+
21 Abɔnefoɔ na mmusuo di wɔn akyire,+ na ateneneefoɔ deɛ, papa tua wɔn ka.+
22 Onipa pa bɛgya agyapadeɛ ama ne mma mma, na ɔbɔnefoɔ ahonyadeɛ deɛ, wɔkora so ma ɔteneneeni.+
23 Ahiafoɔ afuo mu adwumayɛ ma aduane pii ba,+ na atɛntenenee a ɛnni hɔ nti, wɔpra obi kɔ.+
24 Deɛ ɔkora n’abaa tan ne ba,+ na deɛ ɔdɔ no no, ɔhwɛ tene ne so.+
25 Ɔteneneeni didi ma ne kra mee,+ na ɔbɔnefoɔ deɛ, ne yafunu bɛda mpan.+