Leviticus

23 Yehowa ka kyerɛɛ Mose sɛ: 2 “Ka kyerɛ Israelfoɔ ma wɔnte sɛ, ‘Yehowa afahyɛ+ a ɛsɛ sɛ mobɔ no dawuro+ no yɛ nhyiamu kronkron. M’afahyɛ ahodoɔ no nie:

3 “‘Momfa nnansia nyɛ adwuma, na da a ɛtɔ so nson no yɛ homeda a ɛsɛ sɛ mohome koraa;+ ɛyɛ nhyiamu kronkron. Monnyɛ adwuma biara. Baabiara a mobɛtena no, monkae sɛ ɛyɛ homeda ma Yehowa.+

4 “‘Yeinom ne Yehowa afahyɛ ahodoɔ,+ nhyiamu kronkron+ no, na ne berɛ sõ+ a mommɔ no dawuro: 5 Bosome a ɛdi kan no da a ɛtɔ so dunan+ no anwummerɛ yɛ Yehowa twam+ afahyɛ.

6 “‘Saa bosome no da a ɛtɔ so dunum no yɛ paanoo a mmɔreka nnim afahyɛ ma Yehowa.+ Enti monni paanoo a mmɔreka nnim nnanson.+ 7 Da a ɛdi kan no yɛ mo nhyiamu kronkron.+ Monnyɛ adwumaden biara. 8 Nanso mommɔ egya afɔdeɛ mma Yehowa nnanson. Na da a ɛtɔ so nson no yɛ nhyiamu kronkron. Monnyɛ adwumaden biara.’”

9 Yehowa toaa so ka kyerɛɛ Mose sɛ: 10 “Ka kyerɛ Israelfoɔ no sɛ, ‘Sɛ monya duru asase a mede ama mo no so na motwa ɛso nnɔbaeɛ a, momfa mo nnɔbaeɛ a ɛdi kan+ no atifi baako mmrɛ ɔsɔfoɔ no. 11 Afei ɔnhim aba a wɔde aba no+ Yehowa anim na moanya nhyira. Ɔsɔfoɔ no nhim no da a ɛdi homeda soɔ no. 12 Na da a mobɛma wɔahim aba no, momfa odwennini kumaa a wadi afe mmra mma wɔmfa mmɔ ɔhyeɛ afɔdeɛ mma Yehowa. 13 Afei momfa ngo mfete esiam muhumuhu efa nkyɛmu du mu mmienu mmɛbɔ aduane afɔdeɛ, egya afɔdeɛ hwamhwam, mma Yehowa. Na momfa nsã hin nkyɛmu nnan mu baako mmɛbɔ nsã afɔdeɛ. 14 Monnni paanoo anaa nkyeweɛ anaa ayuo foforɔ biara kɔsi saa da yi+ a mode mo ayɛyɛdeɛ bɛba mo Nyankopɔn anim no. Baabi a mobɛtena biara, yei yɛ ahyɛdeɛ a mobɛdi so daa, mo awoɔ ntoatoasoɔ nyinaa mu.

15 “‘Homeda no akyi da a ɛdi hɔ no, da a mode aba atifi baako bɛba abɛbɔ ohim afɔdeɛ no, monkan homeda nson mfiri saa da no.+ Ɛsɛ sɛ ɛyɛ adapɛn nson pɛpɛɛpɛ. 16 Monkan adaduonum, na yei bɛkɔ akɔsi da a ɛdi homeda a ɛtɔ so nson no akyi.+ Na momfa aduane afɔdeɛ foforɔ+ mmrɛ Yehowa. 17 Baabi a moteɛ biara, momfa paanoo mmienu+ mmɛbɔ ohim afɔdeɛ. Momfa esiam muhumuhu a mmɔreka wom+ efa nkyɛmu du mu mmienu ntõ no sɛ aba a ɛdi kan mma Yehowa.+ 18 Momfa nnwammaa anini nson+ a wɔadi afe afe a wɔte apɔ ne nantwinini kumaa baako ne adwennini mmienu nka paanoo no ho mmra. Wɔmfa mmɔ ɔhyeɛ afɔdeɛ mma Yehowa nka aduane ne nsã afɔdeɛ no ho sɛ egya afɔdeɛ hwamhwam mma Yehowa. 19 Momfa abirekyie ba+ baako mmɔ bɔne ho afɔdeɛ na momfa nnwammaa mmienu a wɔadi afe afe mmɔ asomdwoeɛ afɔdeɛ.+ 20 Na ɔsɔfoɔ no mfa nnwammaa mmienu no nka paanoo a wɔde aba a ɛdi kan yɛeɛ no ho nhim+ no sɛ ohim afɔdeɛ mma Yehowa. Ɛyɛ Yehowa akronkronneɛ a ɛbɛyɛ ɔsɔfoɔ no dea.+ 21 Mommɔ dawuro+ da no ara mma wɔnte sɛ da no yɛ mo nhyiamu kronkron. Monnyɛ adwumaden biara. Baabi a mobɛtena biara, yei yɛ ahyɛdeɛ a mobɛdi soɔ daa, mo awoɔ ntoatoasoɔ nyinaa mu.

22 “‘Sɛ motwa mo asase so nnɔbaeɛ a, ɛnsɛ sɛ motwa deɛ ɛwɔ afuo no anoano no nyinaa, na motwa wie nso a, ɛnsɛ sɛ mosesa deɛ aka aseɛ no.+ Monnya mma wɔn a ahia wɔn+ ne ahɔhoɔ a wɔte mo mu no.+ Mene Yehowa mo Nyankopɔn.’”

23 Yehowa san ka kyerɛɛ Mose sɛ: 24 “Ma Israelfoɔ aso nte sɛ, ‘Bosome a ɛtɔ so nson+ no da a ɛdi kan no, monhome koraa. Ɛyɛ nhyiamu kronkron+ a wɔbɛhyɛne totorobɛnto+ de akae. 25 Monnyɛ adwumaden biara, mmom mommɔ egya afɔdeɛ mma Yehowa.’”

26 Yehowa toaa so ka kyerɛɛ Mose sɛ: 27 “Bosome a ɛtɔ so nson yi da a ɛtɔ so du no yɛ mpata da.+ Ɛyɛ mo nhyiamu kronkron, na mo kra nni awerɛhoɔ+ na mommɔ egya afɔdeɛ+ mma Yehowa. 28 Na monnyɛ adwuma biara saa da yi, ɛfiri sɛ ɛyɛ mpata da a wɔbɛpata+ ama mo Yehowa mo Nyankopɔn anim. 29 Ɔkra biara a wanni awerɛhoɔ saa da no, wɔbɛtwa no afiri ne man mu.+ 30 Na ɔkra biara a ɔbɛyɛ adwuma bi saa da no, mɛku no afiri ne man mu.+ 31 Monnyɛ adwuma biara.+ Na baabi a mobɛtena biara, yei yɛ ahyɛdeɛ a mobɛdi soɔ daa, mo awoɔ ntoatoasoɔ nyinaa mu. 32 Ɛyɛ homeda a mobɛhome koraa,+ na bosome no da a ɛtɔ so nkron anwummerɛ no, mo kra nni awerɛhoɔ.+ Monni homeda no mfiri anwummerɛ nkɔsi anwummerɛ.”

33 Yehowa ka kyerɛɛ Mose sɛ: 34 “Ma Israelfoɔ aso nte sɛ, ‘Bosome a ɛtɔ so nson yi da a ɛtɔ so dunum no yɛ asese afahyɛ ma Yehowa, na nnanson na mode bɛdie.+ 35 Da a ɛdi kan no yɛ nhyiamu kronkron. Monnyɛ adwumaden biara. 36 Mommɔ egya afɔdeɛ mma Yehowa nnanson. Da a ɛtɔ so nwɔtwe no yɛ mo nhyiamu kronkron,+ na mommɔ egya afɔdeɛ mma Yehowa. Ɛyɛ nhyiamu titire. Monnyɛ adwumaden biara.

37 “‘Yeinom ne Yehowa afahyɛ ahodoɔ+ a ɛsɛ sɛ mobɔ no dawuro sɛ nhyiamu kronkron+ a mobɛbɔ egya afɔdeɛ+ ama Yehowa: Ɔhyeɛ afɔdeɛ+ ne aduane afɔdeɛ+ ne nsã afɔdeɛ+ sɛdeɛ wɔahyehyɛ ama da biara. 38 Ɛsono afahyɛ ahodoɔ yi na ɛsono Yehowa homeda,+ mo ayɛyɛdeɛ,+ mo bɔhyɛ afɔdeɛ,+ ne afɔdeɛ a mofiri mo pɛ mu bɔ+ ma Yehowa no nyinaa. 39 Na bosome a ɛtɔ so nson no da a ɛtɔ so dunum, berɛ a moaboaboa mo asase so nnɔbaeɛ ano no, monni Yehowa afahyɛ+ no nnanson.+ Da a ɛdi kan ne da a ɛtɔ so nwɔtwe no ɛsɛ sɛ mohome koraa.+ 40 Da a ɛdi kan no, mompɛ nnua fɛfɛ so aba ne ɛberɛ+ ne dua mman a ahahan wɔ so kusuu ne nsuano nnua, na monni ahurisie+ Yehowa mo Nyankopɔn anim nnanson. 41 Ɛyɛ Yehowa afahyɛ a ɛsɛ sɛ modi no nnanson afe biara.+ Yei yɛ ahyɛdeɛ a mobɛdi soɔ daa, mo awoɔ ntoatoasoɔ nyinaa mu; bosome a ɛtɔ so nson mu na monni afahyɛ no. 42 Montena asese mu nnanson.+ Israel man mma nyinaa ntenatena asese mu+ 43 na ama mo nkyirimma ahunu+ sɛ asese mu na memaa Israelfoɔ tenatenaeɛ berɛ a meyii wɔn firii Egypt asase soɔ no.+ Mene Yehowa mo Nyankopɔn.’”

44 Enti Mose kaa Yehowa afahyɛ ahodoɔ+ no ho asɛm kyerɛɛ Israelfoɔ no.