Leviticus
24 Yehowa ka kyerɛɛ Mose sɛ: 2 “Ka kyerɛ Israelfoɔ no na wɔmma wo ngodua ngo korɔgyenn a wode bɛgu kanea biara mu+ asɔ no daa.+ 3 Aaron nsɔ kanea a ɛsi ntwamutam a ɛsɛn Adanseɛ no ho no anim wɔ ahyiaeɛ ntomadan no mu, na ɔnhwɛ sɛ ɛbɛsi so firi anwummerɛ akɔsi anɔpa wɔ Yehowa anim daa. Ɛyɛ ahyɛdeɛ a mobɛdi soɔ daa, mo awoɔ ntoatoasoɔ nyinaa mu. 4 Ɔnsosɔ nkanea+ no wɔ sika kaneadua+ no so Yehowa anim daa.+
5 “Afei fa esiam muhumuhu tõ paanoo dumienu a wɔayɛ no sɛ kawa. Fa esiam no efa nkyɛmu du mu mmienu tõ paanoo baako biara. 6 Yɛ no akuo mmienu; hyehyɛ nsia wɔ ɛfã biara+ wɔ sika pono no so Yehowa anim.+ 7 Na fa ɛhyɛ a ɛdi mũ to kuo biara so, na yei yɛ paanoo a ɛbɛyɛ nkaeɛ adeɛ,+ egya afɔdeɛ a wɔbɔ ma Yehowa. 8 Homeda biara ɔmfa mmɛsi Yehowa anim.+ Ɛyɛ apam a me ne Israelfoɔ apam kɔsi daa. 9 Ɛbɛyɛ Aaron ne ne mma dea,+ na ma wɔnni no baabi a ɛyɛ kronkron,+ ɛfiri sɛ ɛyɛ akronkronneɛ mu adekronkron a ɛfiri egya afɔdeɛ a wɔbɔ ma Yehowa no mu. Ɛyɛ ahyɛdeɛ a ɛbɛtena hɔ daa.”
10 Da bi Israelni baa bi babarima a ne papa yɛ Egyptni+ kɔfirii Israelfoɔ mu, na Israelni baa no ba no ne Israelni barima bi firii aseɛ hamee+ nsraban no mu. 11 Aberanteɛ a ne maame yɛ Israelni yi firii aseɛ kasa tiaa dinkɛseɛ+ no, na ɔkaa ho abususɛm.+ Enti wɔde no brɛɛ Mose.+ Ná ne maame din de Selomit, Dibri a ɔfiri Dan abusuakuo mu no babaa. 12 Afei na wɔpɛ sɛ wɔhunu asɛm pɔtee a Yehowa bɛka wɔ ho,+ enti wɔde no sieeɛ.+
13 Yehowa ka kyerɛɛ Mose sɛ: 14 “Fa deɛ ɔkaa abususɛm no bra nsraban no akyi.+ Afei wɔn a wɔtee deɛ ɔkaeɛ no nyinaa mfa wɔn nsa ngu+ ne tiri so, na asafo no nyinaa nsi no aboɔ.+ 15 Na ka ma Israelfoɔ nte sɛ, ‘Obiara a ɔbɛka ne Nyankopɔn ho abususɛm no, ɔbɛsoa ne bɔne. 16 Enti wɔnkum deɛ ɔka Yehowa din ho abususɛm no.+ Asafo no nyinaa nsi no aboɔ. Obiara a ɔbɛkasa atia dinkɛseɛ no,+ ɔhɔhoɔ oo, kuromanni oo, wɔnku no.
17 “‘Sɛ obi bɔ ɔkra bi ma no wu a, ɛsɛ sɛ wɔku ɔno nso.+ 18 Na sɛ obi bɔ ayɛmmoa bi ma no wu a, ɔmfa bi nsi ananmu, ɔkra nsi ɔkra ananmu.+ 19 Sɛ obi di ne yɔnko dɛm a, deɛ ɔyɛeɛ no, wɔnyɛ ɔno nso bi.+ 20 Deɛ abuo nsi deɛ abuo ananmu, ani nsi ani ananmu, ɛse nsi ɛse ananmu. Dɛm a ɔmaa ne yɔnko diiɛ no, wɔnyɛ no saa bi.+ 21 Deɛ ɔbɛkum aboa+ no, ɔmfa bi nsi ananmu,+ nanso deɛ ɔbɛkum onipa deɛ, wɔnku no bi.+
22 “‘Ɔhɔhoɔ oo, kuromanni+ oo, atemmusɛm korɔ na ɛwɔ hɔ ma mo nyinaa, ɛfiri sɛ mene Yehowa mo Nyankopɔn.’”+
23 Afei Mose ne Israelfoɔ kasaeɛ, na wɔde deɛ ɔkaa abususɛm no baa nsraban no akyi bɛsii no aboɔ.+ Enti Israelfoɔ yɛɛ deɛ Yehowa hyɛɛ Mose no pɛpɛɛpɛ.