Leviticus

25 Yehowa toaa so ka kyerɛɛ Mose wɔ Bepɔ Sinai so sɛ: 2 “Ka kyerɛ Israelfoɔ sɛ, ‘Sɛ moduru asase a mede ama mo+ no so a, asase no nni homeda mma Yehowa.+ 3 Momfa mfeɛ nsia nnua mo mfuo mu aba, na momfa mfeɛ nsia nsiesie mo bobe nturo, na mommoaboa asase no so nnɔbaeɛ ano.+ 4 Nanso afe a ɛtɔ so nson no, monnya asase no na ɛnhome koraa;+ ɛyɛ ahomegyeɛ berɛ ma Yehowa. Monnnua aba biara, na monnsiesie mo bobeturo nso. 5 Monntwa aba a ɛno ara fifii asase no soɔ anaa bobe a wɔansiesie ho a asoɔ no. Afe mũ no nyinaa monnya asase no na ɛnhome. 6 Asase a ɛrehome no bɛma mo aduane, mo ne mo nkoa ne mo mfenaa ne apaafoɔ ne atubrafoɔ, ahɔhoɔ a wɔabɛsoɛ mo, 7 ne mo afieboa ne wuram mmoa a wɔwɔ mo asase no soɔ. Asase no so aba nyinaa yɛ wɔn aduane.

8 “‘Na monkan ɔhome mfeɛ nson, mfeɛ nson ahodoɔ nson, na ɔhome mfeɛ nson no dodoɔ bɛyɛ mfeɛ aduanan nkron. 9 Na bosome a ɛtɔ so nson no da a ɛtɔ so du+ no, momma wɔnhyɛne abɛn dendeenden.+ Saa da no yɛ mpata da,+ na momma wɔnhyɛne abɛn mo asase so baabiara. 10 Monyɛ afe a ɛtɔ so aduonum no afe kronkron, na mommɔ dawuro mma asase no sofoɔ nyinaa nnya ahofadie.+ Ɛbɛyɛ Ahofadie afe+ ama mo, na obiara nsan nkɔ n’agyapadeɛ so na obiara nsan nkɔ n’abusuafoɔ nkyɛn.+ 11 Afe a ɛtɔ so aduonum no bɛyɛ mo Ahofadie afe.+ Monnnua aba biara, na monntwa aba a ɛno ara fifii asase no soɔ anaa bobe a wɔansiesie ho a asoɔ no.+ 12 Ɛyɛ Ahofadie afe, na ɛnyɛ kronkron mma mo. Monni asase no so aba.+

13 “‘Mo mu biara nsan nkɔ n’agyapadeɛ so wɔ Ahofadie afe yi mu.+ 14 Sɛ motɔn agyapadeɛ bi ma mo yɔnko anaa motɔ biribi firi ne hɔ a, monhwɛ na obiara ansisi ne yɔnko.+ 15 Wobɛhwɛ mfeɛ dodoɔ a atwam firi Ahofadie afe no so na woatɔ agyapadeɛ afiri wo yɔnko hɔ, na ɔbɛhwɛ mfeɛ dodoɔ a wode bɛtwa so aba na watɔn ama wo.+ 16 Sɛ asase no bɛba abɛdi wo nsam mfeɛ pii a, ɛsɛ sɛ ɔma ne boɔ kɔ soro,+ na sɛ ɛbɛyɛ mfeɛ kakraa bi a, ɛsɛ sɛ ɔte boɔ no so, ɛfiri sɛ nnɔbaeɛ a wobɛnya no soɔ na ɔretɔn ama woɔ. 17 Obiara nnsisi ne yɔnko,+ na monsuro mo Nyankopɔn,+ ɛfiri sɛ mene Yehowa mo Nyankopɔn.+ 18 Enti monni m’ahyɛdeɛ so na monkora m’atemmusɛm so na momfa mmɔ mo bra. Ɛba saa a, mobɛtena asase no so dwoodwoo.+ 19 Na asase no bɛma ne nnɔbaeɛ,+ na mobɛdidi amee atena so dwoodwoo.+

20 “‘Nanso ebia mobɛka sɛ: “Yɛannua aba biara ammoaboa nnɔbaeɛ ano, na ɛdeɛn na yɛbɛdi no afe a ɛtɔ so nson no mu?”+ 21 Ɛnneɛ monhunu sɛ mɛma me nhyira aba mo so afe a ɛtɔ so nsia no mu, na ɛbɛso mfeɛ mmiɛnsa nnɔbaeɛ.+ 22 Afe a ɛtɔ so nwɔtwe no monnua aba, na mobɛdi aduane a ɛwɔ hɔ dada no akɔsi afe a ɛtɔ so nkron no. Enti ansa na mobɛtwa nnɔbaeɛ foforɔ no, mobɛkɔ so adi dada no.

23 “‘Enti monntɔn asase no korakora,+ ɛfiri sɛ asase no yɛ me dea.+ Na m’ani so deɛ, moyɛ ahɔhoɔ ne atubrafoɔ.+ 24 Na asase a modi soɔ nyinaa, momma kwan mma asase biara wura nsan ntɔ n’adeɛ.+

25 “‘Sɛ ɛhia wo nua na ɔtɔn n’agyapadeɛ bi a, ne busuani a ɔbɛn no nso mmɛtɔ deɛ ne nua no atɔn no.+ 26 Nanso sɛ ɔnni busuani biara a ɔbɛtumi asan atɔ na akyire yi biribi ba ne nsam a ɛbɛtumi atua ka no a, 27 ɔnsese mfiri afe a ɔtɔneeɛ no na ɔmfa sika a aka biara mma deɛ ɔtɔɔ agyapadeɛ no, na ɔnsan mfa n’adeɛ.+

28 “‘Na sɛ ɔnni sika a ɔde bɛsan agye n’agyapadeɛ no a, ɛbɛkɔ so atena deɛ ɔtɔeɛ no hɔ akɔsi Ahofadie afe+ no. Ahofadie afe no duru a, n’agyapadeɛ no bɛsan abɛdi ne nsam.+

29 “‘Sɛ obi tɔn fie wɔ kuro a wɔato ho fasuo mu a, ɔwɔ hokwan sɛ ɔsan tɔ n’adeɛ afe baako ntam. Afe baako na ɔwɔ hokwan sɛ ɔbɛtumi abɛtua ka asan agye n’adeɛ.+ 30 Nanso sɛ wantumi antɔ na afe so a, efie a ɛwɔ kuro a ɔfasuo wɔ ho mu yi bɛyɛ deɛ ɔtɔeɛ no dea korakora, n’awoɔ ntoatoasoɔ nyinaa mu. Sɛ Ahofadie afe no duru mpo a, ɛremfiri ne nsam. 31 Nanso afie a ɛwowɔ nkuraaseɛ a afasuo nni ho no deɛ, wɔmmu no sɛ ɛka afusase ho. Efie no wura wɔ hokwan sɛ ɔsan tɔ n’adeɛ,+ na sɛ amma saa mpo a, Ahofadie afe+ no duru a, wɔbɛgyaa mu ama no.

32 “‘Na Lewifoɔ afie a ɛwowɔ wɔn nkuro mu+ no deɛ, sɛ wɔtɔn a, wɔwɔ hokwan sɛ wɔsan nya wɔn adeɛ bio berɛ biara a wɔn ahoboa bɛso.+ 33 Sɛ ɛba sɛ Lewini bi ansan antɔ ne fie a watɔn no kuro a ɔdi soɔ no mu a, ɛnneɛ sɛ Ahofadie afe+ no so a, wɔbɛgyaa mu ama no. Deɛ enti a ɛte saa ne sɛ Lewifoɔ afie a ɛwowɔ wɔn nkuro mu no ne agyapadeɛ a wɔde ama wɔn wɔ Israel.+ 34 Na wɔn nkuro ho mfikyisase+ a mmoa bɛdidi soɔ no deɛ, wɔrentumi ntɔn, ɛfiri sɛ ɛyɛ agyapadeɛ a wɔde ama wɔn daa.

35 “‘Sɛ ɛhia wo nua ma ne ho kyere no+ a, boa no.+ Na ma no ntena wo nkyɛn sɛ ɔhɔhoɔ ne otubrafoɔ.+ 36 Nnye nsiho anaa apempensika mfiri ne hɔ,+ na suro wo Nyankopɔn+ na wo nua no ntena wo nkyɛn. 37 Woma no sika a, nnye nsiho,+ na woma no aduane a, nnye apempensika. 38 Mene Yehowa mo Nyankopɔn, na me na meyii mo firii Egypt asase soɔ sɛ mede Kanaan asase+ bɛma mo na ama moahunu sɛ mene mo Nyankopɔn.+

39 “‘Sɛ ɛhia wo nua na ɔtɔn ne ho ma wo+ a, mfa no nyɛ nkoadwuma.+ 40 Mmom ɔntena wo nkyɛn sɛ ɔpaani+ anaa otubrafoɔ. Na ɔnsom wo nkɔsi Ahofadie afe no so. 41 Afei ɔne ne mma nyinaa mfiri wo nkyɛn nkɔ n’abusuafoɔ nkyɛn, na ɔnsan nkɔfa agyapadeɛ a n’agyanom gya maa no+ no. 42 Wɔyɛ me nkoa a meyii wɔn firii Egypt asase soɔ.+ Ɛnsɛ sɛ wɔtɔn wɔn ho sɛdeɛ wɔtɔn akoa. 43 Nteetee no na nni n’ani,+ na suro wo Nyankopɔn.+ 44 W’akoa anaa w’afenaa bɛfiri amanaman a wɔatwa mo ho ahyia no mu. Wɔn nkyɛn na ɛsɛ sɛ motɔ akoa anaa afenaa biara. 45 Afei nso mobɛtumi atɔ ahɔhoɔ a wɔabɛtena mo nkyɛn+ no bi mma anaa abusuafoɔ a wɔanya wɔn mo asase soɔ no bi na wɔabɛyɛ mo agyapadeɛ. 46 Wɔyɛ agyapadeɛ a mobɛgya ama mo mma na wɔayɛ wɔn dea daa.+ Momma wɔnyɛ adwuma mma mo, na mo nuanom Israelfoɔ deɛ, monhwɛ na moanteetee wɔn anni wɔn ani.+

47 “‘Na sɛ ɛba sɛ biribi ba ɔhɔhoɔ anaa otubrafoɔ a ɔne wo teɛ no nsam na ɛhia wo nua ma enti ɔtɔn ne ho ma ɔhɔhoɔ anaa otubrafoɔ no anaa ɔhɔhoɔ no busuani bi a, 48 ne tɔn+ akyi no, hokwan wɔ hɔ sɛ wɔsan gye no.+ Ne nuanom baako bɛtumi asan atɔ no afiri hɔ.+ 49 Ne papa nua anaa ne papa nua ba anaa ne busuani biara+ bɛtumi abɛtua agye no aba fie.

“‘Sɛ nso biribi ba ɔno ara ne nsam a, ɔbɛtumi atua ka no ade ne ho.+ 50 Ɔne deɛ ɔtɔɔ no no mmu nkonta mfiri berɛ a ɔtɔɔ no no nkɔsi berɛ a Ahofadie afe+ no bɛduro, na mfeɛ dodoɔ a ɛwɔ mu no na ɛbɛkyerɛ ne boɔ.+ Ɔne no nni no sɛdeɛ ɔne ɔpaani die.+ 51 Sɛ mfeɛ a aka no dɔɔso a, ɛnneɛ ɔnhwɛ deɛ aka no so na ɔnnane sika a wɔde tɔɔ no no bi mma deɛ ɔtɔɔ no no na ɔnnye ne ho. 52 Sɛ nso aka mfeɛ kakraa bi na Ahofadie afe+ no aduru a, ɛnneɛ ɔmmu deɛ aka no ho nkonta. Na ɔnhwɛ mfeɛ a aka no so ntua sika mma deɛ ɔtɔɔ no no na ɔnnye ne ho. 53 Ɔne no nni te sɛ ɔpaani+ a ɔyɛ adwuma ma no afe afe. Nhwɛ mma ne wura nnteetee no.+ 54 Nanso sɛ wantumi annye ne ho saa kwan yi so mpo a, Ahofadie afe+ no bɛduru ama ɔne ne mma ade wɔn ho.

55 “‘Me na Israelfoɔ yɛ me nkoa. Wɔyɛ me nkoa+ a meyii wɔn firii Egypt asase soɔ.+ Mene Yehowa mo Nyankopɔn.+