1 Korintofoɔ
2 Enti anuanom, berɛ a mebaa mo nkyɛn no, mamfa nsɛm akɛseɛ+ anaa nyansa a ɛtra soɔ ammɛka Onyankopɔn ahuntasɛm kronkron+ no ankyerɛ mo. 2 Na berɛ a mewɔ mo mu no, mebɔɔ me tirim sɛ meremfa m’adwene nsi biribiara so, gye Yesu Kristo,+ ne bɔ a wɔbɔɔ no asɛndua mu no. 3 Na mede mmerɛyɛ ne ehu ne ahopopoɔ bebree na ɛbaa mo nkyɛn;+ 4 ɛnyɛ anyansasɛm a wɔde dɛfɛdɛfɛ nnipa na mede kasaeɛ, na ɛnyɛ ɛno na mede yɛɛ asɛnka adwuma no, na mmom honhom ne tumi ho adanseɛ na mede maeɛ,+ 5 na mo gyidie annyina nnipa nyansa+ so, na mmom agyina Onyankopɔn tumi+ so.
6 Na yɛka nyansa kyerɛ wɔn a wɔn ho akokwa,+ nanso ɛnyɛ wiase yi nyansa+ anaa wiase yi mu atumfoɔ+ a wɔbɛyi wɔn hɔ+ no deɛ. 7 Mmom no, yɛka Onyankopɔn nyansa wɔ ahuntasɛm kronkron+ bi mu, nyansa a wɔde sieeɛ, a Onyankopɔn hyɛ too hɔ ansa na wiase nhyehyɛeɛ+ reba sɛ ɔde bɛhyɛ yɛn animuonyam no. 8 Nyansa yi na wiase atumfoɔ+ mu biara anhunu,+ na sɛ wɔhunuiɛ a, anka wɔammɔ Awurade a ɔwɔ animuonyam no asɛndua+ mu. 9 Na mmom sɛdeɛ wɔatwerɛ no, “Nneɛma a Onyankopɔn asiesie ama wɔn a wɔdɔ no no, ani nhunuiɛ, na aso nteeɛ, na ɛmmaa nnipa akoma mu da.”+ 10 Na yɛn na Onyankopɔn nam ne honhom+ so ayi akyerɛ+ yɛn, ɛfiri sɛ honhom+ no hwehwɛ nneɛma nyinaa mu, Onyankopɔn nneɛma a emu dɔ+ no mpo.
11 Na nnipa mu hwan na ɔnim onipa ho adeɛ sɛ onipa no ara honhom+ a ɛwɔ ne mu? Saa ara nso na obi nnim Onyankopɔn ho adeɛ sɛ Onyankopɔn honhom.+ 12 Na yɛn deɛ, ɛnyɛ wiase honhom+ na yɛnyaeɛ, na mmom honhom+ a ɛfiri Onyankopɔn hɔ, na ama yɛahunu deɛ Onyankopɔn ayi ne yam de ama yɛn.+ 13 Saa nsɛm yi nso na yɛka, na yɛmfa nsɛm a wɔde nnipa nyansa+ kyerɛkyerɛ, na mmom deɛ wɔde honhom no kyerɛkyerɛ,+ na yɛde honhom mu nsɛm kyerɛkyerɛ honhom mu nneɛma mu.+
14 Na deɛ ɔdi n’akɔnnɔ akyi no nnye Onyankopɔn honhom no nneɛma, na ɛyɛ nkwaseasɛm ma no; na ɔntumi nhunu mu,+ ɛfiri sɛ wɔde honhom na ɛkari hwɛ. 15 Na deɛ Onyankopɔn honhom kyerɛ no kwan deɛ,+ ɔkari biribiara hwɛ, nanso ɔno deɛ, onipa biara nkari no nhwɛ.+ 16 Na “hwan na wahunu Yehowa adwene+ a ɔbɛtumi akyerɛkyerɛ no?”+ Na yɛn deɛ, yɛwɔ Kristo adwene.+