Krataa a Ɛdi Kan a Ɔde Kɔmaa Korintofoɔ

2 Enti anuanom, berɛ a mebaa mo nkyɛn no, ɛnyɛ nsɛm akɛseɛ+ anaa nyansa a ɛtra so na mede bɛkaa Onyankopɔn ahintasɛm kronkron+ no kyerɛɛ mo. 2 Na berɛ a mewɔ mo nkyɛn no, mebɔɔ me tirim sɛ meremfa m’adwene nsi biribiara so, gye Yesu Kristo, ne bɔ a wɔbɔɔ no asɛndua mu no.+ 3 Na mede mmerɛyɛ ne ehu ne ahopopoɔ bebree na ɛbaa mo nkyɛn; 4 ɛnyɛ anyansasɛm a wɔde dɛfɛdɛfɛ nnipa na mede kasaeɛ, na ɛnyɛ ɛno na mede yɛɛ asɛnka adwuma no, na mmom honhom ne tumi ho adanseɛ na mede maeɛ,+ 5 na mo gyidie annyina nnipa nyansa so, na mmom agyina Onyankopɔn tumi so.

6 Na yɛka nyansa ho asɛm kyerɛ wɔn a wɔanyini,+ nanso ɛnyɛ wiase yi* nyansa anaa wiase yi mu atumfoɔ a wɔbɛyi wɔn afiri hɔ no nyansa.+ 7 Mmom no, Onyankopɔn nyansa a wada no adi wɔ ahintasɛm kronkron+ bi mu no, ɛno ho asɛm na yɛka. Saa nyansa no, Onyankopɔn de sieeɛ, na ɔhyehyɛ too hɔ ansa na wiase yi* reba sɛ ɔde bɛhyɛ yɛn animuonyam. 8 Nyansa yi na wiase yi* atumfoɔ no mu biara anhunu,+ na sɛ wɔhunuiɛ a, anka wɔankum Awurade a ɔwɔ animuonyam no.* 9 Na mmom sɛdeɛ wɔatwerɛ no: “Nneɛma a Onyankopɔn asiesie ama wɔn a wɔdɔ no no, ani nhunuiɛ, na aso nteeɛ, na ɛmmaa nnipa akoma mu da.”+ 10 Na yɛn na Onyankopɔn nam ne honhom so+ ayi saa nneɛma no adi akyerɛ yɛn,+ ɛfiri sɛ honhom no hwehwɛ nneɛma nyinaa mu, Onyankopɔn nneɛma a emu dɔ no+ mpo mu.

11 Onipa bɛtumi ahunu deɛ ɛwɔ ne yɔnko nipa tirim anaa? Daabida. Deɛ ɛwɔ obi tirim deɛ, onii no akoma* nko ara na ɛnim. Saa ara na obiara rentumi nhunu deɛ ɛwɔ Onyankopɔn tirim, gye Onyankopɔn honhom. 12 Yɛn deɛ, ɛnyɛ wiase honhom na yɛnyaeɛ, na mmom honhom a ɛfiri Onyankopɔn hɔ,+ sɛdeɛ ɛbɛyɛ a yɛbɛhu nneɛma a Onyankopɔn ayi ne yam de ama yɛn no. 13 Saa nneɛma yi na yɛn nso yɛka; ɛnyɛ nsɛm a wɔde nnipa nyansa kyerɛkyerɛ+ na yɛde ka, na mmom deɛ wɔde honhom no kyerɛkyerɛ,+ na yɛde honhom mu nsɛm kyerɛkyerɛ honhom mu nneɛma mu.

14 Nanso deɛ ɔdi n’akɔnnɔ akyi no nnye nneɛma a ɛfiri Onyankopɔn honhom mu no ntom, na ɛyɛ nkwaseasɛm ma no; na ɔrentumi nhunu mu, ɛfiri sɛ wɔde honhom na ɛhwehwɛ mu. 15 Na deɛ Onyankopɔn honhom kyerɛ no kwan deɛ, ɔhwehwɛ nneɛma nyinaa mu,+ nanso ɔno deɛ, onipa biara nhwehwɛ ne mu. 16 Na “hwan na wahu Yehowa* adwene a ɔbɛtumi akyerɛkyerɛ no?”+ Na yɛn deɛ, yɛwɔ Kristo adwene.+