Krataa a Ɛdi Kan a Ɔde Kɔmaa Korintofoɔ

3 Enti anuanom, mantumi ankasa ankyerɛ mo sɛ nnipa a Onyankopɔn honhom kyerɛ mo kwan,+ na mmom mekasa kyerɛɛ mo sɛ nnipa a wɔdi wɔn akɔnnɔ akyi, nnipa a wɔyɛ mmɔfra+ wɔ Kristo mu. 2 Nufoɔ na mede maa mo, ɛnyɛ aduane a ɛyɛ den, ɛfiri sɛ na mo ho nyɛ den. Na seesei mpo, mo ho nyɛ den,+ 3 ɛfiri sɛ moda so ara di ɔhonam akɔnnɔ akyi.+ Na berɛ a ahoɔyaa ne mansotwe wɔ mo mu yi, ɛnyɛ ɔhonam akɔnnɔ akyi na modi anaa,+ na ɛnyɛ sɛdeɛ wiase no nante na mo nso monante anaa? 4 Na sɛ obi ka sɛ, “Meyɛ Paul dea,” na obi foforɔ nso ka sɛ, “Meyɛ Apolo+ dea” a, ɛnyɛ deɛ wiase no yɛ no ara bi na mo nso moreyɛ anaa?

5 Ɛnneɛ, hwan ne Apolo? Na hwan ne Paul? Yɛyɛ asomfoɔ+ a yɛyɛ adwuma a Awurade de ahyɛ yɛn nsa, a monam yɛn so abɛyɛ agyidifoɔ. 6 Me deɛ, meduaeɛ,+ Apolo guguu so nsuo,+ nanso Onyankopɔn na ɔmaa no kɔɔ so nyiniiɛ. 7 Enti ɛnyɛ deɛ ɔdua na ɔyɛ biribi, ɛnna ɛnyɛ deɛ ɔgugu so nsuo nso, na mmom Onyankopɔn a ɔma no nyini no.+ 8 Deɛ ɔdua ne deɛ ɔgugu so nsuo no yɛ baako,* nanso wɔn mu biara bɛnya ɔno ara n’akatua sɛdeɛ ɔno ara n’adwuma teɛ.+ 9 Ɛfiri sɛ yɛyɛ Onyankopɔn mfɛfoɔ adwumayɛfoɔ. Moyɛ Onyankopɔn afuo, Onyankopɔn dan.+

10 Sɛdeɛ Onyankopɔn adom a menyaeɛ no teɛ no, metoo fapem+ sɛ ɔdansini a ɔnim adwuma paa,* nanso obi foforɔ na ɔreto asi so. Enti ma obiara nkɔ so nhwɛ sɛdeɛ ɔreto asi so no yie. 11 Ɛfiri sɛ obiara nni hɔ a ɔbɛtumi ato fapem foforɔ biara, gye deɛ wɔato dada no. Ɛno ne Yesu Kristo.+ 12 Na sɛ obi de sika kɔkɔɔ, dwetɛ, aboɔden aboɔ, nnua, serɛ, anaa wura a awo si fapem no so a, 13 obiara adwuma bɛda adi; ɛda a wɔbɛsɔ ahwɛ no na ɛbɛda adi, ɛfiri sɛ egya na ɛbɛma no ada adi,+ na egya na ɛbɛkyerɛ sɛdeɛ obiara sii ne dan. 14 Sɛ obi adwuma a wato asi fapem no so gyina a, ɔbɛnya akatua. 15 Sɛ obi adwuma hye a, ɔbɛhwere adeɛ, na ɔno ara deɛ, wɔbɛgye no nkwa; nanso ɛbɛyɛ sɛ deɛ wɔagye no afiri gya mu.*16 Monnim sɛ moyɛ Onyankopɔn asɔrefie,+ na Onyankopɔn honhom te mo mu+ anaa? 17 Sɛ obi sɛe Onyankopɔn asɔrefie a, Onyankopɔn bɛsɛe no; ɛfiri sɛ Onyankopɔn asɔrefie ho te, na asɔrefie no ne mo ara.+

18 Mma obiara nnnaadaa ne ho. Sɛ mo mu bi adwene yɛ no sɛ ɔyɛ onyansafoɔ wɔ wiase yi* mu a, ma no nyɛ kwasea, na watumi ayɛ onyansafoɔ. 19 Na wiase nyansa yɛ nkwaseasɛm wɔ Onyankopɔn anim, ɛfiri sɛ wɔatwerɛ sɛ: “Fidie a anyansafoɔ de wɔn aniteɛ asum no, ɔma no yi wɔn ara.”+ 20 Wɔatwerɛ bio sɛ: “Yehowa* nim sɛ anyansafoɔ nsusuiɛ yɛ kwa.”+ 21 Enti mma obiara mmfa deɛ nnipa tumi yɛ nnhoahoa ne ho, ɛfiri sɛ adeɛ nyinaa yɛ mo dea. 22 Paul oo, Apolo oo, Kefa* oo,+ wiase oo, nkwa oo, owuo oo, nneɛma a ɛwɔ hɔ nnɛ oo, nneɛma a ɛrebɛba oo, adeɛ nyinaa yɛ mo dea; 23 mo nso moyɛ Kristo dea;+ ɛnna Kristo nso yɛ Onyankopɔn dea.