Deuteronomium
6 “Yei ne mmara nsɛm ne ahyɛdeɛ ne atemmusɛm a Yehowa mo Nyankopɔn ahyɛ sɛ wɔnkyerɛkyerɛ mo+ na moadi so asase a morekɔfa no so. 2 Ɛbɛma moasuro+ Yehowa mo Nyankopɔn na mo ne mo mma ne mo mmanana+ adi n’ahyɛdeɛ ne ne mmara a merekyerɛkyerɛ mo yi nyinaa so mo nkwa nna nyinaa na mo nna aware.+ 3 Enti Israel, tie na hwɛ sɛ wobɛyɛ+ ne nyinaa na asi wo yie+ na mo ase atrɛ ayɛ pii asase a nufosuo ne ɛwoɔ sene soɔ no so, sɛdeɛ Yehowa w’agyanom Nyankopɔn ahyɛ mo bɔ no.+
4 “O Israel, tie: Yehowa yɛn Nyankopɔn yɛ Yehowa koro.+ 5 Na fa w’akoma nyinaa+ ne wo kra nyinaa+ ne w’ahoɔden nyinaa+ dɔ Yehowa wo Nyankopɔn. 6 Na ma asɛm a mereka akyerɛ wo nnɛ yi nna w’akoma so;+ 7 na fa dua wo ba+ akomam na ka ho asɛm berɛ a wote wo fie, berɛ a wonam kwan soɔ, berɛ a woda hɔ,+ ne berɛ a woasɔreɛ. 8 Fa yɛ sɛnkyerɛnne kyekyere wo nsa,+ na ɛnyɛ nkaeɛ adeɛ wo moma so.+ 9 Twerɛ gu wo fie apono ne w’aponkɛseɛ ho.+
10 “Afei sɛ Yehowa wo Nyankopɔn de wo duru asase a ɔkaa ntam kyerɛɛ w’agyanom Abraham ne Isak ne Yakob sɛ ɔde bɛma woɔ no so,+ na ɔde nkuro akɛseɛ fɛfɛ a ɛnyɛ wo na wokyekyereeɛ,+ 11 ne afie a nnepa ayɛ mu mã a ɛnyɛ wo na wode baeɛ, ne mmura a wɔatuo a ɛnyɛ wo na wotuiɛ, ne bobeturo ne ngo nnua a ɛnyɛ wo na woduaeɛ ma wo, na wodidi mee+ a, 12 hwɛ yie na wo werɛ amfiri+ Yehowa a ɔde wo firi Egypt nkoafie baeɛ no. 13 Yehowa wo Nyankopɔn na suro no,+ ɔno na som no,+ na ne din na fa ka ntam.+ 14 Monnkɔdi anyame foforɔ a aman a wɔatwa mo ho ahyia no som wɔn no akyi,+ 15 (ɛfiri sɛ Yehowa mo Nyankopɔn a ɔwɔ mo mfimfini no yɛ Onyankopɔn a ɔmpɛ sɛ ɔne obi bɛkyɛ ne som,)+ na Yehowa mo Nyankopɔn abufuo annɛre antia mo+ na wantɔre mo ase amfiri asase so.+
16 “Monnsɔ Yehowa mo Nyankopɔn nnhwɛ+ sɛdeɛ mosɔɔ no hwɛɛ Masa no.+ 17 Monhwɛ sɛ ɛkwan biara so mobɛdi Yehowa mo Nyankopɔn mmara+ ne ne nkaesɛm+ ne n’ahyɛdeɛ+ a ɔde ama mo no nyinaa so.+ 18 Monyɛ deɛ ɛtene ne deɛ ɛyɛ wɔ Yehowa ani soɔ na asi mo yie+ na moakɔfa asase pa a Yehowa kaa ho ntam kyerɛɛ mo agyanom no.+ 19 Na mobɛpamo mo atamfo nyinaa afiri mo anim sɛdeɛ Yehowa ahyɛ bɔ no.+
20 “Ebia daakye mo mma bɛbisa mo+ sɛ, ‘Na nkaesɛm ne ahyɛdeɛ ne atemmusɛm a Yehowa yɛn Nyankopɔn de maa mo yi nso kyerɛ sɛn?’ 21 Ɛnneɛ monka nkyerɛ wɔn sɛ, ‘Na yɛyɛ Farao nkoa wɔ Egypt, na Yehowa de nsa a ɛyɛ den yii yɛn firii Egypt.+ 22 Yehowa de nsɛnkyerɛnne ne anwanwadeɛ+ akɛseɛ a ɛyɛ hu baa Egypt ne Farao ne ne fiefoɔ nyinaa so yɛn anim.+ 23 Afei ɔyii yɛn firii hɔ baa ha sɛ ɔde asase a ɔkaa ho ntam kyerɛɛ yɛn agyanom no bɛma yɛn.+ 24 Enti Yehowa de mmara yi nyinaa maa sɛ yɛnni so+ na yɛnsuro Yehowa yɛn Nyankopɔn na asi yɛn yie daa+ na yɛatena nkwa mu sɛdeɛ ɛteɛ nnɛ yi.+ 25 Sɛ yɛhwɛ di mmara nsɛm yi nyinaa so Yehowa yɛn Nyankopɔn anim sɛdeɛ wahyɛ yɛn sɛ yɛnyɛ+ no a, ɛbɛyɛ tenenee ama yɛn.’+