Atemmufoɔ

21 Ná Israel mmarima aka ntam wɔ Mispa+ sɛ: “Yɛn mu biara nni hɔ a ɔde ne babaa bɛma Benyaminni awareɛ.”+ 2 Na ɔman no baa Betel+ bɛtenaa nokorɛ Nyankopɔn+ no anim kɔsii anwummerɛ, na wɔmaa wɔn nne so suu pii.+ 3 Na wɔkaa sɛ: “O Israel Nyankopɔn Yehowa, asɛm bɛn na ato Israel yi? Adɛn nti na nnɛ abusuakuo baako ayera afiri Israel?”+ 4 Adeɛ kyeeɛ no, nkurɔfoɔ no sɔree ntɛm sii afɔrebukyia, na wɔbɔɔ ɔhyeɛ afɔdeɛ+ ne asomdwoeɛ afɔdeɛ+ wɔ hɔ.

5 Na Israelfoɔ no bisaa sɛ: “Israel mmusua nyinaa mu, hwan na wamma Yehowa anim adwabɔ no aseɛ? Yɛaka ntankɛseɛ+ sɛ deɛ wamma Yehowa anim wɔ Mispa no, ‘Ɛsɛ sɛ wɔku no.’”+ 6 Israelfoɔ no dii wɔn nua Benyamin ho awerɛhoɔ, na wɔkaa sɛ: “Ɛnnɛ wɔatwa abusuakuo baako afiri Israel. 7 Berɛ a yɛaka ntam+ wɔ Yehowa anim sɛ yɛremfa yɛn mma mmaa mma wɔn awareɛ+ yi, yɛbɛyɛ dɛn anya yerenom ama wɔn a aka no?”

8 Wɔtoaa so bisaa sɛ: “Israel mmusua mu hwan na wamma Yehowa anim wɔ Mispa?”+ Na wɔhunuu sɛ obiara amfiri Yebes-Gilead+ amma adwabɔ no ase wɔ asoɛeɛ hɔ. 9 Na berɛ a wɔkan nkurɔfoɔ no, na Yebes-Gileadfoɔ no biara nni hɔ. 10 Enti asafo no somaa mmarima akatakyie no mu akunini mpem dumienu sɛ: “Momfa nkrantɛ nkɔkunkum Yebes-Gileadfoɔ, mmaa ne mmɔfra mpo.+ 11 Na deɛ monyɛ nie: Monkum mmarima no nyinaa ne mmaa a wɔne mmarima ada pɛn nyinaa.”+ 12 Na wɔhunuu sɛ mmabaa, kyerɛ sɛ mmaabunu,+ ahanan wɔ Yebes-Gilead+ a wɔne mmarima nnaa da. Na wɔde wɔn baa wɔn asoɛeɛ wɔ Silo+ a ɛwɔ Kanaan asase soɔ no.

13 Afei asafo no nyinaa tuu abɔfoɔ kɔɔ Benyaminfoɔ a wɔte Rimon+ botan soɔ no nkyɛn, na wɔne wɔn kaa asomdwoeɛsɛm. 14 Enti Benyaminfoɔ no san baa saa berɛ no mu. Na wɔde Yebes-Gileadfoɔ+ mmaa a wɔanku wɔn no maa wɔn, nanso anso wɔn nyinaa so.+ 15 Benyaminfoɔ+ no asɛm haa ɔman no, ɛfiri sɛ na Yehowa ama mpaepaemu aba Israel mmusua no mu. 16 Enti asafo no mu mpanimfoɔ no kaa sɛ: “Seesei a wɔahye Benyaminfoɔ mmaa nyinaa ase yi, yɛbɛyɛ dɛn anya yerenom ama wɔn a wɔaka no?” 17 Ɛnna wɔkaa sɛ: “Ɛsɛ sɛ Benyaminfoɔ a wɔnyaa wɔn tiri didii mu no nya agyapadeɛ,+ na wɔampepa abusuakuo bi amfiri Israel. 18 Na yɛn deɛ, yɛrentumi mfa yɛn mma mmaa mma wɔn awareɛ, ɛfiri sɛ Israelfoɔ aka ntam sɛ, ‘Nnome nka deɛ ɔde ɔbaa bi bɛma Benyamin awareɛ.’”+

19 Afei wɔkaa sɛ: “Hwɛ, afe biara wɔhyɛ fã ma Yehowa wɔ Silo+ a ɛwɔ Betel atifi, tempɔn a ɛfiri Betel kɔ Sekem+ no apueeɛ, Lebona anafoɔ.” 20 Enti wɔka kyerɛɛ Benyaminfoɔ no sɛ: “Monkɔtɛ bobe nturo no mu. 21 Na sɛ mohunu sɛ Silo mmabaa no aba rebɛsa*+ a, momfiri bobe nturo no mu mmra na obiara nkye Silo mmabaa no bi sɛ ne yere, na monsan nkɔ Benyamin asase so. 22 Na sɛ ɛba sɛ wɔn papanom ne wɔn nua mmarima ne yɛn bɛtwe manso a, yɛbɛka akyerɛ wɔn sɛ, ‘Monhwɛ yɛn anim nhu wɔn mmɔbɔ, ɛfiri sɛ yɛannya yere amma wɔn nyinaa ɛko mu.+ Afei nso ɛnyɛ mo na mode mmaa no maa wɔn, anyɛ saa a anka sɛsɛɛ moadi fɔ.’”+

23 Enti Benyaminfoɔ no yɛɛ saa pɛpɛɛpɛ, na wɔkyee mmabaa a wɔbɛsaeɛ no bi+ maa obiara nyaa ne yere.+ Afei wɔsan wɔn akyi kɔɔ wɔn agyapadeɛ so, na wɔkyekyeree nkuro+ tenatenaa mu.

24 Israelfoɔ no nso firii hɔ saa berɛ no kɔeɛ, na obiara kɔɔ n’abusuakuo mu ne ne fie, na wɔfirii hɔ kɔɔ wɔn agyapadeɛ so.+

25 Saa berɛ no, na ɔhene biara nni Israel.+ Deɛ ɛtene obiara ani soɔ na ɔyɛeɛ.+