15 Mmuaeɛ bɔkɔɔ ma abufuo twa,+
Na asɛm a ɛyɛ ya deɛ, ɛhyɛ abufuo.+
2 Anyansafoɔ kɛtrɛma de nimdeɛ yɛ adepa,+
Na nkwaseafoɔ ano deɛ, ɛkeka nkwaseasɛm.
3 Yehowa ani wɔ baabiara;
Ɛhwɛ abɔnefoɔ ne apapafoɔ nyinaa.+
4 Kɛtrɛma a ɛdwoɔ yɛ nkwa dua,+
Na asɛm a wɔka kyinkyim no deɛ, ɛbu abam.
5 Kwasea bu ne papa ntenesoɔ animtia,+
Na onyansafoɔ deɛ, ɔgye kasakyerɛ tom.+
6 Nneɛma a ɛsom bo bebree wɔ ɔteneneeni fie,
Na ɔbɔnefoɔ nnɔbaeɛ deɛ, ɛde ɔhaw brɛ no.+
7 Anyansafoɔ ano pete nimdeɛ,+
Na nkwaseafoɔ akoma deɛ, ɛnte saa.+
8 Abɔnefoɔ afɔrebɔ yɛ Yehowa akyiwadeɛ,+
Na ateneneefoɔ mpaebɔ deɛ, N’ani gye ho.+
9 Yehowa kyiri abɔnefoɔ kwan,+
Na wɔn a wɔyɛ adetenenee deɛ, ɔdɔ wɔn.+
10 Deɛ wagya ɛkwan no, ɔbu ntenesoɔ sɛ ɛnyɛ adepa,+
Na obiara a ɔtan kasakyerɛ no, ɔbɛwu.+
11 Adamena ne ɔsɛeɛ amena mpo Yehowa ani tua,+
Na nnipa akoma mu na ɔrenhu anaa?+
12 Fɛdifoɔ nnɔ deɛ ɔtene no.+
Ɔrenkɔ anyansafoɔ nkyɛn.+
13 Anigyeɛ akoma ma onipa anim te,
Na akoma mu yea deɛ, ɛma honhom boto.+
14 Nteaseɛ akoma hwehwɛ nimdeɛ,+
Na nkwaseafoɔ deɛ, wɔn ano aduane ne nkwaseasɛm.+
15 Mmɔborɔwa deɛ, da biara nyɛ mma no,+
Na deɛ ɔwɔ anigyeɛ akoma deɛ, daa ɔwɔ apontoɔ mu.+
16 Sɛ obi suro Yehowa na ɔwɔ adeɛ ketewaa bi a,+
Ɛyɛ sene sɛ ɔbɛnya ahonyadeɛ pii a adwendwene bata ho.+
17 Nhabamma a wɔdi wɔ baabi a ɔdɔ wɔ no,+
Ɛyɛ sene nantwie a wadɔre sradeɛ a wɔwe no wɔ baabi a ɔtan wɔ.+
18 Obi a ne bo fu ntɛmntɛm hwanyan ntɔkwa mu,+
Na deɛ ne bo mfu ntɛm deɛ, ɔma akasakasa brɛ ase.+
19 Ɔkwadwofoɔ kwan te sɛ nkasɛɛ a wɔde agye ban,+
Na ateneneefoɔ kwan deɛ, ɛte sɛ kwantempɔn a ɛda so.+
20 Ɔba nyansafoɔ ma ne papa ani gye,+
Na kwasea deɛ, ɔmfa ne maame nyɛ hwee.+
21 Deɛ ɔnnim nyansa no ani gye nkwaseasɛm ho,+
Na onipa a ɔwɔ nhunumu deɛ, ɔnante kɔ n’anim tẽẽ.+
22 Sɛ adwentoatoa nni hɔ a, nhyehyɛeɛ nyɛ yie,
Na afotufoɔ dodoɔ ma nhyehyɛeɛ yɛ yie.+
23 Onipa ma mmuaeɛ pa a, ɔdi ahurisie,+
Na asɛm a wɔka wɔ berɛ a ɛfata mu deɛ, ɛyɛ paa!+
24 Obi a ɔwɔ nhunumu no, ɔnam nkwa kwan a ɛkorɔn so,+
Na ɛdane no firi Adamena a ɛwɔ fam no ho.+
25 Yehowa bɛdwiri ahantanfoɔ fie agu,+
Na okunafoɔ ahyeɛ deɛ, ɔbɛbɔ ho ban.+
26 Yehowa kyiri abɔnefoɔ pɔ bɔne,+
Na nsɛm a ɛyɛ dɛ deɛ, ɛho te ma No.+
27 Deɛ ɔpɛ mfaso bɔne no de ɔhaw ba ɔno ara ne fiefoɔ so,+
Na deɛ ɔtan adanmudeɛ no deɛ, ɔbɛnyini akyɛ.+
28 Ɔteneneeni akoma dwene ansa na ama mmuaeɛ,+
Na ɔbɔnefoɔ ano deɛ, ɛkeka nsɛmmɔne.
29 Yehowa ne abɔnefoɔ ntam kwan ware,
Na ateneneefo deɛ, ɔtie wɔn mpaebɔ.+
30 Ani a ɛhyerɛn ma akoma di ahurisie;
Amanneɛbɔ pa ma nnompe nya ahoɔden.+
31 Deɛ ɔtie kasakyerɛ a ɛma nkwa no,
Ɔne anyansafoɔ na ɛteɛ.+
32 Deɛ ɔnnye ntenesoɔ ntom no, ɔmfa ne nkwa nyɛ hwee,+
Na obiara a ɔtie kasakyerɛ no, ɔnya nteaseɛ.+
33 Yehowa suro yɛ nteteeɛ a ɛma nyansa,+
Na ahobrɛaseɛ ba ansa na animuonyam aba.+