14 Ɔbaa nyansafoɔ si ne fie,+
Na ɔbaa kwasea deɛ, ɔde ne nsa dwiri ne deɛ gu.
2 Deɛ ɔnante tenenee mu no suro Yehowa,
Na deɛ n’akwan yɛ nnaadaa no deɛ, ɔbu No animtia.
3 Ahantan abaa wɔ kwasea anom,
Na anyansafoɔ ano deɛ, ɛbɛbɔ wɔn ho ban.
4 Sɛ anantwie nni hɔ a, mmoa adididaka mu te,
Nanso nantwinini ahoɔden ma nnɔbaeɛ dɔɔso.
5 Ɔdansefoɔ nokwafoɔ renni atorɔ,
Na ɔdansekurumufoɔ deɛ, ɔtwa nkontompo daa.+
6 Fɛdifoɔ hwehwɛ nyansa, nanso ɔnnya,
Na onipa a ɔwɔ nteaseɛ deɛ, ɔmmrɛ na wanya nimdeɛ.+
7 Twe wo ho firi kwasea ho,
Na worennya nimdeɛ wɔ n’anom.+
8 Nyansa ma onitefoɔ hunu baabi a ɔrekɔ,
Na nkwaseafoɔ deɛ, wɔn ankasa nkwaseasɛm na ɛdaadaa wɔn.+
9 Nkwaseafoɔ de afɔdie yɛ aseresɛm,+
Na ateneneefoɔ deɛ, wɔpɛ sɛ wɔsiesie wɔne nkurɔfoɔ ntam.
10 Akoma na ɛnim n’awerɛhoɔ,
Na n’anigyeɛ nso, abɔntensoni biara rentumi nnya bi.
11 Wɔbɛsɛe abɔnefoɔ fie,+
Na ateneneefoɔ ntomadan deɛ, ɛbɛyɛ frɔmfrɔm.
12 Ɛkwan bi wɔ hɔ a, ɛtene wɔ onipa ani so,+
Nanso ɛkɔwie owuo mu.+
13 Sereɛ mu mpo, akoma tumi di yea,
Na ahurisie tumi kɔwie awerɛhoɔ mu.
14 Deɛ wamane wɔ n’akomam no, ɔbɛtwa so aba,+
Na onipa pa deɛ, ɔbɛnya ne nneyɛɛ so akatua.+
15 Ogyimifoɔ gye asɛm biara di,
Na onyansafoɔ deɛ, anammɔn biara a ɔbɛtuo no, ɔhwɛ no yie.+
16 Onyansafoɔ hwɛ ne ho yie, na ɔtwe ne ho firi bɔne ho,
Na kwasea deɛ, biribiara mfa ne ho, na ɔgye ne ho di dodo.
17 Deɛ ne bo fu ntɛm no, ɔdi nkwaseasɛm,+
Na onipa a ɔdwene nneɛma ho yie no, wɔtan no.
18 Deɛ agyimifoɔ bɛnya ne nkwaseasɛm,
Na anyansafoɔ deɛ, wɔde nimdeɛ bɔ wɔn abotire.+
19 Abɔnefoɔ bɛkoto apapafoɔ anim,
Na amumuyɛfoɔ akoto ateneneefoɔ apono ano.
20 Ohiani ayɔnkofoɔ mpo tan no,+
Na sikani deɛ, ne nnamfo dɔɔso.+
21 Deɛ ɔmfa ne yɔnko nyɛ hwee no, wayɛ bɔne,
Na deɛ ne yam hyehye no ma mmɔborɔwa no, n’ani gye.+
22 Wɔn a wɔdwene adwemmɔne no, wɔremfom kwan anaa?
Wɔn a wɔasi wɔn bo sɛ wɔbɛyɛ papa no deɛ, ɔdɔ a ɛnni hwammɔ ne nokorɛ wɔ hɔ ma wɔn.+
23 Adwumaden biara so wɔ mfasoɔ,
Na kasa kɛkɛ deɛ, ohia na ɛde ba.+
24 Anyansafoɔ ahenkyɛ ne wɔn ahonyadeɛ;
Na nkwaseafoɔ agyimisɛm deɛ, ɛyɛ nkwaseasɛm nko ara.+
25 Ɔdansefoɔ nokwafoɔ gye nkwa,
Na ɔdaadaafoɔ deɛ, ɔtwa nkontompo daa.
26 Deɛ ɔsuro Yehowa no ahotɔsoɔ yɛ kɛse,+
Na ɛbɛyɛ dwankɔbea ama ne mma.+
27 Yehowa suro yɛ nkwa asutire,
Ɛdane onipa firi owuo mfidie ho.
28 Nnipa dodoɔ yɛ ɔhene animuonyam,+
Na ɔhene a ɔnni ɔmanfoɔ deɛ, n’ahweaseɛ ara ne no.
29 Deɛ ne bo mfu ntɛm no, ɔwɔ nhunumu pii,+
Na deɛ ɔpere ne ho deɛ, ɔma obiara hunu ne nkwaseasɛm.+
30 Akoma a ɛdwoɔ ma nipadua nya nkwa,
Na ahoɔyaa deɛ, ɛma nnompe porɔ.+
31 Deɛ ɔsisi mmɔborɔwa no, ɔdidi ne Bɔfo atɛm,+
Na obiara a ne yam hyehye no ma ohiani no deɛ, ɔhyɛ No animuonyam.+
32 Ɔbɔnefoɔ deɛ, ɔno ara n’amumuyɛ na ɛbɛma no ahwe ase,
Na ɔteneneeni deɛ, n’abrabɔ a ɛdi mu nti ɔbɛnya ahobammɔ.+
33 Onipa a ɔwɔ nteaseɛ no, nyansa te n’akomam dinn,+
Na nkwaseafoɔ deɛ, wɔbɔ no dawuro.
34 Tenenee ma ɔman nya animuonyam,+
Na bɔne deɛ, ɛgu ɔman anim ase.
35 Akoa a ɔwɔ nhunumu ma ɔhene ani gye,+
Na deɛ ɔyɛ aniwudeɛ deɛ, ɔhene bo fu no.+