10 Solomon mmebusɛm.+
Ɔba nyansafoɔ ma ne papa ani gye,+
Na ɔba kwasea deɛ, ɔma ne maame di awerɛhoɔ.
2 Agyapadeɛ a wɔnam kwammɔne so nya no, mfasoɔ biara remma so,
Na tenenee na ɛgye onipa firi owuo mu.+
3 Yehowa remma ɛkɔm nne ɔteneneeni,+
Na ɔbɔnefoɔ deɛ, deɛ ne kɔn dɔ no, ɔremma ne nsa nka.
4 Nsa a ɛnyɛ adwuma de ohia ba,+
Na mmɔdemmɔfoɔ nsa deɛ, ahonyadeɛ na ɛde ba.+
5 Ɔba a ɔwɔ nhunumu boaboa nnɔbaeɛ ano ahuhuro berɛ,
Na ɔba a ne ho yɛ aniwu deɛ, ɔda hatee twaberɛ.+
6 Nhyira wɔ ɔteneneeni apampam,+
Na abɔnefoɔ ano deɛ, ɛkata awudisɛm so.
7 Deɛ wɔde kae ɔteneneeni bɛyɛ nhyira,+
Na abɔnefoɔ din deɛ, ɛbɛporɔ.+
8 Akoma mu nyansafoɔ bɛgye akwankyerɛ atom,+
Na deɛ ɔka nkwaseasɛm deɛ, wɔbɛtiatia ne so.+
9 Deɛ n’abrabɔ di mu no bɛnante dwoodwoo,+
Na deɛ ɔkyeakyea n’akwan deɛ, wɔbɛhu no.+
10 Deɛ ɔbɔ n’ani de daadaa nkurɔfoɔ no ma wɔdi yea,+
Na deɛ ɔka nkwaseasɛm no, wɔbɛtiatia ne so.+
11 Ɔteneneeni ano yɛ nkwa asutire,+
Na abɔnefoɔ ano deɛ, ɛkata awudisɛm so.+
12 Ɔtan na ɛsɛe nnipa ntam,
Na ɔdɔ deɛ, ɛkata bɔne nyinaa so.+
13 Nyansa wɔ onipa a ɔwɔ nhunumu ano,+
Na abaa wɔ hɔ ma deɛ ɔnnim nyansa akyi.+
14 Nimdeɛ som bo ma anyansafoɔ,+
Na kwasea ano frɛfrɛ ɔsɛeɛ.+
15 Osikani ahonyadeɛ ne ne kuro a wabɔ ho ban,
Na ahiafoɔ deɛ, wɔn hia na ɛsɛe wɔn.+
16 Ɔteneneeni nnwuma kɔwie nkwa mu;
Na aba a ɔbɔnefoɔ twa kɔwie bɔne mu.+
17 Deɛ ɔtie ntenesoɔ no ma nkurɔfoɔ hunu nkwa kwan,
Na deɛ ɔntie kasakyerɛ no ma nnipa fom kwan.
18 Deɛ ɔkata ne tan so no twa nkontompo,+
Na deɛ ɔnenam sɛe nkurɔfoɔ din no yɛ kwasea.
19 Mfomsoɔ mpa kasa dodoɔ mu,+
Na deɛ ɔhwɛ n’ano yie no yɛ onyansafoɔ.+
20 Ɔteneneeni kɛtrɛma te sɛ dwetɛ amapa,+
Na ɔbɔnefoɔ akoma deɛ, mfasoɔ nni so.
21 Ɔteneneeni ano ma nnipa pii akwankyerɛ,+
Na nkwaseafoɔ deɛ, nyansa a wɔnni nti, wɔwuwu.+
22 Yehowa nhyira na ɛma obi yɛ ɔdefoɔ,+
Na Ɔmfa yea biara nka ho.
23 Kwasea reyɛ aniwudeɛ a, ɛyɛ no sɛ ɔredi agorɔ,
Na nyansa yɛ onipa a ɔwɔ nhunumu dea.+
24 Adeɛ a ɔbɔnefoɔ suro no, ɛbɛba ne so;
Na ateneneefoɔ nsa bɛka deɛ wɔpɛ.+
25 Sɛ mframa a ano yɛ den bɛsene twam a, abɔnefoɔ bɛfiri hɔ,+
Na ɔteneneeni deɛ, ɔtim hɔ daa.+
26 Sɛdeɛ nsã a emu keka yɛ ɛse, na wisie yɛ ani no,
Saa ara na kwadwofoɔ yɛ deɛ ɔsoma no no.
27 Yehowa suro ma nkwa tenten,+
Na abɔnefoɔ mfeɛ deɛ, wɔbɛtwa so.+
28 Deɛ ateneneefoɔ hwɛ kwan de anigyeɛ bɛba,+
Na abɔnefoɔ anidasoɔ deɛ, ɛbɛyera.+
29 Yehowa kwan yɛ abandenden ma deɛ ne ho nni asɛm,+
Na abɔnefoɔ deɛ, ɛyɛ ɔsɛeɛ ma wɔn.+
30 Wɔremma ɔteneneeni nhwe ase da;+
Na abɔnefoɔ deɛ, wɔrentena asaase so bio.+
31 Ɔteneneeni ano so nyansa aba,
Na nkontompofoɔ kɛtrɛma deɛ, wɔbɛtwa afiri hɔ.
32 Ɔteneneeni ano nim deɛ ɛsɔ ani,
Na abɔnefoɔ ano deɛ, ɛyɛ nkontompo.