Mmebusɛm

2 Me ba, sɛ wogye me nsɛm tom,

Na wode m’ahyɛdeɛ sie,+

 2 Na woyɛ aso tie nyansa,+

Na wobue w’akomam ma nhunumu;+

 3 Afei nso, sɛ woteam frɛ nteaseɛ,+

Na woma wo nne so frɛ nhunumu;+

 4 Sɛ wokɔ so hwehwɛ no sɛ dwetɛ,+

Na wokɔ so hwehwɛ no sɛ biribi a ɛsom bo a wɔde asie a,+

 5 Ɛbɛma woate Yehowa suro ase,+

Na woanya Onyankopɔn ho nimdeɛ.+

 6 Ɛfiri sɛ Yehowa ankasa na ɔma nyansa,+

Na n’anom na nimdeɛ ne nhunumu firi ba.

 7 Ɔkora nyansa so ma ateneneefoɔ,

Na ɔyɛ kyɛm ma wɔn a wɔn abrabɔ di mu.+

 8 N’ani wɔ atɛntenenee akwan so,

Na ɔbɛwɛn n’anokwafoɔ kwan.+

 9 Ɛno bɛma woate tenenee ne atɛn turodoo ne adetenenee ase,

Na woate papayɛ akwan nyinaa ase.+

10 Sɛ nyansa ba w’akoma mu,+

Na wo kra* ani gye nimdeɛ ho a,+

11 Nyansa bɛhwɛ wo so,+

Na nhunumu abɔ wo ho ban,

12 Na ɛbɛgye wo afiri kwammɔne so,

Na ayi wo afiri ɔbarima kontomponi nsam,+

13 Ɛbɛgye wo afiri wɔn a wɔmane firi tenenee akwan so

Kɔnante sum akwan so+ no nsam,

14 Ɛbɛgye wo afiri wɔn a wɔn ani gye bɔne ho no nsam,

Wɔn a wɔdi bɔne a ɛyɛ asefem ho ahurisie,

15 Wɔn a wɔn akwan akyea,

Na wɔn akwan nyinaa yɛ nnaadaa no.

16 Ɛbɛgye wo afiri ɔbaa a wamane* nsam,

Na ayi wo afiri ɔbaa a ne bra asɛe* a n’ano yɛ dɛ* nsam;+

17 Ɔno na wagya ne mmabaaberɛ mu yɔnko berɛboɔ* hɔ,+

Na ne werɛ afi ne Nyankopɔn apam;

18 Ne fie siane kɔ owuo mu,

Na n’akwan* kɔ awufoɔ mu, wɔn a wɔntumi nyɛ hwee no.+

19 Obiara a ɔkɔ ne ho rensan mma,

Na ɔrensi nkwa akwan so bio.+

20 Enti nante apapafoɔ kwan so,

Na kɔ so fa ateneneefoɔ akwan so.+

21 Na ateneneefoɔ nko ara na wɔbɛtena asaase so,

Na wɔn a asɛm nni wɔn ho* na wɔbɛka so.+

22 Abɔnefoɔ deɛ, wɔbɛtwa wɔn afiri asaase so,+

Na wɔbɛyi nkontompofoɔ afiri so.+