Krataa a Ɛdi Kan a Ɔde Kɔmaa Korintofoɔ

13 Sɛ meka nnipa ne abɔfoɔ kasa na menni dɔ a, mete sɛ dawuro a ɛreyɛ dede anaa nnadeɛ a wɔde rebobom. 2 Na sɛ mewɔ nkɔmhyɛ akyɛdeɛ, na mete ahintasɛm kronkron nyinaa ne nimdeɛ nyinaa ase,+ na mewɔ gyidie nyinaa ma metumi tutu mmepɔ, na menni dɔ a, mensɛ hwee.*+ 3 Na sɛ metɔn deɛ mewɔ nyinaa de tɔ aduane ma nkurɔfoɔ,+ na mede me nipadua bɔ afɔreɛ de hoahoa me ho na sɛ menni dɔ a,+ merennya so mfasoɔ biara.

4 Ɔdɔ+ wɔ aboterɛ*+ na ne yam yɛ.+ Ɔdɔ nyɛ ahoɔyaa.+ Ɛnyɛ anomdwa.* Ɛnyɛ ahomasoɔ,+ 5 ɛnyɛ adeɛ a ɛnsɛ,*+ ɛnhwehwɛ deɛ ɔno nko ara hia,+ ne bo nha no.+ Ɛmfa bɔne nhyɛ ne mu.+ 6 Ɛnni deɛ ɛntene ho ahurisie,+ na mmom ɛdi nokorɛ ho ahurisie. 7 Ɛto ne bo ase biribiara mu,+ ɛgye biribiara di,+ ɛwɔ biribiara mu anidasoɔ,+ na ɛgyina biribiara ano.+

8 Ɔdɔ to ntwa da.* Nanso sɛ nkɔmhyɛ adom akyɛdeɛ wɔ hɔ a, ɛbɛfiri hɔ; sɛ kasa hodoɔ* wɔ hɔ a, ɛbɛgyae; sɛ nimdeɛ wɔ hɔ a, ɛbɛfiri hɔ. 9 Ɛfiri sɛ yɛn nimdeɛ nni mu,+ na nkɔm a yɛhyɛ no nni mu, 10 na sɛ deɛ ɛdi mu no ba a, deɛ ɛnni mu no bɛfiri hɔ. 11 Berɛ a meyɛ abɔfra no, mekasaa sɛ abɔfra, medwenee sɛ abɔfra, mesusuu nsɛm ho sɛ abɔfra; na afei a mayɛ ɔpanin yi, mayi mmɔfra suban no afiri hɔ. 12 Seesei yɛhwɛ dadeɛ ahwehwɛ mu, na yɛnhu nneɛma yie. Nanso berɛ bi bɛba a yɛbɛhunu adeɛ yie te sɛ deɛ obi gyina yɛn anim. Seesei me nimdeɛ nni mu, nanso saa berɛ no, mɛnya nimdeɛ a ɛdi mu sɛdeɛ me nso wɔnim me yie no. 13 Na seesei deɛ, nneɛma mmiɛnsa yi na ɛwɔ hɔ: gyidie, anidasoɔ, ɔdɔ; na deɛ ɛyɛ kɛseɛ wom paa ne ɔdɔ.+