Asomafoɔ Nnwuma
9 Na Saul a na ɔda so hunahuna Awurade asuafoɔ+ no a na ɔpɛ sɛ ɔkunkum+ wɔn no kɔɔ ɔsɔfo panin no nkyɛn 2 kɔkaa sɛ ɔmma no nkrataa a ɔde bɛkɔ Damasko hyia adan mu, sɛdeɛ ɛbɛyɛ a ɔbɛtumi akye* obiara a ɔbɛhunu sɛ ɔnam Ɛkwan No soɔ,+ mmarima ne mmaa, de wɔn aba Yerusalem.
3 Berɛ a ɔrekɔ a ɔbɛn Damasko no, mpofirem ara na hann bi firi soro hyerɛn twaa ne ho hyiaeɛ,+ 4 na ɔhwee fam, na ɔtee sɛ nne bi ka kyerɛɛ no sɛ: “Saul, Saul, adɛn nti na wotaa me?”+ 5 Ɔkaa sɛ: “Ɛyɛ wo hwan, Owura?” Ɔkaa sɛ: “Ɛyɛ me Yesu a wotaa no no.+ 6 Nanso sɔre+ na kɔ kuro no mu, na wɔbɛka deɛ ɛsɛ sɛ woyɛ akyerɛ wo.” 7 Afei na mmarima a wɔne no rekɔ no+ gyinagyina hɔ a wɔntumi nkasa,+ na ɛwom sɛ na wɔte paa sɛ nne bi rekasa+ deɛ, nanso na wɔnhunu obiara. 8 Na Saul sɔre firii fam; ná n’ani gu so deɛ, nanso ɔnhunu hwee.+ Enti wɔsosɔɔ ne nsa de no kɔɔ Damasko. 9 Na wanhunu hwee nnansa,+ na wannidi na wannom.
10 Ná osuani bi wɔ Damasko a wɔfrɛ no Anania,+ na Awurade ka kyerɛɛ no anisoadehunu mu sɛ: “Anania!” Na ɔse: “Awurade, menie.” 11 Awurade ka kyerɛɛ no sɛ: “Sɔre, kɔ borɔno a wɔfrɛ no Tẽẽ no so, na kɔ Yuda fie kɔhwehwɛ ɔbarima bi a wɔfrɛ no Saul, a ɔfiri Tarso+ no. Na hwɛ! ɔrebɔ mpaeɛ, 12 na wahunu ɔbarima bi a wɔfrɛ no Anania wɔ anisoadehunu mu sɛ waba de ne nsa abɛgu ne so sɛdeɛ ɔbɛhunu adeɛ.”+ 13 Nanso Anania buaa sɛ: “Awurade, mate ɔbarima yi ho asɛm afiri nnipa pii hɔ, sɛ ɔde bɔne bebree adi w’akronkronfoɔ a wɔwɔ Yerusalem no. 14 Afei wanya tumi afiri asɔfoɔ mpanimfoɔ no nkyɛn sɛ ɔmfa wɔn a wɔbɔ wo din+ no nyinaa ngu mpokyerɛ mu.” 15 Na Awurade ka kyerɛɛ no sɛ: “Si kwan so kɔ, ɛfiri sɛ ɔbarima yi yɛ anwenneɛ a wɔayi no+ ama me sɛ ɔmfa me din nkɔ amanaman+ ne ahemfo+ ne Israel mma nkyɛn. 16 Na mɛkyerɛ no nneɛma dodoɔ a me din nti ɛtwa sɛ ɛto no no pefee.”+
17 Enti Anania kɔeɛ na ɔhyɛn fie no mu, na ɔde ne nsa guu ne so kaa sɛ: “Me nua Saul, Awurade Yesu a ɔyii ne ho adi kyerɛɛ wo ɛkwan a na wonam so reba soɔ no na asoma me, sɛdeɛ ɛbɛyɛ a wobɛhunu adeɛ na honhom kronkron ahyɛ wo mã.”+ 18 Na amonom hɔ ara biribi a ɛte sɛ abena fifirii n’ani so guu fam, na ɔhunuu adeɛ; na ɔsɔre maa wɔbɔɔ no asu, 19 na ɔdidi nyaa ahoɔden.+
Na ɔdii nna kakra wɔ asuafoɔ a wɔwɔ Damasko+ no nkyɛn, 20 na ntɛm ara na ɔfirii aseɛ wɔ hyia adan mu kaa Yesu ho asɛm+ sɛ ɔne Onyankopɔn Ba no. 21 Nanso ɛyɛɛ wɔn a wɔretie no no nyinaa nwanwa na wɔkaa sɛ: “Ɛnyɛ oyi na ɔsɛee+ wɔn a wɔbɔ din yi wɔ Yerusalem no? Ɛnyɛ ɔno na ɔde botaeɛ korɔ no ara baa ha sɛ ɔrebɛkye wɔn de wɔn akɔma asɔfoɔ mpanimfoɔ no?”+ 22 Nanso Saul kɔɔ so nyaa ahoɔden, na ɔmaa Yudafoɔ a wɔwɔ Damasko no ho dwirii wɔn berɛ a ɔde adanseɛ a nteaseɛ wom kyerɛɛ sɛ oyi ne Kristo no.+
23 Na nna pii akyi no, Yudafoɔ no bɔɔ pɔ sɛ wɔbɛku no.+ 24 Nanso Saul hunuu sɛ wɔabɔ ne ho pɔ. Na bio nso na wɔwɛn apono no ano awia ne anadwo sɛ wɔbɛnya no aku no.+ 25 Enti n’asuafoɔ no faa no anadwo no de no sii kɛntɛn mu de no faa ɛkwan bi a ɛda fasuo no mu mu, gyaagyaa no nkakrankakra sii fam.+
26 Ɔduruu Yerusalem+ no, ɔbɔɔ mmɔden sɛ ɔde ne ho bɛbɔ asuafoɔ no; nanso na wɔn nyinaa suro no, ɛfiri sɛ na wɔnnye nni sɛ ɔyɛ osuani. 27 Enti Barnaba boaa no+ de no kɔɔ asomafoɔ no nkyɛn, na ɔkaa sɛdeɛ wahunu Awurade+ wɔ kwan so na ɔne no akasa,+ ne sɛdeɛ ɔde akokoɔduro akasa wɔ Yesu din mu wɔ Damasko+ no ho asɛm nyinaa kyerɛɛ wɔn. 28 Na ɔne wɔn tenaeɛ, na ɔdii akɔneaba wɔ Yerusalem, kasaa Awurade din mu akokoɔduro so;+ 29 na ɔne Yudafoɔ a wɔka Hela kasa no kasa dii anobaabaeɛ. Na wɔbɔɔ mmɔden sɛ wɔbɛku no.+ 30 Berɛ a anuanom no hunuu yei no, wɔde no baa Kaesarea na wɔmaa no kɔɔ Tarso.+
31 Nokwasɛm nie, saa berɛ no asafo+ a ɛwowɔ Yudea ne Galilea ne Samaria nyinaa nyaa asomdwoeɛ, na wɔyɛɛ den; na berɛ a wɔde Yehowa+ suro ne honhom kronkron+ no awerɛkyekyerɛ nanteeɛ no, wɔkɔɔ so dɔreeɛ.
32 Afei berɛ a Petro rekyinkyini mmeaeɛ nyinaa no, ɔkɔduruu akronkronfoɔ a wɔte Lida+ no nso nkyɛn. 33 Ɛhɔ na ɔhunuu ɔbarima bi a wɔfrɛ no Enea a wabubu ada ne mpa so mfeɛ nwɔtwe. 34 Na Petro ka kyerɛɛ no sɛ:+ “Enea, Yesu Kristo asa wo yareɛ.+ Sɔre na to wo mpa.” Na ntɛm ara ɔsɔreeɛ. 35 Na wɔn a wɔtete Lida ne Saron+ asasetamaa so nyinaa hunuu no, na wɔdane baa Awurade nkyɛn.+
36 Ná osuani bi wɔ Yopa+ a wɔfrɛ no Tabita, a sɛ wɔkyerɛ aseɛ a, ɛkyerɛ Dorka.* Ná nnwuma pa+ ne adɔeɛ ayɛ no ma. 37 Na nna no mu no, ɛbaa sɛ ɔyare wuiɛ. Enti wɔdwaree no de no kɔtoo abansoro dan bi mu. 38 Afei ɛsiane sɛ Lida bɛn Yopa+ nti, berɛ a asuafoɔ no tee sɛ Petro wɔ saa kuro no mu no, wɔsomaa mmarima mmienu kɔɔ ne nkyɛn kɔsrɛɛ no sɛ: “Yɛsrɛ wo ntwentwɛn wo nan ase sɛ wobɛba yɛn nkyɛn.” 39 Ɛnna Petro sɔreeɛ na ɔne wɔn kɔeɛ. Na ɔduruu hɔ no, wɔde no kɔɔ abansoro dan no mu; na akunafoɔ no nyinaa de su baa ne nkyɛn de ntadeɛ nhyɛaseɛ ne ntadeɛ ngugusoɔ+ a Dorka yɛeɛ berɛ a ɔwɔ wɔn nkyɛn no bebree bɛkyerɛeɛ.+ 40 Na Petro maa obiara pue kɔɔ abɔnten,+ na ɔbuu nkotodwe bɔɔ mpaeɛ, na ɔdanee ne ho hwɛɛ amu no kaa sɛ: “Tabita, sɔre!” Ɔbuee n’ani, na n’ani bɔɔ Petro soɔ no, ɔsɔre tenaa ase.+ 41 Ɔtenee ne nsa na ɔmaa ne so,+ na ɔfrɛɛ akronkronfoɔ ne akunafoɔ no de no maa wɔn a ɔwɔ nkwa mu.+ 42 Wɔtee yei wɔ Yopa nyinaa, na bebree bɛgyee Awurade diiɛ.+ 43 Ɔtenaa Yopa dii nna kakra+ wɔ Simon, nwomahyɛfoɔ+ bi nkyɛn.