Hiob

33 “Afei Hiob, mesrɛ wo, tie me kasa,

Na yɛ asõ ma me nsɛm nyinaa.

 2 Hwɛ! Mɛbue m’ano;

Me kɛtrɛma ne m’ano bɛkasa.+

 3 M’akoma mu teeyɛ mu na mɛkasa,+

Na nimdeɛ na m’ano bɛka no frenkyemm.+

 4 Onyankopɔn honhom na ɛyɛɛ me,+

Na adeɛ nyinaa so Tumfoɔ no home na ɛde me baa nkwa mu.+

 5 Sɛ wobɛtumi a, yi me ano,

Hyehyɛ wo nsɛm; bɔ w’asene.

 6 Hwɛ! Sɛdeɛ woteɛ nokorɛ Nyankopɔn ani soɔ no, saa ara na meteɛ;+

Me nso, dɔteɛ na wɔde nwenee me.+

 7 Hwɛ! Me ho hu biara nni hɔ a ɛbɛtu w’akoma,

Na me nhyɛsoɔ+ renyɛ wo so duru.

 8 Woaka no m’asom,

Na mate w’anom nsɛm sɛ,

 9 ‘Me ho te, na bɔne biara nni me ho;+

Me ho nguu fĩ, na mfomsoɔ biara nni me ho.+

10 Nanso wanya biribi agyina so ne me adi asie,

Ɔbu me sɛ ne tamfo.+

11 Ɔde me nan bɔ nnua mu,+

Na n’ani di m’akwan nyinaa akyi.’+

12 Hwɛ! Yei mu deɛ, mereka akyerɛ wo, woanyɛ no yie;+

Ɛfiri sɛ Onyankopɔn sene onipa dasani koraa.+

13 Adɛn nti na wo ne no reyiyi nsɛm ano?+

W’asɛm a ɔnyi ano nti anaa?+

14 Onyankopɔn kasa prɛko

Ne ne mprenu so+—nanso onipa ntie—

15 Daeɛ mu,+ anadwo adehunu mu,+

Berɛ a nnahɔɔ atɔ nnipa soɔ,

Berɛ a wɔada wɔ mpa soɔ.+

16 Saa berɛ no na ɔbue nnipa asõ,+

Na ɔma n’afotuo tim wɔn mu;

17 Ɔde dane nipa firi ne nneyɛɛ ho,+

Na ɔyi ahantan+ firi ɔbarima anim.

18 Ɔsianka ne kra na antɔ amena mu,+

Ne ne nkwa nso na antɔ bɛmma ano.+

19 Ɔde adeɛ a ɛyɛ ya tene ne so ne mpa so,

Na ne nnompe mu aperedie nnyae da.

20 N’asetena ma aduane yɛ no abofono,+

Na ne kra po akɔnnɔduane.

21 Wafɔn ama wɔnhunu ne honam,

Na ne nnompe a na wɔnhunu no apuepue.

22 Ne kra bɛn amena,+

Na ne nkwa bɛn awudifoɔ.

23 Sɛ ɔwɔ ɔbɔfoɔ bi,

Ɔkasamafoɔ bi, apem mu baako,

A ɔbɛkyerɛ onipa deɛ ɛtene a,

24 Ɛma no dom no, na ɔka sɛ,

‘Gye no na wankɔ amena mu!+

Manya agyedeɛ!+

25 Ma ne honam nyɛ frɔmfrɔm nsene mmɔfra deɛ;+

Ma no nsan nkɔ ne mmeranteberɛ mu ahoɔden mu.’+

26 Ɔbɛpa Onyankopɔn kyɛw, na n’ani agye ne ho;+

Osebɔ na ɔde bɛhunu n’anim,

Na Ɔde Ne tenenee bɛma onipa dasani bio.

27 Ɔbɛto dwom akyerɛ nkurɔfoɔ sɛ,

‘Mayɛ bɔne;+ na deɛ ɛtene no, makyea no.

Anyɛ adepa amma me.

28 Wagye me kra na ankɔ amena mu;+

Me nkwa nso bɛhunu hann.’

29 Hwɛ! Yeinom nyinaa na Onyankopɔn yɛ,

Mprenu ne mprɛnsa wɔ barima ho,

30 Sɛ ɔde bɛdane ne kra afiri amena ho,+

Na ateasefoɔ hann ahyerɛn ne so.+

31 Enti afei Hiob yɛ asõ! Tie me!

Yɛ komm, na mentoa so nkasa.

32 Sɛ wowɔ asɛm bi ka a, yi me ano;

Kasa, ɛfiri sɛ wo tenenee ho asɛm hia me.

33 Sɛ wonni hwee ka a, ɛnneɛ tie me ɛ;+

Yɛ komm na menkyerɛ wo nyansa.”