• Dwom 14:1-7
    Twerɛ Kronkron—Wiase Foforɔ Nkyerɛaseɛ

    • 14 Onipa a ɔnni adwene* ka no n’akomam sɛ:

      “Yehowa biara nni hɔ.”+

      Wɔn suban asɛe koraa, na wɔyɛ akyiwadeɛ.

      Wɔn mu biara nni hɔ a ɔyɛ adepa.+

       2 Yehowa deɛ, ɔfiri soro hwɛ nnipa mma;

      Ɔrehwɛ sɛ ɔbɛhu obi a ɔwɔ nhunumu anaa obi a ɔhwehwɛ Yehowa.+

       3 Wɔn nyinaa afom kwan;+

      Wɔn nyinaa aporɔ.

      Obiara nni hɔ a ɔyɛ adepa,

      Baako mpo nni hɔ.

       4 Nnebɔneyɛfoɔ no mu biara nni hɔ a ɔwɔ nteaseɛ anaa?

      Wɔmemene me man sɛdeɛ wɔanya paanoo redie.

      Wɔmmɔ Yehowa mpaeɛ.

       5 Ehu kɛseɛ bɛka wɔn,+

      Ɛfiri sɛ Yehowa ka ateneneefoɔ badwa* ho.

       6 Mo, abɔnefoɔ, mode asi mo ani so sɛ mobɛsɛe mmɔborɔwa nhyehyɛeɛ,

      Nanso Yehowa ne ne dwankɔbea.+

       7 Sɛ Israel nkwagyeɛ bɛfiri Sion aba,+

      Na sɛ Yehowa bɛsan aboaboa ne nkurɔfoɔ a wɔakɔdi obi man so no ano aba a,

      Ɛnneɛ ma Yakob ani nnye na Israel nni ahurisie.