Yeremia

47 Yehowa asɛm a ɛbaa odiyifoɔ Yeremia nkyɛn ansa na Farao resɛe Gasa no nie. Ɛfa Filistifoɔ ho.+ 2 Deɛ Yehowa aka nie:

“Hwɛ! Nsuo firi atifi fam reba.

Ɛbɛyiri abu afa so.

Ɛbɛyiri afa asaase no ne deɛ ɛwɔ so nyinaa,

Kuro no ne wɔn a wɔtete mu nyinaa.

Mmarima bɛteateam,

Na obiara a ɔte asaase no so bɛsu ateateam.

3 Sɛ wɔte n’apɔnkɔ* nan a ɛrepempem fam kim-kim-kim,

Ne ne ko nteaseɛnam a ɛreyɛ kiri-kiri-kiri,

Ne ne nteaseɛnam no nan a ɛretwa ne ho kiridi-kiridi-kiridi no a,

Agyanom rentwa wɔn ani mpo nhwɛ wɔn mma,

Wɔn nsam a ago nti.

4 Ɛfiri sɛ ɛda a ɛreba no bɛsɛe Filistifoɔ nyinaa;+

Ɛbɛtwitwa Tiro+ ne Sidon+ aboafoɔ a aka nyinaa.

Na Yehowa bɛsɛe Filistifoɔ no,

Wɔn a wɔaka a wɔfirii Kaftor*+ supɔ so no.

5 Gasa tiri so bɛpa.*

Wɔama Askelon aka n’ano atom.+

O mo a moaka wɔ n’asaasetraa so,*

Mode adeɛ bɛtwitwa mo ho akɔsi da bɛn?+

6 Ao! Yehowa sekan!+

Da bɛn na wobɛyɛ dinn?

San kɔhyɛ wo bɔha* mu.

Home, na yɛ komm.

7 Ɛbɛyɛ dɛn ayɛ dinn,

Berɛ a Yehowa na ahyɛ no?

Ɛreba Askelon ne mpoano asaase no so.+

Ɛhɔ na wahyɛ sɛ ɛmmra.”