Leviticus

25 Yehowa toaa so ka kyerɛɛ Mose wɔ Bepɔw Sinai so sɛ: 2 “Ka kyerɛ Israelfo sɛ, ‘Sɛ mudu asase a mede ama mo+ no so a, asase no nni homeda mma Yehowa.+ 3 Momfa mfe asia nnua mo mfuw mu aba, na momfa mfe asia nsiesie mo bobe nturo, na mommoaboa asase no so nnɔbae ano.+ 4 Nanso afe a ɛto so ason no, munnyaw asase no na ɛnhome koraa;+ ɛyɛ ahomegye bere ma Yehowa. Munnnua aba biara, na munnsiesie mo bobeturo nso. 5 Munntwa aba a ɛno ara fifii asase no so anaa bobe a wɔansiesie ho a asow no. Afe mũ no nyinaa munnyaw asase no na ɛnhome. 6 Asase a ɛrehome no bɛma mo aduan, mo ne mo nkoa ne mo mfenaa ne apaafo ne atubrafo, ahɔho a wɔabɛsoɛ mo, 7 ne mo afieboa ne wuram mmoa a wɔwɔ mo asase no so. Asase no so aba nyinaa yɛ wɔn aduan.

8 “‘Na monkan ɔhome mfe ason, mfe ason ahorow ason, na ɔhome mfe ason no dodow bɛyɛ mfe aduanan akron. 9 Na ɔsram a ɛto so ason no da a ɛto so du+ no, momma wɔnhyɛn abɛn denneennen.+ Saa da no yɛ mpata da,+ na momma wɔnhyɛn abɛn wɔ mo asase so baabiara. 10 Monyɛ afe a ɛto so aduonum no afe kronkron, na mommɔ dawuru mma asase no sofo nyinaa nnya ahofadi.+ Ɛbɛyɛ Ahofadi afe+ ama mo, na obiara nsan nkɔ n’agyapade so na obiara nsan nkɔ n’abusuafo nkyɛn.+ 11 Afe a ɛto so aduonum no bɛyɛ mo Ahofadi afe.+ Munnnua aba biara, na munntwa aba a ɛno ara fifii asase no so anaa bobe a wɔansiesie ho a asow no.+ 12 Ɛyɛ Ahofadi afe, na ɛnyɛ kronkron mma mo. Munni asase no so aba.+

13 “‘Mo mu biara nsan nkɔ n’agyapade so wɔ Ahofadi afe yi mu.+ 14 Sɛ motɔn agyapade bi ma mo yɔnko anaa motɔ biribi fi ne hɔ a, monhwɛ na obiara ansisi ne yɔnko.+ 15 Wobɛhwɛ mfe dodow a atwam fi Ahofadi afe no so na woatɔ agyapade afi wo yɔnko hɔ, na ɔbɛhwɛ mfe dodow a wode betwa so aba na watɔn ama wo.+ 16 Sɛ asase no bɛba abedi wo nsam mfe pii a, ɛsɛ sɛ ɔma ne bo kɔ soro,+ na sɛ ɛbɛyɛ mfe kakraa bi a, ɛsɛ sɛ ɔtew bo no so, efisɛ nnɔbae a wubenya wɔ so na ɔretɔn ama wo. 17 Obiara nnsisi ne yɔnko,+ na munsuro mo Nyankopɔn,+ efisɛ mene Yehowa mo Nyankopɔn.+ 18 Enti munni m’ahyɛde so na monkora m’atemmusɛm so na momfa mmɔ mo bra. Ɛba saa a, mobɛtena asase no so dwoodwoo.+ 19 Na asase no bɛma ne nnɔbae,+ na mubedidi amee atena so dwoodwoo.+

20 “‘Nanso ebia mobɛka sɛ: “Yɛannua aba biara ammoaboa nnɔbae ano, na dɛn na yebedi afe a ɛto so ason no mu?”+ 21 Ɛnde munhu sɛ mɛma me nhyira aba mo so afe a ɛto so asia no mu, na ɛbɛsow mfe abiɛsa nnɔbae.+ 22 Afe a ɛto so awotwe no munnua aba, na mubedi aduan a ɛwɔ hɔ dedaw no akosi afe a ɛto so akron no. Enti ansa na mubetwa nnɔbae foforo no, mobɛkɔ so adi dedaw no.

23 “‘Enti monntɔn asase no korakora,+ efisɛ asase no yɛ me dea.+ Na m’ani so de, moyɛ ahɔho ne atubrafo.+ 24 Na asase a mudi so nyinaa, momma kwan mma asase biara wura nsan ntɔ n’ade.+

25 “‘Sɛ ehia wo nua na ɔtɔn n’agyapade bi a, ne busuani a ɔbɛn no nso mmɛtɔ nea ne nua no atɔn no.+ 26 Nanso sɛ onni busuani biara a obetumi asan atɔ na akyiri yi biribi ba ne nsam a ebetumi atua ka no a, 27 ɔnsese mfi afe a ɔtɔnee no na ɔmfa sika a aka biara mma nea ɔtɔɔ agyapade no, na ɔnsan mfa n’ade.+

28 “‘Na sɛ onni sika a ɔde bɛsan agye n’agyapade no a, ɛbɛkɔ so atena nea ɔtɔe no hɔ akosi Ahofadi afe+ no. Ahofadi afe no du a, n’agyapade no bɛsan abedi ne nsam.+

29 “‘Sɛ obi tɔn fie wɔ kurow a wɔato ho fasu mu a, ɔwɔ hokwan sɛ ɔsan tɔ n’ade afe biako ntam. Afe biako na ɔwɔ hokwan sɛ obetumi abetua ka asan agye n’ade.+ 30 Nanso sɛ wantumi antɔ na afe so a, ofie a ɛwɔ kurow a ɔfasu wɔ ho mu yi bɛyɛ nea ɔtɔe no dea korakora, n’awo ntoatoaso nyinaa mu. Sɛ Ahofadi afe no du mpo a, ɛremfi ne nsam. 31 Nanso afie a ɛwowɔ nkuraase a afasu nni ho no de, wommu no sɛ ɛka afusase ho. Ofie no wura wɔ hokwan sɛ ɔsan tɔ n’ade,+ na sɛ amma saa mpo a, Ahofadi afe+ no du a, wobegyaa mu ama no.

32 “‘Na Lewifo afie a ɛwowɔ wɔn nkurow mu+ no de, sɛ wɔtɔn a, wɔwɔ hokwan sɛ wɔsan nya wɔn ade bio bere biara a wɔn ahoboa bɛso.+ 33 Sɛ ɛba sɛ Lewini bi ansan antɔ ne fie a watɔn wɔ kurow a odi so no mu a, ɛnde sɛ Ahofadi afe+ no so a, wobegyaa mu ama no. Nea enti a ɛte saa ne sɛ Lewifo afie a ɛwowɔ wɔn kurom no ne agyapade a wɔde ama wɔn wɔ Israel.+ 34 Na wɔn nkurow ho mfikyisase+ a mmoa bedidi so no de, wɔrentumi ntɔn, efisɛ ɛyɛ agyapade a wɔde ama wɔn daa.

35 “‘Sɛ ehia wo nua ma ne ho kyere no+ a, boa no.+ Na ma ɔntena wo nkyɛn sɛ ɔhɔho ne otubrafo.+ 36 Nnye mfɛntom anaa apempensika mfi ne hɔ,+ na suro wo Nyankopɔn+ na wo nua no ntena wo nkyɛn. 37 Woma no sika a, nnye mfɛntom,+ na woma no aduan a, nnye apempensika. 38 Mene Yehowa mo Nyankopɔn, na me na miyii mo fii Egypt asase so sɛ mede Kanaan asase+ bɛma mo na ama moahu sɛ mene mo Nyankopɔn.+

39 “‘Sɛ ehia wo nua na ɔtɔn ne ho ma wo+ a, mfa no nyɛ nkoadwuma.+ 40 Mmom ɔntena wo nkyɛn sɛ ɔpaani+ anaa otubrafo. Na ɔnsom wo nkosi Ahofadi afe no so. 41 Afei ɔne ne mma nyinaa mfi wo nkyɛn nkɔ n’abusuafo nkyɛn, na ɔnsan nkɔfa agyapade a n’agyanom gyaw maa no+ no. 42 Wɔyɛ me nkoa a miyii wɔn fii Egypt asase so.+ Ɛnsɛ sɛ wɔtɔn wɔn ho sɛnea wɔtɔn akoa. 43 Nteetee no na nni n’ani,+ na suro wo Nyankopɔn.+ 44 W’akoa anaa w’afenaa befi amanaman a wɔatwa mo ho ahyia no mu. Wɔn nkyɛn na ɛsɛ sɛ motɔ akoa anaa afenaa biara. 45 Afei nso mubetumi atɔ ahɔho a wɔabɛtena mo nkyɛn+ no bi mma anaa abusuafo a wɔanya wɔn wɔ mo asase so no bi na wɔabɛyɛ mo agyapade. 46 Wɔyɛ agyapade a mubegyaw ama mo mma na wɔayɛ wɔn dea daa.+ Momma wɔnyɛ adwuma mma mo, na mo nuanom Israelfo de, monhwɛ na moanteetee wɔn anni wɔn ani.+

47 “‘Na sɛ ɛba sɛ biribi ba ɔhɔho anaa otubrafo a ɔne wo te no nsam na ehia wo nua ma enti ɔtɔn ne ho ma ɔhɔho anaa otubrafo no anaa ɔhɔho no busuani bi a, 48 ne tɔn+ akyi no, hokwan wɔ hɔ sɛ wɔsan gye no.+ Ne nuanom mu biako betumi asan atɔ no afi hɔ.+ 49 Ne papa nua anaa ne papa nua ba anaa ne busuani biara+ betumi abetua agye no aba fie.

“‘Sɛ nso biribi ba ɔno ankasa nsam a, obetumi atua ka no ade ne ho.+ 50 Ɔne nea ɔtɔɔ no no mmu akontaa mfi bere a ɔtɔɔ no no nkosi bere a Ahofadi afe+ no bedu, na mfe dodow a ɛwom no na ɛbɛkyerɛ ne bo.+ Ɔne no nni sɛnea ɔne ɔpaani di.+ 51 Sɛ mfe a aka no dɔɔso a, ɛnde ɔnhwɛ nea aka no so na ɔnnan sika a wɔde tɔɔ no no bi mma nea ɔtɔɔ no no na onnye ne ho. 52 Sɛ nso aka mfe kakraa bi na Ahofadi afe+ no adu a, ɛnde ommu nea aka no ho akontaa. Na ɔnhwɛ mfe a aka no so ntua sika mma nea ɔtɔɔ no no na onnye ne ho. 53 Ɔne no nni te sɛ ɔpaani+ a ɔyɛ adwuma ma no afe afe. Nhwɛ mma ne wura nnteetee no.+ 54 Nanso sɛ wantumi annye ne ho saa kwan yi so mpo a, Ahofadi afe+ no bedu ama ɔne ne mma ade wɔn ho.

55 “‘Me na Israelfo yɛ me nkoa. Wɔyɛ me nkoa+ a miyii wɔn fii Egypt asase so.+ Mene Yehowa mo Nyankopɔn.+