Sakaria

Yehowa na ɔyɛ omununkum a ɛde osuframa ne aprannaa ba,

Na ɔno na ɔma osu tɔ ma nnipa,+

Na ɔma obiara nya afuw mu aduan.

 2 Na Terafim ahoni* ka nnaadaasɛm,*

Na nkɔmhyɛfo nya atoro anisoadehu.

Adae hunu na wɔka ho asɛm,

Na wɔde nsɛnhunu kyekye nnipa werɛ.

 3 Me bo afuw nguanhwɛfo no denneennen,

Na atumfo a wɔn tirim yɛ den* no beyi wɔn ano akyerɛ me;

Efisɛ asafo Yehowa atwa n’ani abɛhwɛ ne nguan,+ watwa n’ani abɛhwɛ Yuda fi.

Na wayɛ wɔn sɛ ɔpɔnkɔ nuonyamfo a ɔde no kɔ ɔko.

 4 Ne mu na otitiriw* no befi aba,

Ne mu na sodifo a ɔyɛ okyigyinafo* no befi aba,

Ne mu na agyan a wɔde kɔ ɔko no befi aba;

Ne mu na ɔhwɛfo* biara bepue akɔ; wɔn nyinaa bɛbom afi ne mu.

 5 Wɔbɛyɛ te sɛ akatakyi

A wotiatia abɔnten so atɛkyɛ mu wɔ ɔko mu.

Wɔbɛko, efisɛ Yehowa ka wɔn ho;+

Na wɔn a wɔtete apɔnkɔ so no anim begu ase.+

 6 Mɛma Yuda fi ayɛ den,

Na megye Yosef fi.+

Mɛma wɔasi wɔn dedaw mu bio,

Efisɛ mehu wɔn mmɔbɔ;+

Na wɔbɛyɛ sɛ nnipa a mentow wɔn nkyenee da;+

Efisɛ mene Yehowa wɔn Nyankopɔn, na megye wɔn so.

 7 Efraimfo bɛyɛ sɛ akatakyi,

Na wɔn koma bedi ahurusi te sɛ nea wɔanom nsã.+

Wɔn mma behu eyi na wɔadi ahurusi;

Wɔn koma ani begye wɔ Yehowa mu.+

 8 ‘Mɛbɔ hwirema afrɛ wɔn, na maboa wɔn ano;

Efisɛ megye wɔn,+ na wɔbɛyɛ bebree,

Na wɔbɛkɔ so ara adɔɔso.

 9 Mɛpete wɔn te sɛ aba agu aman horow so,

Nanso bere a wɔwɔ akyirikyiri mpo wɔbɛkae me;

Wɔne wɔn mma begyina wɔn nan so bio na wɔasan aba.

10 Mede wɔn befi Egypt asaase so aba,

Na maboaboa wɔn ano afi Asiria aba.+

Mede wɔn bɛba Gilead+ ne Lebanon asaase so,

Na ɛhɔ mpo, wɔn dodow nti wɔrenkɔ hɔ.+

11 Ɔbɛfa ɛpo no mu, na ɔbɛma ɛpo no ho ayeraw no;

Na ɔde ade bɛbɔ asorɔkye no wɔ ɛpo no mu;+

Nil bɛyow akodu ase tɔnn.

Nea Asiria de hoahoa ne ho no, wɔbɛbrɛ no ase,

Na Egypt ahempoma bɛkɔ.+

12 Mɛma wɔayɛ den wɔ Yehowa mu,+

Na wɔbɛnantew ne din mu,’+ Yehowa asɛm ni.”