Wɔn Gyidi Nti Wɔde Wɔn Agu Afiase
Russia aban mpanyimfo no remia ɔsɔretia a wɔde ba Yehowa Adansefo so no mu denneennen. Wɔreyɛ Adansefo no ayayade te sɛ nea bere bi a atwam Soviet aban no yɛe no. Efi 2017 reba no, aban no atu n’ani asi Yehowa Adansefo pii so; wɔabɔ awura wɔn afie mu akɔsɛɛkye hɔ, wɔabisabisa ebinom nsɛm, wɔakyere ebinom, na wɔde ebi nso agu afiase. Besi April 18, 2022 no, na mpanyimfo no akyere Adansefo 85 de bi agu afiase, na ebinom nso wonnya nnii wɔn asɛm. Wɔaka Adansefo 25 nso ahyɛ wɔn afie ma asraafo rewɛn wɔn, na Adansefo 218 de, aban no ahyɛ sɛ ɛnsɛ sɛ wɔn mu biara fi ne kurom. Wɔabɔ wɔn nyinaa sobo sɛ, wɔatew kuw bi a “ɛsɛe nkurɔfo adwene,” wɔde wɔn ho hyɛ saa kuw no dwumadi mu anaa wɔde wɔn sika boa saa kuw no. Yɛrekasa yi, anyɛ yiye koraa no, Adansefo 437 na wogu so rehwehwɛ wɔn nsɛm mu. Nea osua koraa no adi mfe 21; nea wanyin paa nso adi mfe 91.
Sɛnea Russia De Mmara a Ɛfa Kuw a Ɛsɛe Nkurɔfo Adwene Ho No Ayɛ Adwuma
April 2017 no, Russia aban no baraa Yehowa Adansefo wɔ ɔman no mu. Atumfoɔ no kyerɛ sɛ, sɛ wɔabara Yehowa Adansefo de a, ɛnde wobetumi atan wɔn ani. Afei mmara a ɛne Criminal Code a ɛfa kuw a ɛsɛe nkurɔfo adwene ho no, wokyinkyim ne fã bi a ɛyɛ Article 282 de foa nea wɔreyɛ no so. Nokwasɛm ne sɛ, som a Yehowa Adansefo som Onyankopɔn nti na wɔasɔre atia wɔn. Sɛ wodi Adansefo no asɛm na wobu wɔn fɔ a, wobetumi de wɔn agu afiase mfe du mpo.
Wɔbaraa Adansefo no bosome baako akyi no, wɔkyeree Dennis Christensen a ofi Denmark a na wadi mfe 48 no wɔ Oryol. May 25, 2017 no, apolisifo a wokurakura akode ne Federal Security Services mpanyimfo kɔsɛee Yehowa Adansefo nhyiam bi a na wɔreyɛ wɔ Russia kurow Oryol mu, na wɔkyeree Owura Christensen. Wogyinaa Criminal Code no fã a ɛyɛ Article 282.2(1) so bɔɔ no sobo sɛ, esiane sɛ odi akoten wɔ ɔsom no nhyehyɛe mu nti, watew kuw bi a “ɛsɛe nkurɔfo adwene.” Wɔde bɛyɛ afe baako na edii Owura Christensen asɛm; ɔkɔɔ kɔɔto bɛboro mpɛn 50. Ɛno akyi no, wobuu no fɔ sɛ ɔnkɔda afiase mfe nsia. Ne bɔne ara ne sɛ ɔyɛ Yehowa Danseni. May 2022 na bere bɛso ama wɔagyaa no.
Efi 2017 reba no, mpanyimfo a wɔhwɛ ma wɔde mmara yɛ adwuma no afa ɔkwan koro no ara so bere a wɔrekɔkyere Yehowa Adansefo de wɔn agu afiase no. Nea wɔyɛ ne sɛ, apolisifo de tuo bɔ wura Adansefo no afie mu. Ɛtɔ da nso a, wɔde tuo si obiara a ɔwɔ fie hɔ no so. Wowura fie hɔ a, wonnim obiara; abofra oo, akwakoraa oo, aberewa oo, wɔde tuo kyerɛ no so. Wɔhyɛ obiara ma ɔda fam. Wɔreyɛ saa nyinaa, na ebinom nso resɛɛkye hɔ. Ɛyɛ a, wɔfa nneɛma no bi, afei wɔkyere Adansefo no bi kobisabisa wɔn nsɛm. Ɛba saa a, wɔn a wobisabisa nsɛm no bɔ Adansefo no bi sobo sɛ wɔyɛ nsɛmmɔnedifo, efisɛ wɔde wɔn ho akɔbɔ kuw bi ɛsɛe nkurɔfo adwene. Afei mpanyimfo no srɛ kɔɔto sɛ wɔmfa Adansefo no ngu afiase nkosi sɛ wobedi wɔn asɛm. Ɛno akyi no, wɔde Adansefo no kɔ kɔɔto mpɛn pii kodi wɔn asɛm; wɔbɔ ebinom ka, na wɔde ebinom nso gu afiase.
October 28, 2021 no, Russia Asɛnnibea Kunini no yɛɛ mmara a ɛfa kuw a ɛsɛe nkurɔfo adwene ho no mu nsakrae nanso besi nnɛ nyinaa, wɔda so ara bɔ wura nkurɔfo afie mu kɔsɛɛkye hɔ, wobisabisa wɔn nsɛm na wɔkyere binom nso gu afiase. Nsakrae a Asɛnnibea no ayɛ no kyerɛ sɛ, sɛ obi de ho hyɛ ɔsom bi mu anaa nnipakuw bi bom som a, ɛnsɛ sɛ wobu no sɛ wɔde wɔn ho ahyɛ ɔsom a wɔabara wɔn dwumadi mu. Nanso Russia aban no da so ara bu Yehowa Adansefo sɛ kuw a ɛsɛe nkurɔfo adwene, na wogyina ɛno so tan wɔn ani. Mmofra oo, mpanyin oo, mmea oo, mmarima oo, wontwa obiara nnyaw.
Adansefo a Wɔkyere Wɔn Gu Afiase a Ntease Biara Nnim No, Wɔrebɔ Mmɔden Ama Ɛto Atwa
Mmaranimfo a Adansefo a wɔde wɔn agu afiase afa wɔn no de asɛm no akɔdan Amanaman Nkabom Bagua a Ɛhwɛ Nnipa Ahofadi Ho Nsɛm so no. Afei nso, wɔakyerɛw asɛm yi ho nkrataa 64 de akɔto Europe Asɛnnibea a Ɛhwɛ Nnipa Ahofadi Ho Nsɛm So no anim. Nanso ne nyinaa akyi no, Adansefo a wɔkyere wɔn gu afiase a ntease biara nnim no to ntwae.
Bu a Russia bu Yehowa Adansefo sɛ kuw a ɛsɛe nkurɔfo adwene no, akuwakuw a ɛwɔ aman horow so akasa atia. Sɛ yɛbɛyɛ nhwɛso a, March 12, 2020 no, OSCE a ɛyɛ kuw a ɛhwɛ bammɔ ho nsɛm so wɔ Europe ne European Union kaa wɔn ti pam ho kyerɛw asɛm bi de kasa tiaa Russia man no mpanyimfo sɛ wɔreteetee Yehowa Adansefo. Nea wɔkyerɛwee ni: “Ɛhaw European Union no paa sɛ Russia aban no retan Yehowa Adansefo ani saa . . . Amanneɛbɔ a yɛn nsa aka nnansa yi ara a ɛkyerɛ aninyanne a Russia aban no de Yehowa Adansefo bi a wɔakyere wɔn refa mu no, ɛhaw yɛn paa.” Amanneɛbɔ no toa so sɛ: “Mmara a UN Convention, International Covenant on Civil and Political Rights ne European Convention on Human Rights ahyɛ a ɛkyerɛ sɛ ɛnsɛ sɛ wɔde obiara fa aninyanne mu a Russia aban no nso de ne nsa ahyɛ ase bi no, nea Russia aban no reyɛ no kyerɛ sɛ wabu so.”
Nnansa yi ara, Neil Bush a ɔyɛ UK man no nanmusini wɔ OSCE no mu no kyerɛw asɛm bi kɔmaa OSCE Permanent Council no wɔ March 4, 2021. Nea ɔkae ni:
Efi afe 2017 a Russia Asɛnnibea Kunini no baraa Yehowa Adansefo no, yehu sɛ kyere ara na wɔrekyere Yehowa Adansefo. Afei nso, wɔabɔ bebree sobo sɛ wɔyɛ nsɛmmɔnedifo, enti wɔrehwehwɛ wɔn nsɛm mu. Ɛno da nkyɛn a, wɔadi ebinom asɛm de wɔn agu afiase. Yɛbɛyɛ nhwɛso a, February 24 no, wɔkyeree Valentina Baranovskaya ne Roman Baranovskiy dii wɔn asɛm de wɔn guu afiase. February 10 nso, wɔde Aleksandr Ivshin kɔtoo afiase. Nea ɛrekɔ so yi di adanse sɛ Russia aban ahyɛ da paa de asi n’ani so sɛ obedi Yehowa ani. . . . Yɛrekae Russia aban no sɛ mmara a OSCE no ahyehyɛ a ɛbɔ nnipa fahodi ho ban a Russiafo nso de wɔn nsa ahyɛ ase bi no, wɔnhwɛ nni so.”
Bere a Nsɛm No Sisii
April 18, 2022
Adansefo a wɔde wɔn agu afiase dodow yɛ 85.
January 12, 2022
Russia man no asoɛe a ɛhwɛ ma atɛntrenee yɛ adwuma no de JW Library app no kaa nneɛma wobu no sɛ ɛsɛe nkurɔfo adwene no ho. Wei nko ara ne app a edi kan a wɔabara sɛ ɛsɛe nkurɔfo adwene wɔ Russia.
October 25, 2021
Trusovskiy Mantam Asɛnnibea a ɛwɔ Astrakhan dii Rustam Diarov, Yevgeniy Ivanov, ne Sergey Klikunov asɛm buu wɔn fɔ sɛ wɔnkɔda afiase mfe nwɔtwe. Olga nso, wodii n’asɛm buu no fɔ sɛ ɔnkɔda afiase mfe mmiɛnsa ne fã.
September 27, 2021
Bere a wɔbaraa JW Library app no wɔ Russia ne Crimea sɛ ɛsɛe nkurɔfo adwene no, wɔde asɛm no kɔdan Saint Petersburg kurow no asɛnnibea, nanso wɔbɔ gui. Enti gyinae a na wɔadi kan asi no, wɔansesa no.
September 23, 2021
Volgograd Traktorozavodsky Mantam Asɛnnibea no dii Sergey Melnik ne Igor Yegozaryan asɛm buu wɔn fɔ sɛ wɔnkɔda afiase mfe nsia. Valeriy Rogozin nso, wobuu no fɔ sɛ ɔnkɔda afiase mfe nsia ne abosome nnum.
August 11, 2021
Abinskiy Mantam Asɛnnibea a ɛwɔ Krasnodar no de nnanu tenaa Vasiliy Meleshko asɛm so, na wobuu no fɔ sɛ ɔnkɔda afiase mfe mmiɛnsa.
June 30, 2021
Blagoveshchensk kurow no asɛnnibea a ɛwɔ Amur Mantam mu no buu Aleksey Berchuk fɔ sɛ ɔnkɔda afiase mfe nwɔtwe, na wobuu Dmitriy Golik nso fɔ sɛ ɔnka afiase mfe nson.
February 24, 2021
Abakan kurow no asɛnnibea a ɛwɔ Republic of Khakassia buu Valentina Baranovskaya fɔ sɛ ɔnkɔda afiase mfe mmienu; ne ba barima Roman Baranovskiy nso, wobuu no atɛn sɛ ɔnkɔda afiase mfe nsia.
February 10, 2021
Abinskiy Mantam Asɛnnibea a ɛwɔ Krasnodar no buu Aleksandr Ivshin fɔ sɛ ɔnkɔda afiase mfe nson ne fã.
September 2, 2020
Berezovsky kurow no asɛnnibea a ɛwɔ Kemerovo Mantam mu no buu Sergey Britvin ne Vadim Levchuk fɔ sɛ wɔnkɔda afiase mfe nnan.
August 3, 2020
Pskov Mantam Asɛnnibea no buu atɛn sɛ wonyi Gennady Shpakovskiy mfi afiase. Asɛnnibea no gye toom sɛ ɛfata sɛ wobu no fɔ ma ɔkɔda afiase mfe nsia ne fã. Nanso wosii gyinae sɛ wobegyaa no na wɔde wɔn ani ade n’akyi mfe nsia ne fã mmom.
July 13, 2020
Anyɛ hwee koraa no, wɔbɔ wuraa Adansefo 100 a ɛwɔ Voronezh ne Belgorod mantam mu afie mu kotuu hɔ nneɛma hwehwɛɛ hɔ.
June 9, 2020
Pskov kurow no asɛnnibea bɔɔ Gennady Shpakovskiy a wadi mfe 61 no sobo dii n’asɛm buu no fɔ sɛ ɔnkɔda afiase mfe nsia ne fã.
February 6, 2020
Adansefo nsia a wodii wɔn asɛm September 19, 2019 no, wɔde wɔn mu nnum kɔɔ afiase a ɛwɔ Orenburg a wɔyɛ adwumaden wɔ hɔ no. Woduu hɔ no, wɔn a ɛhwɛ nneduafo so no birim wɔn, wotutuu wɔn nan wowɔɔ wɔn, na wɔde nkontimmaa nso bobɔɔ wɔn. Wei maa Owura Makhammadiyev mfe dompe bui, n’ahrawa ne n’asaabo ho kae.
September 19, 2019
Ɔtemmufo Dmitry Larin a ɔwɔ Leninskiy Mantam Asɛnnibea a ɛwɔ Saratov no buu Adansefo mmarima nsia fɔ sɛ wɔnkɔda afiase, efisɛ wɔadi anim ayɛ dwumadi bi a ‘ɛsɛe nkurɔfo adwene.’ Adansefo no din na edidi so yi: Konstantin Bazhenov, Aleksey Budenchuk, Feliks Makhammadiyev, Roman Gridasov, Gennadiy German, ne Aleksey Miretskiy.
May 23, 2019
Oryol Mantam Asɛnnibea no bɔɔ Dennis Christensen asɛm a ɔde kɔdan wɔn no gui, na wɔkyerɛ sɛ gyinae a wosii sɛ ɔnkɔda afiase mfe nsia no nsesae.
April 26, 2019
Amanaman Nkabom Bagua a Ɛhwɛ Sɛ Wɔrenkyekye Nkurɔfo Basabasa no ahu sɛ Russia aban no atiatia Dimtriy Mikhailov fahodi so. Afei nso, wɔakasa atia Russia sɛ ɔretan Yehowa Adansefo ani.
February 6, 2019
Zheleznodorozhniy Mantam Asɛnnibea no buu Dennis Christensen fɔ sɛ ɔnkɔda afiase mfe nsia.
October 9, 2018
Apolisifo ne asogyafo bɔ wuraa Adansefo afie a ɛwɔ Kirov mu kotuu hɔ nneɛma hwehwɛɛ hɔ. Wɔkyeree Adansefo mmarima dodow bi. Ná Andrzej Oniszczuk a ofi Poland ka ho; wɔde wɔn guu afiase na akyiri yi wɔadi wɔn asɛm.
July 15, 2018
Apolisifo bɔ wuraa Adansefo pii afie mu wɔ Penza kotuu hɔ nneɛma hwehwɛɛ hɔ. Wɔkyeree Vladimir Alushkin too afiase na ɔretwɛn sɛ wobedi n’asɛm.
July 4, 2018
Apolisifo bɔ wuraa Adansefo afie mu wɔ Omsk. Wɔkyeree Sergey ne Anastasia Polyakov de wɔn guu afiase, na wɔretwɛn sɛ wobedi wɔn asɛm. Owurayere Polyakova ne Ɔdanseni bea a odi kan a Russia aban no de no ato afiase sɛ ɔde ne ho akɔbɔ kuw bi a ɛsɛe nkurɔfo adwene.
June 12, 2018
Apolisifo bɔ wuraa Adansefo afie mu wɔ Saratov. Wɔkyeree Konstantin Bazhenov, Felix Makhammadiev, ne Aleksey Budenchuk guu afiase, na wɔretwɛn sɛ wobedi wɔn asɛm. Adansefo mmiɛnsa a wɔne Gennadiy German, Roman Gridasov, ne Aleksey Miretskiy nso, wɔahyɛ wɔn sɛ wɔmfa wɔn nsa nhyɛ krataa ase sɛ kurow a wɔte mu no, wɔremfi mu.
June 3, 2018
Apolisifo bɔ wuraa afie a ɛwɔ Tomsk ne Pskov kotuu hɔ nneɛma hwehwɛɛ hɔ. Wɔkyeree Sergey Klimov too afiase a ɔretwɛn sɛ wobedi n’asɛm.
February 19, 2018
Wofii ase dii Dennis Christensen asɛm wɔ Zheleznodorozhniy kɔɔto. Ɔtemmufo Aleksey Rudnev na ɔtenaa agua mu tiee asɛm no.
July 20, 2017–November 2018
Efi bere a wɔde Dennis Christensen kɔtoo afiase a wonnya nnii n’asɛm no, mpɛn pii na wɔde nna a ɔde bɛda afiase no bi aka ho. Nea edi kan, Sovietskiy Mantam asɛnnibea no na ɛhyɛe sɛ wɔnyɛ. Ɛno akyi no, Zheleznodorozhniy Mantam asɛnnibea no nso yɛɛ saa ara.
May 26, 2017
Sovietskiy Mantam asɛnnibea no hyɛe sɛ wɔmfa Dennis Christensen nto afiase abosome mmienu ntwɛn nkosi sɛ wobedi n’asɛm.
May 25, 2017
Apolisifo bɔ wuraa baabi a Adansefo no som wɔ Oryol kotuu hɔ nneɛma hwehwɛɛ hɔ, na wɔkyeree Dennis Christensen.
April 20, 2017
Asɛnnibea Kunini a ɛwɔ Russia no buu atɛn sɛ Russia aban no agye Yehowa Adansefo adwumayɛbea ti a ɛwɔ hɔ, ne wɔn adan 395 a wohyiam som wɔ mu no.