So Yehowa Adansefo Nkutoo?

Umberto Eco a ɔyɛ abakɔsɛm kyerɛwfo, nyansapɛfo ne kasa horow mu ɔbenfo a wagye din wɔ wiase nyinaa no bɔɔ amanneɛ wɔ atesɛm krataa bi mu nnansa yi sɛ sɛnkyerɛwfo baanu bi abɔ n’akyi. Dɛn ntia? Ose “wotuu me fo sɛ ɛnsɛ sɛ meka ‘Geova’ [Italia kasa ma Yehowa] de kyerɛ Apam Dedaw Nyankopɔn no, na mmom menka ‘Iahwe’ anaa ‘Yahwe’ efisɛ Yehowa Adansefo nkutoo na wɔka ‘Geova.’ Mmuae bɛn na ɔde mae? “Eyi nyɛ nokware efisɛ nsɛm asekyerɛ nhoma ahorow kyerɛ sɛ ‘Geova’ ne mprempren Italia kasa ma Iahwe.”

Nokwarem no, Ɔbenfo Eco de no teɛ. Nea ɛyɛ anigye no, ɛbɛyɛ sɛ bere bi na wonim Yehowa din no kɛse wɔ Italy esiane sɛ na wɔde di dwuma wɔ asɔredan pii siesie mu nti. Wobetumi ahu nhwɛso biako wɔ mfonini a ɛwɔ ha yi mu. Ɛsɛ sɛ wɔhyɛ no nsow sɛ tete no na wɔkyerɛw Onyankopɔn din no ‘Jeova’ mmom sen ‘Geova’ wɔ Italiafo asɔredan ahorow ho. Nanso ɛnnɛ, sɛnea Ɔbenfo Eco sɛnkyerɛwfo no nsɛm no kyerɛ no, sɛ Italiani ɔpapahwekwa bi nim edin Geova no a ɛda adi yiye sɛ ɔte fii Yehowa Adansefo mu biako nkyɛn.