Hu Yehowa—Onyankopɔn Teasefo No
BERE a Indiani Ɔbenfo Radhakrishnan de sɛnea Hindufo bu Onyankopɔn toto nyamesom nhyehyɛe afoforo de ho no, ɔka sɛ: “Hebrifo Nyankopɔn no yɛ soronko. Ɔyɛ teasefo ankasa a onyaa abakɔsɛm mu dwumadi mu kyɛfa na n’ani di wiase a ɛrenya nkɔanim yi mu nsakrae ne nsɛm a esisi no akyi. Ɔyɛ ɔteasefo a ɔne yɛn di nkitaho.”
Hebri din a wɔde frɛ Bible mu Nyankopɔn no ne יהוה, a wɔtaa kyerɛ ase “Yehowa.” Ɔsen anyame a aka nyinaa. Dɛn na yenim fa ne ho? Ɔkwan bɛn so na ɔne nnipa a wɔtraa ase wɔ Bible mmere mu no dii?
Yehowa ne Mose Di “Mmɔanim”
Ná Yehowa ne n’akoa Mose wɔ ayɔnkofa a ɛma wodi “mmɔanim,” ɛwom mpo sɛ Mose anhu Onyankopɔn ankasa de. (Deuteronomium 34:10; Exodus 33:20) Bere a na Mose yɛ aberante no, na ne koma di Israelfo a na saa bere no wɔyɛ nkoa wɔ Misraim no akyi. Ɔpoo n’asetra sɛ Farao fie nipa, na “ɔpawee sɛ ɔne Nyankopɔn man behu amane.” (Hebrifo 11:25) Ne saa nti, Yehowa maa Mose hokwan atitiriw pii.
Sɛ Farao fie nipa no, “wɔkyerɛɛ Mose Misrifo nyansa nyinaa.” (Asomafo no Nnwuma 7:22) Nanso sɛnea ɛbɛyɛ na wadi Israel man no anim no, na ehia nso sɛ osua ahobrɛase, boasetɔ, ne odwo su. Ɔde mfe 40 a ɔde yɛɛ oguanhwɛfo wɔ Midian no yɛɛ eyi. (Exodus 2:15-22; Numeri 12:3) Ɛwom sɛ na Yehowa da so ara yɛ obi a wonhu no de, nanso ɔdaa ne ho adi yii n’atirimpɔw adi kyerɛɛ Mose, na Onyankopɔn nam abɔfo so de Mmara Nsɛm Du no maa no. (Exodus 3:1-10; 19:3–20:20; Asomafo no Nnwuma 7:53; Hebrifo 11:27) Bible kyerɛ yɛn sɛ na “[Yehowa, NW] ne Mose di nhwɛanim kasa sɛ onipa ne ne yɔnko kasa.” (Exodus 33:11) Nokwarem no, Yehowa ankasa kae sɛ: “Ano ne ano na me ne no de kasa.” Hwɛ ayɔnkofa a ɛsom bo na emu dɔ a Mose ne ne Nyankopɔn a wonhu no, nanso ɔyɛ ɔteasefo no nyae!—Numeri 12:8.
Mose yɛɛ Mmara no ne nea ɛkeka ho nyinaa nso ho kyerɛwtohɔ kaa Israel man no tete abakɔsɛm ho. Afei nso, wɔde hokwan foforo a ɛsom bo hyɛɛ ne nsa—Genesis nhoma no kyerɛw. Ná nhoma no fã a etwa to no yɛ abakɔsɛm a na n’ankasa abusuafo nim yiye ma enti na ɛrenyɛ den pii sɛ ɔbɛyɛ ho kyerɛwtohɔ. Nanso ɛhe na Mose nyaa nsɛm a ɛfa onipa abakɔsɛm mfiase ho no nyinaa fii? Ebetumi aba sɛ na Mose wɔ tete kyerɛwtohɔ a ne nananom koraa so a na obetumi anya ne nsɛm afi mu. Ɔkwan foforo so no, na obetumi anya nsɛm tẽẽ afi nnipa anom anaa adiyi a efi Yehowa hɔ. Nnipa adefɛrefo a wɔatra ase mmere horow nyinaa mu no agye abusuabɔ a na emu yɛ den a na Mose ne ne Nyankopɔn wɔ wɔ eyi mu no atom fi bere tenten.
Yehowa—Elia Nyankopɔn Teasefo No
Ná odiyifo Elia nso nim Yehowa sɛ ɔteasefo Nyankopɔn. Ná Elia bɔ ɔsom kronn ho mmɔden, na ɔsom Yehowa ɛmfa ho sɛ ohyiaa ɔtan ne ɔtaa wɔ Baal, Kanaanfo anyame mu otitiriw no asomfo nsam no.—1 Ahene 18:17-40.
Israel Hene, Ahab, ne ne yere Isebel, hwehwɛe sɛ wobekum Elia. Esiane sɛ na osuro sɛ ne nkwa da asiane mu nti, oguan kɔɔ Beer-Seba, wɔ Po a Awu no atɔe fam. Ɛhɔ no, ɔwɔɔ ntwɛtwɛdɛ wɔ sare no so na ɔbɔɔ mpae sɛ onwu. (1 Ahene 19:1-4) So na Yehowa agyaw Elia? So na afei ne somfo nokwafo no ho asɛm nhia No bio? Ɛbɛyɛ sɛ na Elia susuw saa, nanso hwɛ mfomso ara a odii! Akyiri yi, Yehowa ne no kasae brɛoo bisaa no sɛ: “Elia, dɛn na wowɔ yɛ wɔ ha?” Afei bere a ɔde tumi a ɛboro nnipa de so dii dwuma anwonwakwan so kyerɛɛ no biribi no, “ɛnne bi baa ne nkyɛn [bio] sɛ: Elia, dɛn na wowɔ yɛ wɔ ha?” Yehowa faa saa kwan yi so kyerɛɛ sɛ osusuw Elia ho sɛnea ɛbɛyɛ a ɔbɛhyɛ n’akoa nokwafo no nkuran. Ná Onyankopɔn wɔ nnwuma pii ma Elia, na ɔde ahoɔhare gyee saa ɔfrɛ no so! Elia fi nokwaredi mu wiee ne dwumadi ahorow no, de tee Yehowa, ne Nyankopɔn teasefo no din ho.—1 Ahene 19:9-18.
Efi bere a Yehowa poo Israel man no, ɔne ne nkoa a wɔwɔ asase so ankasa tẽẽ bio. Eyi nkyerɛ sɛ na wɔn ho anigye a na ɔwɔ no abrɛ ase. Ɛdenam ne honhom kronkron so no, ɔkɔɔ so ara maa wɔn akwankyerɛ na ɔhyɛɛ wɔn den wɔ ne som mu. Fa ɔsomafo Paulo, a na kan wɔfrɛ no Saul, no sɛ nhwɛso.
Honhom Kronkron a Ɛkyerɛɛ Paulo Kwan
Ná Saul fi Tarso, kurow a na agye din wɔ Kilikia. Ná n’awofo yɛ Hebrifo, nanso wɔwoo no sɛ Roma man ba. Nanso, wɔde Farisifo gyidi katee no na ɛtetee no. Akyiri yi, onyaa hokwan ma wɔyɛn no wɔ “Gamaliel” a na ɔyɛ Mmara no kyerɛkyerɛfo no “nan ase” wɔ Yerusalem.—Asomafo no Nnwuma 22:3, 26-28.
Esiane Yudafo atetesɛm mu mmɔdenbɔ a akyea a na Saul wɔ no nti, obenyaa ɔsɔretia a na emu yɛ den a wɔde baa Yesu Kristo akyidifo so no mu kyɛfa. Ɔpenee afeha a edi kan Kristoni mogyadansefo, Stefano, kum mpo so. (Asomafo no Nnwuma 7:58-60; 8:1, 3) Akyiri yi, ogye toom sɛ kan no na ɔyɛ mmusubɔfo ne ɔtaafo ne onuɔdenfo, ‘wohuu no mmɔbɔ, efisɛ na onnim na ɔyɛe, gye a na onnye nni mu.’—1 Timoteo 1:13.
Ɔpɛ pa a na Saul wɔ sɛ ɔbɛsom Nyankopɔn na ɛkanyan no. Bere a Saul sakrae wɔ Damasko kwan so akyi no, Yehowa de no dii dwuma soronko. Kristo a na wɔanyan no afi awufo mu no somaa Anania, tete Kristo suani bi, ma ɔkɔboaa no. Ɛno akyi no, Yehowa honhom kronkron dii Paulo (Romafo din a wɔde frɛɛ Saul sɛ Kristoni no) akyi maa owiee ɔsom adwuma a egyee bere tenten na ɛsow aba wɔ Europa ne Asia Kumaa nyinaa no.—Asomafo no Nnwuma 13:2-5; 16:9, 10.
Yebetumi ahu honhom kronkron no akwankyerɛ a ɛte saa ara nnɛ? Yiw, yebetumi.
Gye a Nkurɔfo Nnye Onyankopɔn Nni no Nsiw Nkurɔfo Ho Anigye a Yehowa Kyerɛ no Kwan
Ná Joseph F. Rutherford yɛ Ɔwɛn Aban Asafo no titrani a ɔto so abien. Wɔbɔɔ no asu sɛ Bible Suani—sɛnea na wɔfrɛ Yehowa Adansefo saa bere no—wɔ 1906 mu, paw no sɛ Asafo ti no mmaranimfo afe a edi hɔ no, na ɔbɛyɛɛ ne titrani wɔ January 1917 mu. Nanso, bere bi, na mmaranimfo kumaa yi nnye nni sɛ Onyankopɔn wɔ hɔ. Ɛyɛɛ dɛn na ɔbɛyɛɛ Yehowa somfo Kristoni a ɔyɛ nnam saa?
Wɔ July 1913 mu no, na Rutherford yɛ Amanaman Ntam Bible Asuafo Fekuw no nhyiam kɛse bi a wɔyɛɛ no Springfield, Massachusetts, U.S.A., no guamtrani. Ɛhɔnom atesɛm krataa, The Homestead sɛnkyerɛwfo bi bisabisaa Rutherford nsɛm, na wotintim nsɛm no bio wɔ saa nhyiam no amanneɛbɔ nhomawa no mu.
Rutherford kyerɛkyerɛɛ mu sɛ, bere a ɔyɛɛ n’adwene sɛ ɔbɛware no, na ɔyɛ Baptistni, nanso na ɔbea a ɔpɛ sɛ ɔware no no yɛ Presbyni. Bere a Rutherford sɔfo kae sɛ “ɔbea no bɛkɔ hell esiane sɛ wɔmmɔɔ no asu na ɔno de, ɔbɛkɔ soro tẽẽ esiane sɛ wabɔ asu nti no, ne tirim anteɛ no, na ɔbɛyɛɛ obi a onnye Onyankopɔn nni.”
Egyee Rutherford mfe pii a ɔde yɛɛ nhwehwɛmu ansa na ɔresan anya gyidi wɔ Onyankopɔn teasefo bi mu. Ɔkae sɛ, ogyinaa nsusuwii a ɛne sɛ “biribi a adwene no ntumi nte ase no, ɛnsɛ sɛ koma no gye tom ɔkwan biara so” so. Rutherford san kyerɛkyerɛɛ mu sɛ ɛsɛ sɛ Kristofo “hwɛ hu sɛ Kyerɛwnsɛm a wogye di no yɛ nokware,” na ɔde kaa ho sɛ: “Ɛsɛ sɛ wohu wɔn nnyinaso ankasa.”—Hwɛ 2 Timoteo 3:16, 17.
Yiw, obi a onnye Onyankopɔn nni anaasɛ obi a ontumi nhu sɛ Onyankopɔn wɔ hɔ no mpo betumi ahwehwɛ Kyerɛwnsɛm no mu anya gyidi nnɛ, na ɔne Yehowa Nyankopɔn abenya abusuabɔ a emu yɛ den sɛ ɔteasefo. Bere a aberante bi nam Ɔwɛn Aban Asafo no nhoma Nimdeɛ a Ɛde Kɔ Daa Nkwa Mu so suaa Bible no yiye akyi no, ɔkae sɛ: “Bere a mifii adesua yi ase no, na minnye Onyankopɔn nni, nanso mprempren mihu sɛ Bible mu nimdeɛ no asakra m’adwene koraa. Mafi ase rehu Yehowa, na merenya ne mu ahotoso.”
“Ogyennyentwi” ne Onyankopɔn
Ɔbenfo James Hastings ka wɔ A Dictionary of the Bible mu sɛ: “Apam Dedaw [Hebri Kyerɛwnsɛm] akyerɛwfo no mu biara anso ho dae da sɛ ɔde wɔ a Onyankopɔn wɔ hɔ ho adanse bɛma anaasɛ obegye ho akyinnye. Ná ɛnyɛ tetefo no su sɛ wobegye wɔ a Onyankopɔn wɔ hɔ ho kyim anaasɛ wɔde nsɛm bɛfoa so. Ná gyidi no yɛ nea onipa fi awosu mu te ase, na obiara gye tom.” Nanso, eyi nkyerɛ sɛ na nnipa a wɔwɔ hɔ saa bere no nyinaa suro Onyankopɔn. Na ɛnte saa koraa. Dwom 14:1 ne 53:1, nyinaa ka wɔ NW mu sɛ “ɔkwasea” anaa sɛnea Twi Bible no ka no, “ogyennyentwi” na ɔka ne komam sɛ “Onyankopɔn bi nni hɔ.”
Ɔkwasea yi anaa nea onnye nni sɛ Onyankopɔn bi wɔ hɔ no yɛ onipa bɛn? Ɔnyɛ obi a onni nimdeɛ. Na mmom Hebri asɛmfua na·valʹ twe adwene si abrabɔ fam sintɔ so. Ɔbenfo S. R. Driver ka wɔ nsɛm a ɔkyerɛwee wɔ The Parallel Psalter mu sɛ “sintɔ no nyɛ ntease mu mmerɛwyɛ, na mmom abrabɔ ne nyamesom ho anibiannaso, atɛmpa ne nhumu a wonni koraa.”
Odwontofo no kɔ so kyerɛkyerɛ ɔbrasɛe a efi su a ɛte saa mu ba no mu: “Wɔasɛe wɔn nneyɛe ayɛ no akyide, obi nni hɔ a ɔyɛ papa.” (Dwom 14:1) Ɔbenfo Hastings bɔ n’asɛm no mua sɛ: “Nnipa gyina asɛm a ɛne sɛ Onyankopɔn bi nni wiase ne asɛm a wɔmfa nyɛ asɛm so sɛe wɔn abrabɔ yɛ afide.” Wogye nnyinasosɛm ahorow a ɛmfata tom a wɔmfɛre, na wɔpo ɔteasefo Nyankopɔn bi a wɔmpɛ sɛ wobu akontaa biara kyerɛ no no. Nanso nsusuwii a ɛte saa yɛ agyennyentwisɛm ne nkwaseasɛm ɛnnɛ te sɛ nea na ɛte bere a odwontofo no kyerɛw ne nsɛm no bɛboro mfe 3,000 a atwam ni no.
Kɔkɔbɔ Ahorow a Efi Yɛn Nyankopɔn Teasefo no Hɔ
Afei yɛnsan nkɔ nsɛm a yebisae wɔ yɛn asɛm a edi kan no mu no so. Dɛn nti na nnipa pii ntumi nte nea enti a Onyankopɔn teasefo bi wɔ hɔ nanso amanehunu ahyɛ nnɛ wiase yi mu ma saa no ase?
Bible kura nsɛm a efi mmarima a wɔyɛ ‘Onyankopɔn nnipa a sɛnea honhom kronkron de wɔn rekɔ no na wɔkasae’ hɔ. (2 Petro 1:21) Ɛno nkutoo na ɛma yehu Onyankopɔn teasefo, Yehowa. Afei nso, ɛbɔ yɛn kɔkɔ wɔ ɔbɔnefo bi a aniwa ntumi nhu no a ɔwɔ tumi kɛse a ɔde redi nnipa nsusuwii so na ɔrenya so nkɛntɛnso—Satan Ɔbonsam—ho. Ɔkwan a ɛfata so no, sɛ yennye nni sɛ Onyankopɔn teasefo bi wɔ hɔ a, ɛbɛyɛ dɛn na yɛagye adi sɛ Ɔbonsam anaa Satan bi nso wɔ hɔ ankasa?
Honhom kaa ɔsomafo Yohane ma ɔkyerɛwee sɛ: ‘Nea wɔfrɛ no Ɔbonsam ne Satan no redaadaa amanaman nyinaa.’ (Adiyisɛm 12:9) Akyiri yi Yohane kae sɛ: “Yenim sɛ yefi Nyankopɔn, na wiase nyinaa da ɔbɔne no mu.” (1 Yohane 5:19) Nsɛm yi ne Yesu nsɛm a Yohane ankasa yɛɛ ho kyerɛwtohɔ wɔ N’asɛmpa no mu no hyia: “Wi yi ase sodifo no reba, nanso ɔrennya me hɔ hwee.”—Yohane 14:30.
Hwɛ sɛnea nkyerɛkyerɛ a egyina Kyerɛwnsɛm so yi yɛ soronko koraa wɔ nea nkurɔfo gye di nnɛ no ho! Catholic Herald ka sɛ: “Ɔbonsam ho asɛm a wɔka no abrɛ ase koraa nnɛ. Yɛn bere a akyinnyegye ne nyansahu abu so wom yi ayi Satan afi hɔ.” Nanso Yesu kaa no anibere so kyerɛɛ mmarima a na wɔpɛ sɛ wokum no no sɛ: “Mo agya a mufi no mu ne ɔbonsam, na mo agya no akɔnnɔde na mopɛ sɛ moyɛ.”—Yohane 8:44.
Ntease wɔ sɛnea Bible kyerɛkyerɛ Satan tumi mu no mu. Ɛma nea enti a ɛmfa ho sɛ nnipa dodow no ara pɛ sɛ wɔtra ase wɔ asomdwoe ne biakoyɛ mu no, nitan, akodi, ne basabasayɛ a ntease nnim te sɛ nea esii wɔ Dunblane (a yɛkaa ho asɛm wɔ nkratafa 3 ne 4) ahyɛ wiase ma no mu da hɔ. Bio nso, ɛnyɛ Satan nkutoo ne ɔtamfo a yɛne no anya. Bible no de abonsamfo foforo, anaa adaemone ho kɔkɔbɔ nso ma—abɔde a wɔyɛ ahonhommɔne a bere tenten bi a abɛsen kɔ no, wɔkɔkaa Satan ho ma wɔdaadaa adesamma na wɔsɛee wɔn. (Yuda 6) Yesu Kristo ne ahonhom yi de sii ani mpɛn pii, na otumi dii wɔn so.—Mateo 12:22-24; Luka 9:37-43.
Nokware Nyankopɔn, Yehowa, abɔ ne tirim sɛ ɔbɛpopa abɔnefosɛm afi asase yi so, na awiei koraa no, wayi Satan ne n’adaemone no nnwuma nyinaa afi hɔ. Yebetumi agyina Yehowa ho nimdeɛ a yɛwɔ so anya gyidi a emu yɛ den ne ahotoso wɔ ne bɔhyɛ ahorow mu. Ɔka sɛ: “Wɔnnwenee onyame bi m’anim ɛ, na m’akyi nso obiara remma. Me, mene [Yehowa, NW], na ogyefo bi nni hɔ sɛ me!” Nokwarem no, Yehowa yɛ Onyankopɔn teasefo ma wɔn a wonim no na wɔsom no nyinaa. Ɔno nkutoo nkyɛn na yebetumi anya nkwagye.—Yesaia 43:10, 11.
[Kratafa 7 mfonini]
Afeha a ɛto so 18 mfonini bi a wokurukyerɛwee a ɛkyerɛ Mose a ofi honhom mu rekyerɛw Genesis 1:1
[Asɛm Fibea]
Efi The Holy Bible a J. Baskett a na ɔwɔ Oxford no yɛe mu
[Kratafa 8 mfonini]
Yesu Kristo dii adaemone dɔm so mpɛn pii