Wubetumi Anya Onyankopɔn Teasefo Bi Mu Gyidi?

BRITANIA sukuupɔn sɔfo panyin bi kae sɛ: “Ɛho nhia sɛ wugye Onyankopɔn di ansa na woayɛ Kristoni . . . Mprempren yɛwɔ ɔsesɛw bi mu, nanso wobeyi Onyankopɔn afi asɔre no amammerɛ mu wɔ afeha a ɛto so 21 no mu.” Ná ɔrekasa ama Gyidi Ahorow fekuw a anyɛ yiye koraa no, Britania asɔfo bɛyɛ ɔha gyina akyi no. “Kristofo a wonnye nni sɛ Onyankopɔn wɔ hɔ” yi kyerɛ sɛ nnipa na ɛde nyamesom bae, na sɛnea kuw no muni biako kae no, Onyankopɔn yɛ “nsusuwii bi” ara kwa. Afei de wɔayi Onyankopɔn bi a ɔwɔ tumi a ɛboro nnipa de so afi wɔn adwenem koraa.

“Onyankopɔn awu” yɛ ɛfene a na agye din wɔ 1960 mfe no mu. Ɛdaa afeha a ɛto so 19 Germanni nyansapɛfo Friedrich Nietzsche nsusuwii adi, na ɛmaa mmerante ne mmabaa pii nyaa hokwan a na wɔpɛ sɛ wɔde yɛ nea wɔpɛ no, na wɔde wɔn ho hyɛɛ ɔbea ne barima nna mu a mmara biara nkyekyere wɔn, ne nnuru a wɔde di dwuma ɔkwammɔne so a biribiara nsiw wɔn kwan mu. Nanso, so ahofadi a ɛte saa no maa mmofra a wɔasoro, sɛnea na wɔfrɛ wɔn no, nyaa asetra kwan a anigye wom kɛse?

Saa mmere no ara mu na Anglikan sɔfo panyin John A. T. Robinson tintim ne nhoma a na ɛho wɔ asɛm Honest to God no. Ne mfɛfo asɔfo pii kasa tiaa no sɛ wabu Nyankopɔn sɛ ɔyɛ “nnipa suahu mu nsusuwii bi ara kwa.” Nyamekyerɛ mu ɔbenfo Keith Ward bisae sɛ: “So Onyankopɔn mu gyidi yɛ gyidihunu bi a ne bere atwam a anyansafo abɔ agu mprempren?” Ɔrema n’ankasa asɛmmisa ho mmuae no, ɔkae sɛ: “Biribiara nni nyamesom mu nnɛ a ɛho hia te sɛ Onyankopɔn ho adwene a yɛwɔ dedaw a yɛbɛsan akɔfa.”

Amanehunu ne Onyankopɔn Teasefo Bi

Ɛyɛ den ma nnipa pii a wɔwɔ Nyankopɔn teasefo bi mu gyidi no sɛ wobegyina wɔn gyidi so ate nea enti a asiane ne amanehunu kɔ so ase. Sɛ nhwɛso no, wɔ March 1996 mu no, wɔbɔɔ mmofra 16 ne wɔn kyerɛkyerɛfo tuo kunkum wɔn wɔ Dunblane, Scotland. Ɔbea bi a na n’adwene atu afra kae sɛ: “Mente nea Onyankopɔn pɛ sɛ ɔyɛ no ase koraa.” Obi kyerɛw sɛnea asiane no ma wodii yaw no ho asɛm guu kratasin bi so de kaa nhwiren ho guu mmofra no sukuu dan akyi. Ekura asɛmfua biako pɛ, “ADƐN?” Wɔ mmuaema mu no, Dunblane Cathedral sɔfo no kae sɛ: “Nkyerɛkyerɛmu biara nni hɔ. Yɛrentumi mma nea enti a eyi sii ho mmuae.”

Akyiri yi wɔ afe koro no ara mu no, wokum Anglikan sɔfo kumaa bi a wagye din atirimɔden so. Church Times no bɔɔ amanneɛ sɛ asafo a wɔn ho adwiriw wɔn no tee sɛ Liverpool asɔre panyin no reka sɛnea “na ogyina Onyankopɔn pon akyi rebisa no sɛ, adɛn? adɛn?” Na ɔsɔfo yi nso nni awerɛkyekyesɛm biara a efi Onyankopɔn teasefo bi hɔ.

Ɛnde dɛn na ɛsɛ sɛ yegye di? Ntease wom sɛ obi benya Onyankopɔn teasefo bi mu gyidi. Ɛno na wobetumi agyina so ama nsɛmmisa a ɛkyere adwene a ɛwɔ atifi ha no ho mmuae. Yɛhyɛ wo nkuran sɛ susuw adanse horow a wɔde ama wɔ asɛm a edi hɔ no mu ho.

[Kratafa 3 mfonini]

Kratasin no bisae sɛ “Adɛn?”

[Asɛm Fibea]

NEWSTEAM No. 278468/Sipa Press