Fa Akokoduru To Nsa Frɛ Afoforo Sɛ “Bra!”
1 Nsɛm a esisi ntɛm wɔ wiase nyinaa no ma wohu mmere yi sɛ “nna a edi akyiri.” (2 Tim. 3:1-5) Nsɛmmɔnedi a ɛredɔɔso, sikasɛm a ɛsɛe, nyarewa a ebetumi akum obi ma ahokyere no yɛ kɛse. Nanso anigyesɛm ne sɛ wɔ amanehunu a ɛte sɛɛ nyinaa akyi no, wɔreto nsa afrɛ nnipa sɛ wɔmmɛyɛ biribi a ebenya wɔn so tumi daa. Honhom no ne ayeforo no kɔ so ka sɛ: “Bra!” Mprempren “nnipakuw kɛse” bi abɛka wɔn ho ma wɔreto nsa frɛ nnipa a wɔwɔ mmeae nyinaa wɔ baguam sɛ wɔmmra mmegye nkwa nsu kwa.—Adi. 7:9; 22:17.
2 Ɛnnɛ, wɔn a trenee ho sukɔm de wɔn no mu pii regye ɔfrɛ yi so. Afe a etwaam no, nnipa ɔpepem pii kɔɔ ɔmantam nhyiam horow a wɔyɛe no, na nnipa bɛyɛ ɔpepem du baa Nkaedi no ase. Nnipa afoforo ɔpepem pii nso rekyerɛ Yehowa nsiesiei ho anisɔ denam Ahenni nkrasɛm no a wotie no so. Ɛnde, hwɛ sɛnea ɛho hia sɛ yɛde yɛn bere bedi dwuma nyansam de ato nsa afrɛ afoforo wɔ baguam ne wɔ afie afie!—Aso. 5:42; Efe. 5:15, 16.
FA AKOKODURU NYA MU KYƐFA
3 Nsiyɛ a Kristofo a wodi kan no de yɛɛ asɛnka adwuma no nti, wɔtaa wɔn. (Aso. 16:19-21: 17:2-8) Nanso, wɔannyae mmɔden a wɔbɔe akokoduru so sɛ wɔbɛbɔ asɛmpa no dawuru no da. Ɛsɛ sɛ yɛn nso yɛda akokoduru adi na yesi yɛn bo wɔ mmɔden a yɛbɔ sɛ yɛbɛka asɛmpa no mu.
4 Wɔ aman a wɔabara adwuma no wɔ hɔ mpo mu no. anuanom no a wɔn koma nyinaa mu nya asɛnka adwuma no mu kyɛfa wɔ ɔtaa a emu yɛ den a wɔn adwuma, wɔn fie ne wɔn ahofadi mpo a ebetumi afi wɔn nsa ka ho nyinaa akyi. Wɔn nhwɛso pa no yɛ nkuranhyɛ ma yɛn sɛ yɛnkɔ so nto nsa mfrɛ afoforo sɛ “Bra!”—2 Tess. 3:9
5 Bɛboro mfe 35 wɔ bere a onuawa bi suaa nokware no akyi no, ɔkɔɔ so kuraa ɔpɛ a na ɔwɔ wɔ ne koma mu sɛ ɔbɛyɛ ɔkwampaefo no mu. Bere a odii mfe 70 no, ne nsɛm tebea sakrae, na ɔbɛyɛɛ daa ɔkwampaefo. Ɛwom sɛ nnipa a wɔadi saa mfe no mu kakraa bi pɛ na wobefi ase ayɛ adwuma foforo de, nanso ɔyɛɛ saa. Bere a mprempren a ɔde mfe dodow bi ayɛ bere nyinaa som adwuma no, ose: “Ɛyɛ yiye da biara.” Wama afoforo anya honhom mu ahoɔden esiane akokoduru a ɔde gyee nsa a Yehowa to frɛɛ no sɛ ɔnyere ne ho na onnya Ahenni adwuma no mu kyɛfa kɛse no so nti.
6 Sɛnea na ɛte wɔ afeha a edi kan no mu no, nkurɔfo regye ɔfrɛ yi so, wɔsakra wɔn nsusuwii, wɔyɛ wɔn adwene foforo, na wogyae wɔn nneyɛe a egu Onyankopɔn anim ase no. Wɔbɛyɛ amanaman ntam Adansefo a wɔahyira wɔn ho so no mufo, na wɔkɔka honhom no ne ayeforo no ho ma wɔka kyerɛ nnipa komapafo afoforo sɛ “Bra!”
7 Nkɔanim kɛse a Ahenni adwuma no anya ne baa dwumadibea ahorow a wɔtrɛw mu wɔ nsase pii so no di Yehowa nhyira ho adanse. Nanso bere a saa nhyehyɛe dedaw yi wɔ no reba awie. Bere a ɛfata sɛ yɛde akokoduru ne nsiyɛ to nsa frɛ afoforo sɛ “Bra!” no ni, sɛnea ɛbɛyɛ na afoforo atumi agye so ntɛm ara na wɔayɛ nea wɔte no ho biribi.—Aso. 20:26, 27; Rom. 12:11.