Da Koro Nhyiam Titiriw Dwumadi Foforo
1 Dɛn nti na ɛsɛ sɛ yɛka asɛmpa no a yɛmmrɛ? Ɔsɛmpakafo a obi bɛyɛ no ho ahwehwɛde ne dɛn? Ɛbɛyɛ dɛn na wɔn a wɔfɛre ade anaa wɔyɛ ahufo mpo atumi afi ase aka asɛmpa no akyerɛ afoforo? Wobebua eyinom ne nsɛmmisa a ɛkanyan adwene foforo wɔ da koro nhyiam titiriw dwumadi a ebefi ase August, a ekura asɛmti “Asɛmpa no Ho Asomfo a Wɔfata” no ase.—Fa toto 2 Korintofo 3:5 ho.
2 Sɛ́ Yehowa nkurɔfo no, ɛsɛ sɛ yɛma yɛn ani da hɔ wɔ yɛn abrabɔ ho. Mmofra a wɔbɛka sɛnea wɔako atia atipɛnfo nhyɛso de osuahu ahorow a ɛhyɛ nkuran bɛma. Wɔde nkuranhyɛsɛm a ɛfa hia a ehia sɛ awofo tete wɔn mma ma wɔyɛ Onyankopɔn asomfo bɛma wɔn. Wɔbɛboa yɛn nyinaa ma yɛakyerɛ hia a ehia sɛ yɛka asɛm no, ne nhyira horow a yɛne wɔn a wotie yɛn no nyinaa benya ho anisɔ.—1 Tim. 4:16.
3 Akyinnye biara nni ho sɛ ade titiriw biako ma da no bɛyɛ asubɔ. Wɔde ɔkasa a egyina Bible so a wɔbɛma akyerɛ wɔn a wɔahyira wɔn ho so foforo no titiriw na ebedi adeyɛ yi anim. Nokwarem no, ɛsɛ sɛ atiefo nyinaa wɛn wɔn aso yiye bere a wɔrema asubɔ kasa na wɔrekyerɛkyerɛ nsɛm mu yiye ma emu ada hɔ no. Ɛsɛ sɛ wɔn a wɔpɛ sɛ wogye asubɔ wɔ da koro nhyiam titiriw no ase no nyinaa di kan ka kyerɛ ɔhwɛfo guamtrani no sɛnea ɛbɛyɛ a obenya bere de ayɛ nhyehyɛe ama mpanyimfo ne wɔn asusuw nsɛmmisa a wɔahyehyɛ no ho.
4 Ade titiriw foforo nso bɛyɛ ɔkasa titiriw a ɔmantam sohwɛfo anaa ɔkasafo a asafo ti no apaw no bɛma. Wɔato din “Onyankopɔn Asomfo a Wɔfata na Wɔasiesie Wɔn.” Wobesusuw nsiesiei atitiriw anan a esiesie yɛn sɛ asomfo ho, na ɔkasa no de osuahu ahorow a ɛhyɛ gyidi den nso bɛma.
5 Yɛ nhyehyɛe seesei sɛ wobɛkɔ akotie dwumadi no nyinaa bi. Hwɛ hu sɛ wobɛto nsa afrɛ anigyefo ne Bible asuafo ne adawurubɔfo a wɔayɛ mmerɛw nso, na wɔn nso wɔanya teokrase ɔkyerɛkyerɛ da yi mu mfaso bi. Saa kwan yi so no, yebenya ahotoso sɛ “yɛfata yiye” sɛ asɛmpa no ho asomfo.