Yebetumi Ayɛ Nnwuma Akɛse
1 Yesu Kristo yɛɛ anwonwade pii wɔ ne som adwuma no mu. Ɔnam anwonwakwan so maa nnipa mpempem pii aduan, ɔsaa nnipa pii yare, na onyan ebinom fii awufo mu. (Mat. 8:1-17; 14:14-21; Yoh. 11:38-44) Ne dwumadi no twetwee ɔman mũ nyinaa adwene. Nanso, anwummere a ade rebɛkye ma wawu no, ɔka kyerɛɛ n’akyidifo anokwafo no sɛ: “Nea ogye me di no, nnwuma a meyɛ no, ɔno nso bɛyɛ, na ɔbɛyɛ akɛse asen eyinom.” (Yoh. 14:12) Yɛbɛyɛ dɛn atumi ayɛ nnwuma “akɛse”?
2 Denam Nsasesin Pii Mu Adwuma a Yɛbɛyɛ So: Yesu yɛɛ adwuma wɔ Palestina nkutoo, nanso ɔka kyerɛɛ n’asuafo a wodi kan no sɛ wonni adanse ‘nkɔpem asase ano nohoa,’ ntra baabi a Yesu ankasa kaa asɛm kodui no koraa. (Aso. 1:8) Asɛnka adwuma a ɔhyɛɛ ase no adu wiase nyinaa seesei, adu nsase 232 so. (Mat. 24:14) So worenya asasesin a wɔde ama w’asafo no mu adwumayɛ mu kyɛfa pii?
3 Denam Nnipa Pii Nkyɛn a Yɛbɛkɔ So: Asuafo kakraa bi na Yesu gyaw wɔn hɔ sɛ wɔntoa asɛnka adwuma no so. Nanso, esiane nnamyɛ a wɔde dii adanse wɔ Pentekoste afe 33 Y.B. no nti, akra bɛyɛ mpem abiɛsa na wogyee nokware no ma wɔbɔɔ wɔn asu saa da no. (Aso. 2:1-11, 37-41) Wɔn a “wɔpɛ daa nkwa” anoboaboa no atoa so abedu yɛn bere yi so, na sɛ yɛkyekyem pɛpɛɛpɛ a, yɛrebɔ nnipa bɛboro 1,000 asu da koro. (Aso. 13:48, NW) So woreyɛ nea wubetumi nyinaa de adu nnipa komapafo nkyɛn wɔ baabiara a wubehu wɔn no, na wokɔ wɔn a wɔkyerɛ anigye no nkyɛn ntɛm sɛnea wubetumi?
4 Denam Asɛnka Adwuma a Yɛbɛyɛ no Bere Tenten So: Mfe abiɛsa ne fã na Yesu de yɛɛ ne som adwuma wɔ asase so. Yɛn mu pii ayɛ asɛnka adwuma no sen saa. Ɛmfa ho bere tenten a wɔbɛma yɛakɔ so ayɛ adwuma yi no, yɛn ani gye sɛ yɛbɛboa osuani foforo biara ma wafi ase anantew ɔkwan a ɛkɔ nkwa mu no so. (Mat. 7:14) So woreyɛ pii ɔsram biara wɔ Awurade adwuma no mu?—1 Kor. 15:58.
5 Yebetumi akɔ so anya ahotoso sɛ esiane sɛ Yesu gyina yɛn akyi nti, yɛbɛkɔ so ayɛ nnwuma akɛse sɛ n’asuafo anokwafo.—Mat. 28:19, 20.