Asafo mu Asomfo De Ɔsom a Mfaso Wɔ So Ma
1 “Wɔda wɔn ho adi sɛ nnipa a wɔahyira wɔn ho so ampa a wɔn gyidi ada adi nnamyɛ mu wɔ Ahenni adwuma no mu ne wɔ afoforo a wɔboa wɔn ma wɔbɛyɛ den wɔ gyidi no mu mu.” Saa na Nhyehyɛe a Wɔayɛ ma Yɛde Awie Yɛn Som Adwuma no ka asafo mu asomfo ho asɛm wɔ nkratafa 56-7. Nokwarem no, ɛfata sɛ yesuasua honhom fam nhwɛso a yɛn asafo mu asomfo yɛ no. Yɛ a yɛne wɔn ne mpanyimfo no bɛyɛ adwuma abom no na “ɛma nipadua no nyin na ɛyɛn ne ho ɔdɔ mu.”—Efe. 4:16.
2 Asafo mu asomfo yɛ adwuma a ɛho hia wɔ asafo no mu. Susuw wɔn nnwuma a mfaso wɔ so no ho hwɛ! Wɔhwɛ sikasɛm so, nhoma, nsɛmma nhoma, nsɛmma nhoma kra, ne asasesin ahorow so; wogye ahɔho; wɔhwɛ afiri a wɔde kasa so; na wɔboa ma wosiesie Ahenni Asa so. Wonya dwumadi wɔ Teokrase Ɔsom Sukuu no ne Ɔsom Nhyiam mu. Wɔn mu binom mpo tumi ma baguam ɔkasa ahorow anaa wɔhwɛ asafo nhyiam horow no bi so. Te sɛ nipadua nkwaa no, asafo mu asomfo yɛ nnwuma a ehia ma yɛn.—1 Kor. 12:12-26.
3 Sɛ afoforo hu sɛ asafo mu asomfo ne mpanyimfo de biakoyɛ reyɛ adwuma sɛ asomfokuw biako na wɔda obu ne ntease adi ma wɔn ho wɔn ho a, ɛhyɛ wɔn nkuran ma wɔyɛ saa ara. (Kol. 2:19) Ɛdenam wɔn asɛyɛde horow a wodi ho dwuma dapɛn biara ne afoforo ho anigye a wɔkyerɛ so no, wɔboa ma asafo no nya honhom fam nkɔso.
4 Dɛn na yebetumi ayɛ de akyerɛ sɛ yɛn ani sɔ asafo mu asomfo a wɔyɛ adwumaden no? Ɛsɛ sɛ yehu nnwuma a wɔde ahyehyɛ wɔn nsa no, na yɛyɛ krado sɛ yɛne wɔn bɛyɛ biako bere a wohia yɛn mmoa no. Yebetumi ama wɔahu sɛ yɛn ani sɔ wɔn adwuma no denam nsɛm a yɛka ne nneyɛe so. (Mmeb. 15:23) Wɔn a wɔyɛ adwumaden ma yɛn no fata obu a edi mu.—1 Tes. 5:12, 13.
5 Onyankopɔn Asɛm akyerɛ asafo mu asomfo nnwuma ne ahwehwɛde ahorow a ɛsɛ sɛ wodu ho. (1 Tim. 3:8-10, 12, 13) Ɔsom kronn a wɔde ma a mfaso wɔ so no ho hia ma asafo no dwumadi denneennen. Ɛfata sɛ yɛkɔ so hyɛ mmarima a wɔtete saa no nkuran bere a wɔyɛ ‘pii wɔ Awurade adwuma mu no.’—1 Kor. 15:58.