Asɛmmisa Afã

◼ So woasiesie wo ho ama tebea a egye ntɛmpɛ?

Wɔ yɛn nnɛ wiase yi mu no, “ɛbere ne asiane” taa ma tebea a egye ntɛmpɛ sɔre wɔ aduyɛ mu, na ebi ne hyɛ a wɔhyɛ obi sɛ onnye mogya. (Ɔsɛnk. 9:11, NW) Nea ɛbɛyɛ na yɛatumi asiesie yɛn ho ama tebea a ɛte saa no, Yehowa nam n’ahyehyɛde so de mmoa ama wɔ akwan pii so, nanso ɔhwɛ kwan sɛ yɛbɛyɛ yɛn fam de. Nneɛma a wobɛyɛ na aboa wo na ɛwɔ ase hɔ no.

• Fa “Advance Medical Directive/Release” kratasin hyɛ wo ho bere nyinaa.

• Hwɛ hu sɛ wo mma de “Identity Card” a entwaam ahyɛ wɔn ho.

• Kenkan krataa a ɛhyɛ January 1995 Yɛn Ahenni Som mu no, na sua sɛnea wo ne nnuruyɛfo ne atemmufo besusuw wo ba ayaresa ho.

• Kenkan mogya mu nneɛma bi ne nnuru a wɔde si mogya ananmu ho asɛm. (Eyinom na wɔkamfo kyerɛ: Ɔwɛn-Aban a ɛyɛ October 1, 1994, kratafa 31; June 1, 1990, nkratafa 14-15; March 1, 1989, nkratafa 30-1; Engiresi Nyan! a ɛyɛ December 8, 1994, nkratafa 23-7; August 8, 1993, nkratafa 22-5; November 22, 1991, kratafa 10; ne krataa a ɛhyɛ January 1995 ne January 1991 Yɛn Ahenni Som mu. Fa hyɛ baabi a wubehu no ntɛm.)

• Fi ahonim mu si gyinae a emu da hɔ sɛ ebia wubetumi ama wɔde mfiri a wɔma obi mogya fa mu san kɔ ne nipadua mu adi dwuma anaa sɛ ebia wubetumi agye nnuru a mogya mu nneɛma bi wom a.

• Sɛ ɛbɛyɛ yiye a, ansa na wobɛkɔ ayaresabea no, ma mpanyimfo no nhu na wɔatumi aboa wo, na sɛ ɛho hia a, wɔakohu Ayaresabea Ntam Nkitahodi Boayikuw (HLC) no. Sɛ ɔyɛ abofra na tebea no gye ntɛmpɛ anaa wɔpɛ sɛ wɔma no mogya ma adan asɛnnennen a, ka kyerɛ mpanyimfo no ma wɔnka nkyerɛ HLC no ntɛm.

Ma Wonhu Pefee sɛ Wompɛ Mogya: Amanneɛbɔ kyerɛ sɛ anuanom bi twɛn ma ɛka akyi dodo ansa na wɔaka akyerɛ nnuruyɛfo a wɔsa wɔn yare no sɛ wɔmpɛ mogya. Eyi haw nnuruyɛfo na ebetumi ama wɔama wo mogya. Sɛ nnuruyɛfo no hu sɛ wode nkrataa a wode wo nsa ahyɛ ase a ɛkyerɛ dekode pɔtee a wopɛ sɛ wɔyɛ ma wo agyina wo gyidi ne nea wopɛ akyi a, ɛboa wɔn ma wofi ayaresa no ase ntɛm na ɛtaa ma wohu akwan foforo a wɔbɛfa so asa wo yare a wɔmma wo mogya.

Esiane sɛ tebea a egye ntɛmpɛ wɔ aduyɛ mu betumi asɔre bere biara, mpɛn pii wɔ bere a wonhwɛ kwan koraa nti, yɛ nhyehyɛe seesei ara fa bɔ wo ne wo mma ho ban na wɔamma mo mogya.—Mmeb. 16:20; 22:3.