Ɔsatu A Yɛnam So Bɛbɔ “Yɛn Nkwagye Abɛn!” Ɔmantam Nhyiam No Ho Dawuru Wɔ Wiase Nyinaa
Asafo Biara Mu Adawurubɔfo Bɛkyekyɛ Nsaano Krataa Titiriw Yi Bi
1 Efi March 2006 besi saa bere yi, wɔde nsaano krataa titiriw bi abɔ ɔmantam nhyiam a yɛreyɛ wɔ wiase nyinaa no ho dawuru, na wɔbɛkɔ so abɔ ho dawuru kosi sɛ wɔbɛyɛ nhyiam no nyinaa awiei wɔ aman 155 so.
2 Esiane bere a yɛwom wɔ nna a edi akyiri yi mu no nti, ɛsɛ sɛ nhyiam a ɛka gye a Onyankopɔn begye yɛn afi wiase bɔne yi mu ho asɛm no kanyan nnipa komapafo kɛse. Ɛsɛ sɛ asɛm no ka wɔn ma wosusuw nea ɛbɛba daakye no ho. Nea ɛbɛyɛ na nnipa ɔpepem pii ate awerɛkyekye nsɛm a ɛma anidaso yi no, wɔhyɛ Yehowa Adansefo a wɔwɔ asafo ahorow bɛboro 98,000 mu no nyinaa nkuran sɛ wɔmfa anigye mmɔ nhyiam a wɔbɛkɔ bi no ho dawuru.
3 Wɔde nsaano krataa dodow a ɛfata bɛmena asafo ahorow no ma ɔdawurubɔfo biara anya 50. Asafo no mu akwampaefo betumi akyekyɛ dodow a ɛbɛka no. Asafo biara befi ɔsatu no ase bere a aka adapɛn abiɛsa ma wɔakɔ wɔn nhyiam no. Eyi bɛma wɔanya bere pii a wɔde bɛyɛ asafo no asasesin nyinaa mu adwuma. Ɛsɛ sɛ ɔsom adwuma so ahwɛfo a wɔn asafo ahorow no yɛ adwuma wɔ asasesin biako mu no yɛ biako sɛnea ɛbɛyɛ a wobetumi ayɛ asasesin no mu adwuma yiye.
4 Wɔhyɛ yɛn nyinaa nkuran sɛ yɛmmɔ mmɔden sɛ yɛde nsaano krataa no bɛma ofiewura biara a yɛbɛto no. Nanso sɛ yɛanto ebinom wɔ fie a, yebetumi de ahyɛ baabi a ɛfata a sɛ wɔba a wobehu. Ɛsɛ sɛ yɛbɔ mmɔden sɛ yɛbɛkyekyɛ nsaano krataa no nyinaa wɔ adapɛn abiɛsa no mu.
5 Yɛwɔ ahotoso sɛ yɛnam ɔsatu kɛse a yɛbɛyɛ de abɔ “Yɛn Nkwagye Abɛn!” Ɔmantam Nhyiam no ho dawuru wɔ wiase nyinaa sɛnea wɔaka ho asɛm wɔ ha no so bedi nnipa pii adanse. Yɛn mpaebɔ ne sɛ Yehowa behyira mmɔden biara a mobɛbɔ sɛ ankorankoro de anya ɔsatu yi mu kyɛfa wɔ wiase nyinaa no so.